Liɛnɛsu 20
20
Satana lokandomo ko mbile yumwa ya likama
1Limɔ imi lɔɛnɛ bokitomo ani atosulwa se nda Use, inde lounda lofungola loa liöndo eliti la tunga la bɔnyɔlɔlɔ wa likama nda osamba wande; 2la inde lotukumela Likilɔ liko njɔ ya kwalakwala, eko Bowanjeli la Satana, la inde lokanda inde ngwi ko miaka ɛlɛfu. 3Limɔ bokitomo lokusha Satana tubu nda liöndo eliti la tunga, limɔ inde lolinjaka liao, inde losɔlɔnɛsɛ liao olikolo liande mbo atalimba imɔ tukela ya wenda kond’akasileke miaka ɛlɛfu. Mbisa yaamao loenganaka nde mbo afaikolomoko oko mbile sinyo.
4Limɔ imi lɔɛnɛ kɛka bifi la ebayalaka se ina, bafomoko isosha shoataka njasɔ ya bato, imi lɔɛnɛ imɔ belimo ya ebatenomoko kingo eoka ya likambesi lia Yesu la eoka ya lioi lia Mungu la ebatiasemolaka Nyama, angoko bɔfɔnɔ wande, l’ebatiatomoko chapa yande nda toangala la nda besamba yau. Iyo ana louwaka liasi la iyo lofomo isosha shokakalesa tukela amamwito la Yesu ko la miaka ɛlɛfu. 5Nde basi ebamɔi, ebawaka, iyo batiatauwaka konda akasileke miaka ɛlɛfu. Eli liende likuswi lia oso nda liwa. 6Bende la limɛngɔ finɛ, bende batanu bako ebasoyala nda likuswi lia oso nda liwa. Liwa lia ambale liti l’isosha end’iyo, kongo ko belayalaka nde bakanga ba Mungu la ba Masiya la belafomoko isosha shokakalesa tukela amamwito lande ko miaka ɛlɛfu.
Satana lofaikolomo limɔ inde kokushomo nda eliya ya bösä
7Limɔ akasileke miaka ɛlɛfu, Satana elafaikolomoko nda bɔnyɔlɔlɔ wande, 8la elakuswaka ndokalimbaka tukela ya bato nda bako banɛi ba wenda, bako Goga la Magoga, ndokasɔnja iyo nda bonano; loketi loau lole kwa eloa nyɛlɛ yoke ya balia. 9Iyo losɔngɔkɔmɔ nda bofalu wa wenda okalingela eyaelo ya bikuke ya ebatanu la bokenge ebosamomu. Limɔ bösä losekwa omolo nda use la wao losɛɛsɛlɛs’iyo fɛɛ. 10Limɔ Satana oyalimbak’iyo lokushomo nda eliya ya bösä la boele, olo ayalaka la Nyama la Bɔtɔndɔli wa bolimbake, limɔ belokesomoko biale la lowa la ocho konda layalaya.
Liatakomu lia balomboki batotina
11Limɔ imi lɔɛnɛ kɛka efi efufu, la Inde oyayali se nda yao, la use la se lokwa otili oso wa bɔmbɔ wande la elela ya yao etiɛnɛlɛk’imɔ. 12La imi lɔɛnɛ ebawaka, l’ebafi l’ebakɛkɛ lisanga, bemakali oso wa kɛka efi, limɔ kasa yaliolomoko. La Lokasa loasi loliolomoko, loko Lokasa loa Loiko; la ebawaka baatakelomoko njasɔ ko nda yao ebiasɔnɔmɔkɔ nda kasa, eoka ya bekeeli yau. 13La eliya ya balia lofetesa ebawelaka nda bao, la Liwa la Ewelo lokusokola ebawaka ebaingalaka nda yao limɔ baatakelomoko, boto la boto, eoka ya bekeeli yau. 14Limɔ Liwa la Ewelo lokushomo nda eliya ya bösä, liao liende liwa lia ambale, liko eliya ya bösä; 15la eyambo boto atiɛnɛlɛkɛ lina nda Lokasa loa Loiko, ani inde lokushomo nda eliya ya bösä.
Currently Selected:
Liɛnɛsu 20: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
