Liɛnɛsu 19
19
Loomalo nda Use eoka ya Losilo loa Babilona
1Mbisa yaamao, yokaka limiki lia likama kwa elia ekuke efi fafo nda Use, elitoonga mbo— Inekelaka Ngɛnɛ Mungu! Liuwesi la tala la bofoka bisoomana la Mungu, 2eoka baatakeli bande bengani nda la wewe; asofa ewa bolëfë ofi se oyabebesaka wenda-bo ko la bolëfë wande la Mungu nd’asokundel’inde bakila ba bɛkɔwa yande angɛnɛ! 3Limɔ iyo loonga imɔ liasi mbo— Inekelaka Ngɛnɛ Mungu! Bolilya wa lofecho loande botolila likolo ko layalaya! 4Biange kama imbale la anɛi, la eba liwawi banɛi lotulamela Mungu se, iyo losemol’Inde oyayali nda kɛka efi, iyo mbo— Ongoma, inekelaka Ngɛnɛ Mungu! 5Limɔ limiki elisokuswa nda kɛka efi loonga mbo— Inelaka Mungu wasu la kelekëlë, ino bɛkɔwa yande bitoti la ino ebasowangak’Inde, la bafi la bakɛkɛ lisanga. 6Limɔ imi loka eyoko kwa eya ekuke efi finɛ la kwa elia elundi ya tolimo twa balia kwa bilundi bifi ya use, yao loonga mbo— Inekelaka Ngɛnɛ Mungu! Eoka Ngɛnɛ Mungu wasu ale Bɔkɔta la Ngɛnɛ wa bofoka bototina. 7Toomaleke la toficheke limɛngɔ finɛ, totalieke ko Inde tala, eoka lisɔngɔni lia Wana wa bɔkɔkɔ lisoya la Bowai asokɔmɔnya inde angɛnɛ; 8la afomu nde isosha showata bisinda bilau ebilangalangu la bitanu, eoka bisinda bitanu-bi yengani la bekeeli ilau ya bato batanu.
9Limɔ bokitomo loonga lami mbo— Sɔnɔkɔ mbo, Bende la limɛngɔ bako ebasotomo lioi nda elambɔ ya lisɔngɔni lia Wana wa bɔkɔkɔ. La inde loonga imɔ lami mbo— Eba bende baoi ba wewe ba Mungu. 10Limɔ imi lokwa se nda batindi bande ndosemol’inde, nde inde loonga lami mbo— Otakelëke ani! Yende bokuwani laɛ la bitungani yaɛ ebasolitesa likambesi lia Yesu. Semolaka ko Mungu! (Eoka likambesi lia Yesu lile ko litina lia litɔndɔli.)
Bowangɔ wa Bita asɔɛnɛlɛ nda Use
11Limɔ yɛnɛkɛ Use bosoliolomo la tɛnɛ ngo, punda efufu, la Inde oyatalemi nda yao lotangomo lina liko mbo— Ewolendelomo la Momongo; la Inde nd’asoatakela njasɔ la atonanaka bita ko la liengani. 12Baiso bande bale kwa bösä wa loiloi, la nda botö wande awati beyoyo wike ya bɛkɔta, la lina elitomu lande litiluwomo la boto angɔmɔi sakolo ko Inde angɛnɛ. 13Awati kanjo eyetomu nda bakila la lina elisotangomo lande lile mbo— Lioi lia Mungu. 14La ngendi y’eba bita ya Use lotutak’Inde nda punda bifufu, la bawati bisinda bifufu ebilangemi la bitanu. 15Ambɔtɛ ewötu finɛ lokuswa nda bɔnɔkɔ wande mbo asweke tukela ya wenda la wao, la Inde nd’atokakales’iyo la isosola sha yeto; atomatakela tuma nda etwangelo ya bänä ba bolengi wa efango ya Mungu Ngɛnɛ wa bofoka bototi. 16Lina liande lisotomo nda kanjo la nda yɛlɔ yande, liko mbo— Bɔkɔta wa bɛkɔta la Ngɛnɛ wa Bangɛnɛ.
17Limɔ imi lɔɛnɛ bokitomo ɔmɔi oyemali nda liso lia use, la inde loamama la limiki lifi, inde loonga la nɔli bitotina ebitoungwaungwa nda atiteni ya use la se, inde mbo— Yauku oyasɔngɔmɔ nda elambɔ efi ya Mungu 18mbo oleke binyo ya komba ya bɛkɔta, la komba ya betoli oso ya bita, la komba ya bɛwangɔ, la komba ya punda, la ya ebatalemi nda punda, la komba ya toote tototina la bɛkɔwa, l’ebakɛkɛ l’ebafi lisanga.
Nyama la ebaiyani la Yesu basosɛɛsɛlɛ fɛɛ
19Limɔ imi lɔɛnɛ Nyama la bɛkɔta ya wenda, la ngendi yau ya bita, iyo losɔngɔkɔmɔ ndonana la Inde oyatalemi nda punda la ngendi yande ya bita. 20La Nyama loindomo kala amamwito la bɔtɔndɔli ona wa bolimbake oyakelaka bisisho oso wa baiso ba Nyama, biko bisisho eyalimbaka bato ana ebatomoko chapa ya Nyama la ebasemokolaka bɔfɔnɔ wande. Iyo ambale lokushomo ani bakowawa nda eliya ya bösä ebosoaakana la boele. 21Basi ebamɔi loolomo ko la ambɔtɛ wa Inde oyatalemi nda punda, ango ambɔtɛ ebosokuswa nda bɔnɔkɔ wande; limɔ nɔli bitoti lokanelo binyo ya komba yau.
Currently Selected:
Liɛnɛsu 19: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
