1 Yoane 3
3
Bana ba Mungu la Bana ba Satana
1Tɛnɛ ngo, aina losamɔ elosofaefa Sango efaef’iso mbo totangomoko bana ba Mungu; la twende ko ongoma! Litina elitiluweke eba wenda oluw’iso lile mbo batiluwek’Inde angɛnɛ. 2Ino basamomu, kwanikwani tole bana ba Mungu, nde bɔfɔnɔ ebokayalek’iso, bokɛnɛsɔmɔkɔ kɔni; kongo ko toluwi nde mbo akɛnɛlɛk’Inde, tolayalaka nde ko bɔfɔnɔ wande, eoka tolɛnɛk’Inde ani ayal’inde. 3Boto la boto oyale la iɛli-si eoka ya Masiya, atotanesa botema wande angɛnɛ, ani ayal’Inde angɛnɛ botanu.
4Boto la boto oyatotwanelo, ongoma asotefola Bikela; litwanelo lile ngo ko litefoli lia Bikela. 5La ino nd’aluwi mbo Masiya ɛnɛlɛkɛ nde mbo asokoleke batwanelo basu la mbo end’Inde angɛnɛ, angwɛnɛ litwanelo. 6Oyatoyalana lande, boto ona angotwanelo; oyatotwanelo ambo atiɛnɛ Inde la atiluw’Inde. 7Bana bami, omachëke mbo boto alimbek’ino. Oyakakeleke ko liengani, ambo ende boto wa liengani kwa ayali Masiya Ewa Liengani. 8Oyatokelaka batwanelo ambo inde ale wa Satana eoka Satana asotwanekelo ko nda liakoli; Wana wa Mungu nd’ɛnɛlɛkɛ ko la litina-li liko ndosɛɛsɛlɛsɛ ebisokelaka Satana. 9Boto oyaotomu nde la Mungu, aitokelaka batwanelo, eoka lokoto loa liwawi lia Mungu losotikala lande, limɔ aitokɔkɔlɔ ndokelaka batwanelo eoka asootomo ko la Mungu. 10Ko la e-litina-li losoɛnɛlɛ fololo l’ebale bana ba Mungu, l’ebale bana ba Satana; boto oyaitokelaka liengani, ambo ona ati wana wa Mungu, la oyatisame etungani yande imɔ ko ongoma. 11Wɛndi ebokak’ino ko nda liako, bole ngo ko mbo tosamaneke; 12angoyala kwa ayalaka Kaina oyaaka wana w’Oyo Bobe la oyaolaka etungani yande. ¿Aokal’inde litina moni? Eoka bekeeli yande angɛnɛ yaaka bibe, la eya etungani yande yaaka ko eyengani.
Losamɔ lole ndembe ya bana ba Mungu
13Bitungani yami, omwalëke eya mbo eba wenda-bo beiyana lanu; 14iso nd’aluwi mbo tososekwa nda liwa okakwa nda liwawi, eoka mbo tososama bitungani. Oyati la losamɔ, ambo akotikali nda liwa. 15Boto oyasoiyana la etungani yande, ambo inde ale booli wa boto, la oluwi nde mbo booli wa boto ati la loiko loa layalaya lotikala nda botema wande. 16Ko la litina-li, tosoluwa losamɔ, mbo Masiya amachaka liwawi liande ndowel’iso; ongoma lole loasu ndomacha liwawi liasu ndowela bitungani yasu. 17¿Nde boto eyala la biengo ya wenda-bo la inde kɔɛnɛ etungani yande la boeno la eliekelak’inde botema wa shota, ani losamɔ loa Mungu koyala nda botema wande la moni? 18Bana bami, tosamaneke, nde inga ko la lioi, ango ko la bɔnɔkɔ kongo, kangä ko la bekeeli la wewe.
19Ko la litina-li toluwi nde mbo twende bana ba wewe, la tosɔɔngɛsɛ betema yasu nda baiso bande, 20ani betema yasu angɛnɛ bitof’iso se; eoka Mungu nd’alongeli betema yasu la aluwi nde bitotina. 21Basamomu, eya mbo betema yasu bitif’iso se, ani tosoyala la lotendela lolau ende Mungu, 22limɔ yeka eyekafelek’iso, totɔɔlɔ yao end’Inde eoka mbo tosolitesa bikela yande la tosokelaka ngo ko yao ebisɔɛnɛlɛ bolau nda baiso bande. 23Eye yende ekela yande, mbo tolendeloko lina lia Wana wande, ako Yesu Masiya la mbo tosamaneke kwa atelak’Inde etel’iso ekela. 24Boto oyatolitekesa bikela yande, ambo asoyalaka lande la Inde asoyalaka la boto ona; limɔ ko la loasɔ-lo toluwi mbo atoyalaka lasu, ko la Bolimo oyafak’Inde efaef’iso.
Currently Selected:
1 Yoane 3: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
