1 Yoane 4
4
Lembeelaka bolimo wa wewe la bolimo wa bolimbakeli
1Basamomu, wimelëke balimo batoti, kɔtɔlɔkɔ bao oluweke kwa mbo basoyala ba Mungu; eoka batɔndɔli ba nanga wike basokakɛndɛlɛ wenda-bo. 2Otolembeela Bolimo wa Mungu ko ano; bolimo oyatoaola mbo Yesu Masiya asoya nda bindo ya boto, ambo bolimo ona bole wa Mungu; 3nde bolimo oyaitoaola Yesu, ambo bolimo ona boti wa Mungu, la wao wende wa Bofekwani la Masiya, ewokak’ino mbo botoya nde, la kwani bole oko nda wenda-bo. 4Nde ino, bana bami, wende ba Mungu la osolongela iyo, eoka Inde oyale nda betema yanu, ale ofi wolonga inde oyale nda wenda. 5Iyo bende ba wenda-bo, eokao batoonga ko yao ebisekwi nda wenda la wenda botokak’iyo. 6Iso twende bana ba Mungu, Inde oyaluwi nde Mungu, Inde nd’atokak’iso. Ko la litina-li, tosoluwa bolimo wa wewe la bolimo wa bolimbakeli.
7Basamomu, tosamaneke, eoka losamɔ lososekwa ende Mungu, la boto oyatoyalaka la losamɔ, aotomu nde la Mungu la aluwi nde Mungu. 8Boto oyatiyaleke la losamɔ, atiluwe Mungu; eoka Mungu ende Losamɔ. 9Losamɔ loa Mungu losɔɛnɛlɛ end’iso ko la loasɔ-lo, loko mbo Mungu atomaka Wana wande ɔmwito nda wenda-bo, litina mbo tɔɔlɛkɛ loiko ko lande. 10Losamɔ loa wewe losɔɛnɛlɛ ko la loasɔ-lo, inga mbo iso nd’asamaka Inde, kangä mbo Inde nd’asamak’iso la mbo atomaka Wana wande mbo ayaleke Likambi lioendol’iso loasɔ loa batwanelo basu.
Losamɔ loa wewe lotosokokola bɔwa
11Basamomu, eya mbo Mungu asosamak’iso ongoma, ani lole loasu ndosamakana imɔ. 12Angwɛnɛ boto angɔmɔi nd’ɛnɛkɛ Mungu lise ango limɔi; eya mbo tosamakana, ani Mungu koyalaka lasu la losamɔ loande lotɔɔlwa nda betema yasu. 13Ko ongoma, tosoluwa mbo tosoyalaka lande la Inde imɔ ko lasu eoka mbo asofaef’iso Bolimo wande. 14La iso nd’asɔɛnɛ la tosoonga fololo mbo Sango atomaka Wana wande ako Bouwesi wa wenda-bo. 15Boto oyakaaoleke mbo Yesu ende Wana wa Mungu, ambo Mungu angɛnɛ asoyalaka nda botema wande la inde asoyalaka ko ende Mungu. 16La iso nd’aluwi la tosoimela losamɔ elososamaka Mungu esamak’iso. Mungu ale ngo ko Losamɔ la boto oyasoyalaka ngo nda losamɔ, ambo asoyalaka ngo ende Mungu la Mungu imɔ ko end’inde.
17Nda loasɔ-lo losamɔ loasu losɔɔlwa mbo toyaleke la lotendela lolau nda lise lia liateli lia njasɔ eoka tosoyala kwa ayali imɔ ko Inde nda wenda-bo. 18Nda losamɔ angwɛnɛ bɔwa, nde losamɔ elosɔɔlɔlɔ lososokola bɔwa fwa, eoka bɔwa bole ko loasɔ loa likuchaki la oyasoka bɔwa, akaɔlwi ndoka losamɔ. 19Iso nd’asosamaka, eoka Inde nd’asamak’iso ko oso. 20Eya mbo boto eonga mbo— Isosama Mungu, ani asoiyana la etungani yande, ambo ale la lolanga; eoka inde oyatisame etungani yande oyasɔɛn’inde, ambo atikɔkɔlɛ ndosama Mungu oyatiɛnɛk’inde. 21Limɔ tole la ekela-ye eyatak’Inde, eko mbo— Inde oyasosama Mungu, asameke imɔ ko etungani yande.
Currently Selected:
1 Yoane 4: NTKE58
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament in Kele (Lokele) © British and Foreign Bible Society, 1958, 2019.
