Liɛnɛsu 18
18
Lɔsɛɛsɛlɔ loa Babilona
1Mbisa yaamao, imi lɔɛnɛ bokitomo wasi ani atosulwa se nda Use, oyayali l’isosha sha likama la wenda loanyekema ko la bɔfɛkɔ wande. 2Limɔ inde loamama la limiki lia likama mbo— Bosoukwa! Bosoukwa, boko Babilona bokenge bofi! Bosokinjwa eyaelo ya belimo ebe la eisamelo ya belimo bitotina ya bɔwɛwɛ, la nɔli ya bɔwɛwɛ ebisoiyelomo la bato; 3eoka tukela bitoti bisomwa bänä ba bolengi wa bolëfë wande la bɛkɔta ya wenda-bo basotwana lande bolëfë l’ebatotimbaka bekalala nda wenda basofotaka ko l’eoka ya lifoka lia bieka ya bonuku wande.
Boimo wa Mungu bosofomo ende bato bande
4Limɔ imi loka limiki liasi, elisekwi nda use, elisoonga mbo— Sokwaka end’inde, ino bato bami, sokwaka mbo otasangana lande nda batwanelo bande la mbo otaaelo baömä bande; 5eoka batwanelo bande basoiya ko nda use la Mungu asoenyela libebesi liande. 6Sakanaka lande ko la bosakane ebososakana imɔ ko inde, la botalya wa bakaɔ bambale ba bekeeli yande; tumeselak’inde kɔpɔ imbale ya limwi elisomwes’inde bato. 7Kwa aomalak’inde angɛnɛ la kwa alak’inde bieka ya bonuku, kwani ɔlɛsɛk’inde biale la ndeli, eoka nda botema wande, inde nd’aongi mbo— Isoyala ko Bɔkɔta otomali, imi iti lotika la itiangoluwa ndeli.
8Eokao, ko la lise limɔi, baömä batoyel’inde, bako liwa la ndeli la londo, la atofyesomo ko la bösä; eoka Ngɛnɛ Mungu oyatoatel’inde njasɔ, ale ngo ko la bofoka. 9Limɔ bɛkɔta ya wenda ebatwaka lande bolëfë la ebalaka lande bilambɔ ya bonuku, beleelak’inde la befichelak’inde etondo ani akɛnɛk’iyo bolilya wa lofecho loande; 10bemalaka esika lande, eoka ya bɔwa wa bifembi yande la belelaka mbo— Aeko! Aeko! Bokenge ona wa likama, boko Babilona! Bakomyelo baɛ basoya ko nda saa ɛmɔi kongo.
11Limɔ ebatimbi bekalala nda wenda batolelaka la batowaka beuwe loasɔ loande, eoka angwɛn’imɔ boto bosomba biengo eyaesak’iyo nda biatɔ yau, 12biko eya mbela la bieto bifufu, la basasɛ ba loketi lofi, la tɔkɛikɛli twa bɔfɛkɔ la bisinda bifufu la yindo la bitɛlu ebilëfu finɛ, la tosandu twa bɔkɛsɛ la biengo ya fanda ya njɔku, biengo ebikelomu la tosandu twa loketi, l’ebitulomu la mbela la yeto, l’ebikelomu la batalɛ bafufu; 13la kalafulu la baningo ba baɛsɛ, la mwemwe yotumba, la ndɛmbu, la bänä la baita, la fufu la bangwindi, la mbolo la bɛkɔkɔ, la punda la bilutelo ya punda, la bɛkɔwa la bawawi ba balomboki.
14Tuma etotelu etwalɛmbɛk’aɛ la yɛmɛ finɛ, tososekwa end’aɛ, la bieka ya bonuku la biengo ya bɔfɛkɔ bisosɛɛsɛlɛl’aɛ, biitɔɛnɛl’imɔ liasi. 15Ebatimbi bekalala ya biengo-bi, ebasofotaka ko l’eoka yande, iyo beemakalaka esika eoka ya bɔwa wa bemusi yande; belelaka la bewaka nde beuwe, beongaka mbo— 16Aeko! Bomusi ende bokenge ona wa likama oyawataka bisindi bifufu l’ebitelu la yindo ebitomu bɔfɛkɔ wa mbela la basasɛ ba loketi la tɔkɛikɛli; 17ongoma bafoka bana bafi basosɛɛsɛlɛ ko la saa ɛmɔi kongo! La bakapitɛni ba biatɔ la ebatɔkɛkɛ kɛndɔ nda yao, la basali ba biatɔ ina ya lofofo l’ebatotimbaka bokalala nda eliya ya balia, iyo yaatotina loemakala esika, 18la ɛnɛk’iyo bolilya wa lofecho loande, iyo loamama, iyo mbo— ¿Boni to bokenge wengani nde la e-bokenge-bo bofi? 19Limɔ iyo lowɛlɛkɛ liunge nda betö yau, la alelak’iyo l’awak’iyo beuwe, iyo loamama mbo— Aeko! Bomusi ende bokenge ona wa likama, olo afotaka batotina ebayalaka la biatɔ ya lofofo ko l’eoka ya lifoka liande, ongoma bososɛɛsɛlɛ fɛɛ! 20Aɛ Use, omakalaka loasɔ loande, la ino ebatanu, la batomomu, la batɔndɔli, eoka Mungu nd’asokundel’ino ko end’inde ako Babilona!
21Limɔ bokitomo wa bofoka finɛ loila litalɛ lifi fafo la inde lokusha liao nda eliya ya balia, inde loonga mbo— Ko ongoma, Babilona boko bokenge ofi, bokushomoko la bolenge bofi la boitɔɛnɛl’imɔ liasi. 22La bamiki ba ebatoomaka bakwengu, l’ebatochwa bɛɛlɛ, l’ebatomaka befilingi la tofonge, batotina baitokomo imɔ liasi omolo eyaɛ; la angwɛn’imɔ bato b’elalaka ba wɛlï wa bɔfɔnɔ angɔmɔi kɔɛnɛlɛ imɔ liasi end’aɛ, la bosöngö la lokulu angokana imɔ liasi olo eyaɛ. 23Liangangi lia päka liitoangang’imɔ liasi la limiki lia liäla la bowai liitokomo imɔ liasi olo eyaɛ; eoka batimbaki bekalala baɛ bayalaka eb’isosha sha likama nda wenda-bo, la eoka tukela bitoti balimbomoko ko la basoo baɛ ba fɔnɔli. 24Bakila ba batɔndɔli la ba ebatanu la bakila ba batotina ebolakomoko nda wenda bɛnɛkɛlɛkɛ ko olo eyaɛ.
Currently Selected:
Liɛnɛsu 18: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
