Ba-Loma 9
9
1NSANGA nsosolo ele Masiya, mpofombe, ko juge e’otema’okami ayosange l’emi ele Bolimo w’olotsi, 2wae nde la lokeseli’ouke ko l’eefe nd’otema’okami nko jomo. 3Njalema nga ndanga wae emi mongo njale anatema, ko ndene la Masiya ndalena nd’eloko ea balongo’akami basangi l’emi nd’ooto; 4bako bale Ba-Yisalaele, bandilami nda mpifo e’ana, ko bale la jilangi ko la bekolo bia ndalemba, ko la bisekyelo, ko l’ekambelo ea Nzakomba, ko la bilaka; 5Baise wae bakiyo, koko Masiya ayaki nda jonge lim’el’iyo, ende ondekol’auma, omemyama la Nzakomba bikeke la bikeke, O ngoko.
6Lolo afa nga joi ja Nzakomba joyalema mpampa. Ele bas’eka Yisalaele bauma bafa Ba-Yisalaele; 7koko bak’auma bafa bana mongo, el’iyo bale nd’ooci wa Abalayama: lolo, Booci wa bana’akawe wifoandema lim’ele Yisaka. 8Eleng’ene, bana ba jonge bafa bana ba Nzakomba: lolo bana b’elaka baotangema bana mongo. 9Ele line lile joi j’elaka wete, Njifoya ngole ekek’ene, ko Sala ifoota bona owa jende. 10Koko afa ngoko kika, lolo aki Lebeka ofoswaka jemi la bonto, wae ise ekiso Yisaka— 11aki bana batafootswa, ko batafokela bolotsi la bobe, wae wango wa Nzakomba eleng’ele esonelo bokemame, afa l’elemo bia nkakamba, lolo l’ende ondeta, 12joi josangema el’ende, Botomolo ifosalela bokune. 13Eleng’ele joi jokotama, Ndokaki Yakoba eefe, lolo ntonaki Esau.
14Lim’ako tokele mo? Nzakomba asamba nde liongi? O nye. 15El’ende aokela Mose, O em’ok’isei, njifok’ende isei: ko o em’oka liota, njifok’ende liota. 16Eleng’eko, afa lim’el’ende olanga, ko afa lim’el’ende ondikumwa, lolo lim’ele Nzakomba ondok’isei. 17Ele bonkanda wa Nzakomba bokela Falo, Nkemazaki we nd’ewela ene, wete njeneya la we mpamba ekami, ko losumo ja lina likami jongwane nd’okili bouma. 18Eleng’eko, o end’olanga wae ok’ende isei, aolook’isei: ko o end’olanga wete acilinganya botema, aolocilinganya botema. 19Nkako wifonkel’emi, Akongofela lofeli lae? Osuka wango bokae na? 20O nye; lolo we bonto ondikya Nzakomba bikoli, w’ole na? Bolemo bondemami bokelaka ondemaki, We onjemak’emi eleng’ene lae? 21Wemi owa mpoke afa la mpifo ele iyomba, wae aeme lima boonda bomoko emo mpoke ea lokumo, ko l’enkina esamba lokumo? 22Lolo nga Nzakomba alanga aeneya nkele ekae, ko aeanya mpamba ekae, ko aolik’otema l’isei ya loncinji mongo nd’ewela ea mpoke ya nkele indeji la lofito: 23ko nd’ewela wae aeanya bomengo wa jilangi likae ele mpoke ya isei ikande iki’nd’oezaka nda joso ele jilangi, 24wae iso baki’nd’oetaka, afa lim’ele Ba-Yuda kika, lolo lim’ele Bafaya o ngoko? 25Ngoki’nd’okelaka nd’onkanda wa Osea,
Iyo bataki bant’akami, njifatang’ako bant’akami;
Ko l’ende otalangemaki, njifotang’ende olangema.
26Koko joi likelam’olo, nd’itenela ik’iy’okelak’iyo, Inyo lofa bant’akami,
Nk’eko bifotangema bana ba Nzakomba oyoike.
27Koko Yesaya aobeleza nd’eloko ea Yisalaele, Ayaka boanji wa bana ba Yisalaele bole ngole bekongo bia ntando ea nene, oik’olo ncika ekiyo kika: 28ele Yawe ifokela joi likande nd’okili, asiza ko asukeza nkako. 29Ko ngoki Yesaya okelaka nda joso,
Nga Yawe ea Sabota ntatocikelak’iso ncika e’anto nd’ooci,
Sik’iso toyalemaki ngole Sodomo, ko tosonganaki l’Amola.
30Lim’ako, tokele mo? Wete Bafaya batakimanaki la liongi baata liongi, wae liongi j’imeezo: 31lolo Ba-Yisalaele, bakimanaki l’esekyelo ea liongi, ntabakita nd’esekyelo eko. 32Lae? Ek’iyo ntabasaka l’imeezo, lolo baki nga basa l’elemo bia bisekyelo. Baokunumwela ekenje ea nkunumwela; 33eleng’ele joi jokotama,
Bala, njambya nda Siona ekenje ea nkunumwela ko l’ekenje ele nga lotuta j’ilonga:
Ko bonto ondimez’ende afaoka nsoi.
Currently Selected:
Ba-Loma 9: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
