Liɛnɛsu 3
3
Wɛndi ende Etanda nda Saladisi
1Ende bokitomo ako Botingani wa Etanda nda Saladisi, sɔnɔkɔ mbo— Inde oyayali la Balimo bosambale ya Mungu la tolonge bosambale, Inde nd’aongi mbo— Iluwi nde bekeeli yaɛ; osotangomo mbo wende la liwawi, kongo ko osowa. 2Lambaka to, la kɔkɔmɛsɛkɛ ebitikali ebisambowa eoka itiɛnɛ bekeeli yaɛ mbo bisɔɔlwa nda baiso ba Mungu. 3Eokao enyelaka yao ebisoimel’aɛ la ebisokak’aɛ, litesaka yao la kalanganaka. Nde eya mbo otilambe, ani yeyaka end’aɛ kwa atoya wiya limɔ oitoluwa mbile eyekayeke lami end’aɛ. 4Nde okoyali nde la bamyɔ nda Saladisi ebatibebese bisinda yau la bɛkɛndɛkɛndɛkɛ amamwito lami ko la bisinda bifufu, eoka bengani nde.
5Inde oyatolonga, ewatesomoko ongoma la bisinda bifufu, la itiafanjeke lina liande nda lokasa loa loiko, nde yeaolaka lina liande oso wa Sango wami la oso wa bakitomo bande. 6Inde oyayali la litoi, okeke yao ebitoonga Bolimo la bitanda!
Wɛndi ende Etanda nda Filadelafia
7Ende bokitomo ako Botingani wa Etanda nda Filadelafia, sɔnɔkɔ mbo— Inde oyayali Botanu la wewe, ako Inde oyayali la lofungola loa Dawidi, la oyatoliola, angwɛnɛ boto atolia; la oyatolia, angwɛnɛ boto atoliola, Inde nd’aongi mbo— 8Iluwi nde bekeeli yaɛ, tɛnɛ ngo, oso waɛ isota bome eboliolomu nde, angwɛnɛ boto angɔmɔi kokɔkɔlɔ ndoliaka wao; iluwi imɔ mbo wende ko la bofoka sinyo kongo, nde osolitesa lioi liami la otianganye lina liami. 9Tɛnɛ ngo, itofaef’ino eba ɛsɔngɔmɛlɔ ya Satana ebasoonga mbo bende BaYuda, ani bati bau, nde bale la lolanga; tɛnɛ ngo, itoiyes’iyo mbo bayeke oyatulama se oso wa batindi baɛ, la mbo baluweke fololo mbo isosama aɛ. 10Eoka osokɔchaka lioi liami lia likɔkɔmɛlɛ, Imi imɔ yetinganaka laɛ nda mbile ya likoteli elisamboya ende bato ba wenda bototina ndoyakotela ebasoyala ono se. 11Itoya lisasaya, takuamelaka to yao ebile laɛ, mbo boto ataɔnɔkɔlɔ iyoyo shaɛ sha loiko.
12Inde oyatolonga, itosɛl’inde likole nda ndakɔ ya Mungu wami, la atilasekwek’imɔ omao la yelasɔnɔkɔ end’inde lina lia Mungu wami, la lina lia bokenge wa Mungu wami, boko Yelusaleme eyai ebotosulwa se nda Use ko ende Mungu wami, la lina eliyai liami angɛnɛ. 13Inde oyayali la litoi, okeke yao ebitoonga Bolimo la bitanda!
Wɛndi ende Etanda nda Laodikiya
14Ende bokitomo ako Botingani wa Etanda nda Laodikiya, sɔnɔkɔ mbo— Inde oyayali la lina liko Ongoma, ako Bokambesi wolendelomu la Liako lia eyakelomoko la Mungu, Inde nd’aongi mbo— 15Iluwi nde bekeeli yaɛ, mbo oti la bondiya, oti l’etao; ani imi kolɛmbɛ mbo oyaleke kwa la bondiya, kwa la etao. 16Nde ongoma, eoka wende la lotatambe, inga la bondiya inga l’etao, isambosɛndɛk’aɛ nda bɔnɔkɔ wami. 17Eoka mbo osoonga mbo— Imi yende lifoka la isosɔnja bieto la it’imɔ la boeno wa yeka, la eoka otiluwe mbo osowɛlɔmɔ ngandi ako aɛ, boto wa mbuwa l’iuwe, la botuku, la wase. 18Eokao isofumbes’aɛ mbo oyek’ende Imi oyasomba mbela ebisotanesomo la bösä mbo ofoteke wewe, la ndoyasomba bisinda bifufu yowataka la wɛli mbo sɔni ya wase ebole laɛ botɛnɛlɛ la ndoyasomba lisoo lia baiso, liolɔkɔ nda baiso baɛ mbo wɛnɛkɛ la wɛli. 19Imi isoimaka la isokucha ebatosamaka’mi osam’iyo; eokao yalaka la bofiili la kalanganaka. 20Tɛnɛ, isoemala nda bome la isotitaka bome kɔkɔkɔ; eyambo boto eoka limiki liami, la eliola bome, ani yɛɔtɔkɔ end’inde la yelaka lande bieka, la inde elaka amamwito lami.
21Inde oyatolonga, itofaefak’inde isosha shoyala se amamwito lami nda kɛka yami, kwa alongaka’mi angɛnɛ la kwa ayalaka’mi se amamwito la Sango wami nda kɛka yande. 22Inde oyayali la litoi, okeke yao ebitoonga Bolimo la bitanda!
Currently Selected:
Liɛnɛsu 3: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
