1 Yoana 3
3
Yoana Ekubasambalila Buno Bamenyinine Bantu ba Kalaga nu Bantu ba Satana.
1Unguililazi, lutundo lukizi lutuatundilue nelsi, buno tumanue bana ba Kalaga; nu bubo ubutuli. Kubuno kisi takikutumenya, kubuno takiamumenyine. 2Batundua bane, kano kaluma tuli bana ba Kalaga, aba tabumonekako nunse butukaba. Tuizi buno gakamonekako, tukamususania; kubuno tukamumonako anga bueli. 3Na muntu na muntu ukumulemanina nti eiyengia, anga bubo buenga. 4Na muntu na muntu ukugomia na buagi, nti ekukagula mulembe; kubuno buagi buli kukagula mulembe. 5Nu muizi buno we amonekileko buno atikie misako zeitu za buagi; nu mueli tamuli buagi. 6Na muntu na muntu wikile mueli ntagomie na buagi: nu na muntu na muntu wagomia na buagi nti ntamumonineko, nu nti ntamumenyine. 7Bana bane bakeke, muntu ntamuengelele; ukukitaga buisanana eli wisanana, anga buisanana: 8nu wozo ukugomia na buagi nti eli wa Liabo, u Satana, kubuno wozo Liabo, u Satana agomezie na buagi kutukila mu kulinga. Ku kabamba kako Muana wa Kalaga amonekileko, buno abigie makitilo ma Liabo, u Satana. 9Na muntu na muntu wabutilue na Kalaga ntagomia na buagi, kubuno mbuto za kalamo kage zili mueli: nu ntanavuama kugomia na buagi, kubuno abutilue na Kalaga. 10Ku bubo bana ba Kalaga bakumonekako, nu bana ba wozo Liabo, u Satana; na muntu na muntu utakukitaga buisanana ntakutukaga ku Kalaga, aba we utakutundaga mubuto wage. 11Kubuno zeno umisagu zimualingile kungua kuzo, buno tutundane bueitu bueitu: 12tanga Kaina buabezaga wa wozo mubi, nu itile muto wage. Nuwe amuitide kikizi? Kububuno makitilo mage mabezaga mabi, nu ma muto wage mabezaga meisanana.
13Mibuto zane, tamuitangale, ndi kisi kiamusomba. 14Isue tuizi buno tuatukile ku lukuo nu tuingide mu kalamo, kubuno tuatunda mibuto zeitu. Utatunda, eikile mu lukuo. 15Na muntu na muntu ukusombaga mubuto wage nti eli muiti, nu muizi buno muiti nteli na kalamo katanakuzinda. 16Kububo tuamenyinina lutundo, kubuno we eikasene kalamo kage ku kabamba keitu; buatutunganana nuisue kukasana tulamo tueitu ku kabamba ka mibuto zeitu. 17Tondo ndi muntu eli na bikulo bia kisi kikino, nu ekumona mubuto wage ekuiyaninabio, nu alimbania mutima wage, buni bunaba lutundo lua Kalaga mueli? 18Bana bane bakeke, tatutunde tugu mu kutenda, aba tugu ku lulami; tondo kuikitilo nu bulili. 19Ku kabamba kako tuamenyinine buno isue tuli ba bulili, nu kueli tukabobelezia mitima zeitu: 20kubuno ndi mitima zeitu zikutubezia, Kalaga eli munene kutinga mitima zeitu, nu we eizi binsania. 21Batundua bane, ndi mitima zeitu tazikutubezia, nti tuli na bupuka ku Kalaga; 22nu kinsania kitukusega nti atukasekio, kubuno tuanza makakizio mage nu kukita bitondo biamutananizia. 23Nu lilino u ikakizio liage, buno tukatizie izina lia Muana wage Yesu Klisto, nu kutundana, anga buatukakizizie. 24Nuwe wanza makakizio mage nti eikile mu Kalaga, nu Kalaga mueli. Nu kububo tuizi buno eikile mutuli, ku Muuza watukasile.
Currently Selected:
1 Yoana 3: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
