Liɛnɛsu 16
16
Bakitomo bosambale lowɛlɛ baömä ba efango ya Manga se
1Limɔ imi loka limiki lifi elisosekwa nda Einelo ya Mungu, eliaongaka la bakitomo bosambale mbo— Kɛndɛkɛ la Wɛlɛkɛ biengo bosambale ya efango ya Mungu nda wenda.
2Bokitomo wa oso lɔkɛ, inde lɔwɛlɛ eengo yande nda wenda, limɔ balomboki ebayali la chapa ya nyama ena, l’ebasemolaka bɔfɔnɔ wande, iyo lowɛlɔmɔ bakülü ba bomusi finɛ.
3Limɔ ewa ambale lowɛlɛ eengo yande nda eliya ya balia, la bao lokinjwa kwa bakila ba boto oyasowa, la bitotina ebile la liwawi nda balia lowa.
4Limɔ ewa asatɔ lowɛlɛ eengo yande nda baande la tosoolo twa balia la bao lokinjwa ko bakila. 5Limɔ yokaka bokitomo wa balia, aongaka mbo— Aɛ wengani nde, Oyayali la oyayalaka, Aɛ Botanu eoka osoatela njasɔ ngo ko ongoma, 6mbo iyo ana ebasowɛlɛ bakila ba ebatanu la batɔndɔli se, osof’iyo imɔ ko bakila bomwa. Baondu nde ongoma! 7Limɔ imi loka limiki lia etumbelo ya lifaefi, elisoonga mbo— Eingo ko, Mungu Ngɛnɛ wa Bofoka Bototi, baatakeli baɛ bengani nde la wewe.
8Limɔ ewa anɛi lowɛlɛ eengo yande nda liso lia use, la liao lofomo isosha shofecha balomboki la bösä; 9limɔ iyo lofechomo la bösä wa likama, la iyo losɛɔkɔlɔ lina lia Mungu oyayali la isosha nda baömä-ba nde batiakalanganaka ndotalia Mungu tala.
10Limɔ ewa bɔɔmwi lowɛlɛ eengo yande nda kɛka ya nyama la yakakaelo yande lotufaka la lilima, iyo lotauna ndamɛ yau eoka ya bomusi; 11la iyo losɛɔkɔlɔ Mungu wa Use eoka ya bomusi wau la eoka ya bakülü bau, nde batiakalanganaka eoka ya bekeeli yau.
12Limɔ ewa liambɛ lowɛlɛ eengo yande nda liande lifi liko Eufalate la balia ba liao loömaka tau mbo mboka etonjelomoko bɛkɔta ebakatɛmwɛkɛ nda fangi ya ɛsɔswɛlɔ ya bonyanya. 13Limɔ imi lɔɛnɛ belimo isatɔ ya bɔwɛwɛ kwa bɔfɔnɔ wa batɔkɛ ebatokuswa nda bɔnɔkɔ wa Likilɔ la nda bɔnɔkɔ wa nyama la nda bɔnɔkɔ wa bɔtɔndɔli wa bolimbake; 14eoka bende belimo ibe ebitokelaka bisisho la ebitokakɛndɛ ende bɛkɔta ya wenda bototi okasɔnj’iyo nda bita ya lise lina lifi lia Ngɛnɛ Mungu wa Bofoka Bototi. ( 15Toka kɔni, itoya kwa wiya! Inde ale la limɛngɔ fuu oyatoyala la botengu ani atotingana la bisinda yande mbo atakɛndɛkɛndɛ wase la mbo sɔni yande ɛtɛnɛlɛ fololo.) 16La belimo losɔnja bɛkɔta nda elela eyetangomu nda lioi lia BaEbele mbo Ala-Mengedo.
17Limɔ ewa bosambale lowɛlɛ eengo yande nda bofalu wa use, limɔ limiki lifi lokuswa nda kɛka efi omolo nda Einelo ya Mungu, liao loonga mbo— Lososila to! 18Limɔ tobalibali lɔɛnɛlɛ, la bamiki ba bilundi lokana, la nyɛlɛ lotukatuka likama, lotitɛnɛlɛkɛ ongoma ko nda bayelo ba balomboki nda wenda-bo, litukatuki lina liaaka lia likama. 19Bokenge Bofi lotenana ko betuku bisatɔ la bekenge ya tukela ya wenda lowɛlɛmɛ se; Babilona bokenge bofi loenyelomo ko la Mungu ndofaefa wao kɔpɔ ya bänä ba efango ya bolengi wande. 20La besanga betotina lolɔmwalɔmwa la föngo angɔɛnɛlɛ imɔ. 21La mbula ya basasɛ bafi ba bolito wa litalɛ lifi lotɔnɔkɔ se ende bato la bato losɛɔkɔlɔ Mungu eoka ya liömä lia mbula ya basasɛ, litina mbo liömä lina liaaka liwau fafo.
Currently Selected:
Liɛnɛsu 16: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
