Liɛnɛsu 17
17
Likachomu lia Ewa bolëfë l’ebasunganaka lande nda Babilona
1Limɔ ɔmɔi wa bakitomo bosambale ebaundaka biengo bosambale, inde loya oyaonga lami mbo— Yauku l’ono la itɔɛnɛs’aɛ lofomo se loa ewa bolëfë ofi, oyayali se nda sanganela ya baande wike; 2bɛkɔta wa wenda-bo basotwana lande bolëfë la bato ebayali nda wenda basowa bänä ba bolëfë wande.
3Limɔ inde lotola bolimo wami nda liɔmbɛlɛ, limɔ imi lɔɛnɛ botomali oyayali se nda bɔkɔngɔ wa nyama etelu eyetumesomu la baina ba lifekwani la nyama loyala la betö bosambale la baseke liu. 4Botomali lowata bisinda yindo la bitelu ebitomu bɔfɛkɔ wa mbela la basasɛ ba loketi la tɔkɛikɛli la nda bosamba wande inde lounda kɔpɔ ya loela eyetumi la bɛwɛwɛ la ifwe sha bolëfë wande; 5la nda iangala shande lina lotomo eliyali nde la litina eliisameli, liko-Babilona, bokenge ofi, nyango wa eba bolëfë la bɛwɛwɛ ya wenda. 6Yɛnɛkɛ botomali ona oyawaka bänä ba bakila ba ebatanu la ba ebasowela Yesu. La ɛnɛkɛ’mi wɛn’inde ongoma, imi lomwaala finɛ.
7Limɔ bokitomo loonga lami mbo— ¿Osomwaala eoka iye? Itoisoel’as litina lia botomali-bo la litina lia nyama oyasotolak’inde, ako nyama oyale la betö osambale la baseke liu. 8Nyama eyɛnɛk’aɛ wɛnɛ yao, eyayalaka, eyet’imɔ kwani, la esambosaowa nda liöndo eliti la tunga, la eyetɔkɛ okasɛɛsɛlɛ. Ebayali nda wenda batomwaala, bako ebatitomo baina nda lokasa loa loiko ko nda baakoelo ba wenda-bo, ani akɛnɛk’iyo nyama eoka ayalaka, la kwani at’imɔ la eyaka nde ono. 9Loasɔ-lo lole loa liluwani lia wɛlï; betö osambale yende föngo osambale olo ayali botomali se, 10bende imɔ ko bɛkɔta osambale. Bɔɔmwi bau basokwa se, ɔmɔi akoyali nde, wasi akayi kɔni, nde akayek’inde loenganaka lande ndoumwa ko mbile sinyo; 11la nyama oyayalaka la oyat’imɔ kwani, inde angɛnɛ ale ewa bonanɛi la ale wa eba bosambale, nde atɔkɛ okasɛɛsɛlɛ. 12La baseke liu ebɛnɛk’aɛ, bende bɛkɔta liu ebakafomu kɔni isosha shau nde bɛɔsɔkɔ isosha sha bɔkɔta ko saa ɛmɔi amamwito la nyama. 13Eba bende la botema ɔmwito la basofaefa nyama bofoka la isosha shau; 14benanaka nde bita la Wana wa bɔkɔkɔ, la Wana wa bɔkɔkɔ belongaka nde iyo, eoka Inde nd’ale Ngɛnɛ wa bangɛnɛ la Bɔkɔta wa bɛkɔta la ebasɔkɛsɛnɛ lande bende ebasotomo lioi, la ebasoaomo, la ebasokɔkɔmɛlɛ.
15Limɔ inde loonga lami mbo— Balia ebɛnɛk’aɛ olo ayali ewa bolëfë se, bende bato la bikuke la tukela ya wenda la baoi ba bato ba wao. 16La baseke liu ebɛnɛk’aɛ, la nyama imɔ, beiyanaka nde la ewa bolëfë la besɛlɛk’inde wase kwa isimo, belaka lokomba loande la befechak’inde la bösä; 17eoka Mungu nd’afak’iyo isosha nda betema yau shokela ko lisangi liande angɛnɛ ko la botema ɔmwito la ndofaefa nyama isosha shau sha bɔkɔta ko nd’akakɔchɔmɔkɔ baoi ba Mungu angɛnɛ. 18La botomali oyɛnɛk’aɛ wɛn’inde, ende bokenge bona bofi eboyali l’isosha sha bɔkɔta ndokakalesa bɛkɔta ya wenda-bo.
Currently Selected:
Liɛnɛsu 17: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
