Liɛnɛsu 2
2
Wɛndi wa Masiya ende Etanda nda Efeso
1Ende bokitomo ako Botingani wa Etanda nda Efeso, sɔnɔkɔ mbo—
Inde oyaundi tolonge bosambale nda bosamba wande wa olome, oyatokɛndɛkɛndɛ atiteni ya bitalielo ya päka bosambale, Inde nd’aongi mbo—
2Iluwi nde bekeeli yaɛ la bonui wa likuwa liaɛ la likɔkɔmɛlɛ liaɛ, la mbo botikɔkɔlɛ ndwɛnɛ bato babe nde osokotela ebasoonga mbo bende batomomu ani bat’iyo la osotombol’iyo mbo bende la lolanga. 3Iluwi imɔ mbo osokɔkɔmɔ la bofiili la osotendela ebiwau ko l’eoka ya lina liami, angotatɛkwa bonui. 4Kongo ko, yende l’aɛ la loasɔ-lo, loko mbo osotamacha losamɔ loaɛ loa oso. 5Eokao, enyekelaka olo asokwel’aɛ se la kalanganaka la kelaka bekeeli eyakelak’aɛ ko oso. Nde otikele ongoma, ani yeyaka end’aɛ la yesukolaka etalielo ya päka yaɛ nda elela ya yao, sakolo ngo ko osokalangana. 6Kongo ko, wende la loasɔ-lo lolau, loko mbo osoiyela bekeeli y’eba Nikolaita, ebisoiyel’imɔ ko Imi wiyela yao.
7Inde oyayali la litoi, okeke yao ebitoonga Bolimo la bitanda. Yefaefak’inde oyatolonga, isosha sholaka tuma twa isandu sha loiko, esisoyala nda Paladiso ya Mungu.
Wɛndi ende Etanda nda Semuluna
8La ende bokitomo ako Botingani wa Etanda nda Semuluna, sɔnɔkɔ mbo—
Ewa oso, l’Ewa mbisa, oyawaka la oyauwaka liasi la loiko, Inde nd’aongi mbo— 9Iluwi nde bifembi yaɛ la mbuwa yaɛ, ani wewe wende lifoka, la limɔli elisomɔlɔkɔmɔ ino ko l’ebasoonga mbo bende BaYuda, ani bati BaYuda, kangä ɛsɔngɔmɛlɔ ya Satana. 10Owangëke to biale ebisambokesomo aɛ; tɛnɛ Bowanjeli ako Satana, asambokusha bamɔi banu nda bɔnyɔlɔlɔ mbo okotelomoko, limɔ botokaka bifembi ko bacho liu. Nde kɔkɔmɔkɔ nda lilendelu ko nda liwa limɔ yefaefak’aɛ iyoyo sha loiko. 11Inde oyayali la litoi okeke yao ebitoonga Bolimo la bitanda. Inde oyatolonga atiokesomoko wale wa liwa lia ambale.
Wɛndi ende Etanda nda Pelagamona
12La ende bokitomo ako Botingani wa Etanda nda Pelagamona, sɔnɔkɔ mbo— Inde oyaundaka ambɔtɛ wa fänga imbale ebiötu, Inde nd’aongi mbo— 13Iluwi nde olo ayali aɛ, ko olo ayali kɛka ya Satana; nde osokusamela lina liami ngwi la otiangane lilendelu liami ango nda mbile ya Antipa, boaoleli wami wa lilendelu, oyaolomoko sisi yanu, olo ayali Satana. 14Kongo ko yende laɛ la njasɔ bimyɔ, mbo wende la bamɔi omao ebasoimela liekesi lia Balaama oyaekesaka Balaka ndosɛlɛ litalɛ liokwesa bana ba Isalaele tolango mbo baleke bieka ebitambomu ende bɛfɔnɔ ya mungu la mbo bakeleke bolëfë. 15Ongoma aɛ wende imɔ l’ebasoimela liekesi lia eba Nikolaita; 16eokao kalanganaka, eya to mbo otikalangane, ani itoya end’aɛ lisasaya, la itonanaka la bato ana la ambɔtɛ wa bɔnɔkɔ wami. 17Inde oyayali la litoi, okeke yao ebitoonga Bolimo la bitanda! Yefaefak’inde oyatolonga ngo ko isosha sholaka Mana ebisoisama, la itofaef’inde itaatalɛ sifufu esitomu la lina liyai elitiluwe boto angɔmɔi, sakolo ko inde oyatɔɔlɔ liao.
Wɛndi ende Etanda nda Tuateila
18La ende bokitomo ako Botingani wa Etanda nda Tuateila, sɔnɔkɔ mbo— Wana wa Mungu oyayali la baiso kwa bösä wa loiloi la batindi kwa bosongo ebosofufolomo, Inde nd’aongi mbo—
19Iluwi nde bekeeli yaɛ la losamɔ loaɛ la liimeli liaɛ la lisungi liaɛ la likɔkɔmɛlɛ liaɛ la mbo bekeeli yaɛ ya mbisa bisolongela eya oso. 20Kongo ko yende laɛ la loasɔ-lo, loko mbo osomacha botomali ona ako Yesabele oyatangi nde mbo ale bɔtɔndɔli, mbo ekeseke bato, la mbo alimbeke bɛkɔwa yami bachweke bolëfë la baleke bieka ebitambomu ende bɛfɔnɔ ya mungu. 21Yafaefak’inde fofe mbo akalanganeke loasɔ loa nyongo yande, nde atilɛmbɛkɛ ndokalangana. 22Toka kɔni, itoinges’inde nda tange la loo amamwito l’ebatochwaka lande nyongo ko nda bifembi ya likama, sakolo ko batokalangana bekeeli yau; 23la yolaka bana bande la liömä lifi. Limɔ bitanda bitotina beluwaka nde mbo Imi yende Inde oyasotichaka baenyeli la betema ya bato la yefaefaka boto la boto wanu liɔli lioengana la bekeeli yanu. 24Kongo ko isoonga lanu ebamɔi nda Tuateila ebatiimele liekesi-li, ebatiluwe njasɔ ebisotangomo la bamɔi mbo njasɔ ya Satana ebiisomu mbii, imi mbo iitotaliel’ino bolito wasi, 25nde takuamelaka ko yao ebiimel’ino, ko nd’akayeke Imi. 26La end’inde oyatolonga la oyatolitesa bekeeli yami ko nda liko, yefaefak’inde isosha shokakalesa tukela ya wenda, 27la atokakales’iyo la isosola sha yeto la atoataka iyo kwa tei ya tɔlɔngɔ, ani asɔɔlɔ imɔ ko Imi, isosha ende Sango wami, 28la yefaefak’inde ilonge sha lisɔi. 29Inde oyayali la litoi, okeke yao ebitoonga Bolimo la bitanda!
Currently Selected:
Liɛnɛsu 2: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
