1 Yoana 2
2
Bantu baKalaga Bekutabanga mu Mulembe Wage.
1Bana bane bakeke, namusanzila bitondo bibino buno tamukite musako wa buagi. Nu ndi muntu akita musako wa buagi, nti tuli na mukulumania ku Tateisue, Yesu Klisto weisanana: 2nuwe wenyene eli mukulumania ku misako zeitu za buagi, nu ta ku zeitu kankanka, tondo ku za ba kisi kinsania. 3Nu ku bubuno tuizi buno tumuizi, ndi tukuanza makakizio mage. 4Nuwe ukutenda buno eimuizi, nuwe ntakuanza makakizio mage; nti eli muza, nu bulili tabuli mueli; 5tondo wozo wanza idagi liage, nti lutundo lua Kalaga luasililila mueli lebelebe. Ku bubuno tuizi buno tuli mueli: 6we ukutenda buno eli mueli buamutunganana kuenda wenyene anga bubo buendaga.
7Batundua bane, nsikumusanzila kungo kukakizia, tondo kuko kutangi; kuko kukakizia kutangi kumuakakizibagua. 8Lingo, kungo kukakizia kunkumusanzila, kuli bulili kueli nu kumuli; kubuno kapilo katingile, nu kiengi kia bulili kiasila kusana. 9We ukutenda buno eli mu kiengi nuwe asombaga mubuto wage, eikile mu kapilo aba nu kano kaluma. 10We watunda mubuto wage eikile mu kiengi, takuli kiziki kia kuikuka mueli. 11Tondo we wasombaga mubuto wage ekile mu kapilo, nu nteizi kuakuenda, kubuno kapilo kamuziba meiso.
Bantu ba Kalaga Tabatunde Bitondo bia mu Kisi.
12Inyue, bana bakeke, namusanzila, kubuno misako zeinyu za buagi zasigililua ku kabamba keizina liage. 13Inyue, beisibo, namusanzila kubuno muamenyine wozo wabezaga mu kulinga. Inyue, basikila, namusanzila kubuno muakindile wozo mubi. Inyue, bana bakeke, namusanzila, kubuno muamenyine Isi, 14Inyue, beisibo, namusanzila kubuno muamenyine wozo wabezaga mu kulinga. Inyue, basikila, namusanzila kubuno muli na magala, nu idagi lia Kalaga lili mumuli, nu muakindile wozo mubi. 15Tamutunde kisi, aba bitondo bili mu kisi. Ndi muntu atunda kisi, lutundo lua Tatane taluli mueli. 16Kubuno binsania bili mu kisi, lutundo lua bumba bua buagi, nu lutundo lua meiso, nu luikotio lua kalamo, tabikutuka ku Tatane, tondo bikutuka mu kisi. 17Nu kisi kikutingaga na lutundo luakio; tondo we ukukita kusombola kua Kalaga, akikalaga ku nkiko zitanakuzinda.
Bantu ba Kalaga Bende na Menge ku Bantu Basomba Idagi lia Kalaga.
18Bana bakeke, zili nkungu za kuzinda; nu bubo bumungule buno musombi wa Klisto avua, aba kano kaluma basombi beingi ba Klisto basila kumonekako; ku bubuno tuizi buno zili nkungu za kuzinda. 19Batukile kutuli, tondo tababezaga ba kutuli; kubuno songo babezaga ba kutuli, songo bekeide neisue; tondo batukile, buno balolesibue buno ta bansania u ba kutuli. 20Nuinyue muabongezibue muambo na Wozo Wasililila, nu muizi binsania. 21Nsiamusanzide anga tamuizi bulili, tondo kubuno muizi, takuli buza bumozi bukutuka mu bulili. 22Nazi uli muza, ndi ta wozo watuna buno Yesu nteli Klisto? wozo u musombi wa Klisto, watuna Isi nu Muana wage. 23Na unsania watuna Muana wage nti nteli nelsi, nu unsania witabizia Muana, nti eli nelsi, 24Nubo bumungule mukulinga buikala mumuli. Ndi bubo bumungule mukulinga buikala mumuli, nti muikale mu Muana wage, nu mulsi, 25Lilino lili idagano liatulagile, u kalamo katanakuzinda. 26Namusanzide bitondo bibino ku kabamba ka babo bekutunda kumuengelela. 27Nuinyue, muambo wozo umuabongezibue nage uli mumuli, aba tamukuiyanina muntu amuigisie; tondo anga muambo wage wabegisia misagu za binsania, nu buli bulili, aba nu tabuza, nu anga buwamuigisizie buno muikale mueli. 28Kano kaluma bana bane bakeke ikalazi mueli, aba gakamoneka, tube na ngini, nu tatube na nsoni kueli mu kuvua kuage. 29Ndi muizi buno eli wisanana, menyazi buno muntu na muntu ukukitaga buisanana abutilue nage.
Currently Selected:
1 Yoana 2: NTKI57
Highlight
Copy
Compare
Share
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
