Ba-Loma 8
8
1ND’EWELA eko, aeyoko iy’al’ele Masiya Yesu bafa l’umbelo. 2Ele bisekyelo bia Bolimo wa loiko ele Masiya Yesu bionsikola lim’esekyelo ea bobe Tea iwa. 3Eki bolemo boki bisekyelo ntabikambeya, wae biko biki ingoi nd’ewela ea jonge, Nzakomba aokamba boko. Atomaki Bona’okande owa jende nd’esonganya ea jonge j’obe, nd’eloko ea bobe, ko umbaki bobe nda jonge: 4wae bosise wa bisekyelo bokelame el’is’afokime elenge ea jonge, lolo toyokime elenge ea bolimo. 5El’iy’akima elenge ea jonge bakanela baoyi ba jonge: lolo iy’akima elenge ea bolimo bakanela baoyi ba bolimo. 6Ele nkanela ea jonge ele wete iwa: lolo nkanela ea bolimo ele wete loiko ko la kuci: 7nd’ewela wae nkanela ea jonge ele jino ele Nzakomba; el’eko efofike bisekyelo bia Nzakomba, ko efofikeya: 8ko iy’ale nda mpifo ea jonge bafokyeya Nzakomba ekemo. 9Lolo inyo lofa nda mpifo ea jonge, lolo ayaka Bolimo wa Nzakomba ayal’el’inyo, lol’ele Bolimo. Nkina bonto afa la Bolimo wa Masiya, af’owa Masiya. 10Koko ayaka Masiya al’el’inyo, jonge jowa nd’ewela ea bobe: lolonde bolimo boyoike nd’ewela ea liongi. 11Lolo ayaka Bolimo’okande oetolaki Yesu lim’ele bawei ayal’el’inyo, ende oetolaki Masiya Yesu lim’ele bawei ifoetola baonge’akinyo b’iwa wae baike nd’ewela ea Bolimo’okande oyal’el’inyo.
12Nd’ewela eko, balongo, iso tole l’embale, af’iso tole la bombale wa jonge wete tokimane l’elenge ea jonge: 13ayak’inyo lokimana l’elenge ea jonge, lifowa; lolo ayaka looma beketo bia jonge la Bolimo, lifoika. 14El’iy’alakema mboka la Bolimo wa Nzakomba, bako bale bana ba Nzakomba. 15Ek’inyo ntalambaki bolimo wa likwala wae loange lenkina: lolo lambaki bolimo wa mpifo e’ona, ko tobeleza l’oko, Aba, Fafa. 16Ende mongo wae Bolimo aoamana l’olimo’okiso nda nsasanga wete iso tole bana ba Nzakomba: 17ko ayaka tole bana, tole basangoli; basangoli ba Nzakomba, ko toamana bolongo la Masiya nda lisango; ayaka ten’elo l’ende, wae tifoamana l’ende nda jilangi likae.
18El’emi ntanga nde bielo bi’ekek’ene e’aeyoko bifeji losongana la jilangi lindeny’olo el’iso. 19Ele lolendezo londendeza belemo bendemami la mposa mongo loyolendeza enyelo ea bana ba Nzakomba. 20Eki belemo bendemami oilamaka nda likwala j’efitanelo, afa la ndalanga ea beko mongo, lolo nd’ewela ekande ondilaki beko, la lolendezo, 21wae belemo mongo bendemami besikw’olo lima likwala j’efondelo nd’esikwelo ea jilangi ja bana ba Nzakomba. 22El’iso tea wete belemo bendemami beuma beyomeke limeko, ko beyolomatswa bolongo o l’aeyoko. 23Koko afa ngoko kika, lolo iso mongo baata bamuka ba joso ba Bolimo, iso toyomeke limeko nd’etema’ekiso, tolendeza ilamelo e is’oilama nda mpifo e’ana, wete esikwelo ea jonge likiso. 24Ek’is’oikaka la lolendezo; lolo lolendezo londenya lofa lolendezo: joi linden’onto, aut’olendeza lenkina lae? 25Lolonde nkina tole la lolendezo ja joi lif’is’oene, tolendeza liko la loncinji mongo.
26Nk’eleng’eko Bolimo botokambya nda tongoi tokiso: el’iso tofea elenge e is’oonda: lolo Bolimo mongo ayoonde nd’eloko ekiso la bameko batatefelamaka; 27ko ende ondengela betema aolea lokai ja Bolimo, nd’ewela wae ende ayoonde nd’eloko ea ba-boeko eleng’ele wango wa Nzakomba. 28Koko iso tolea wae baoyi bauma baaman’olongo wete bakambe belemo bi’olotsi nd’eloko ekiyo bandoka Nzakomba eefe, wae iy’andetama l’etelo eleng’ele wango’okae. 29Baki’nd’eaka nda joso, asonaki bako ngoko nda joso, wae iyo basongane l’esonganya ea elenge ea Bona’okae owa jende, wet’ende ayaleme nsomi ea bakune’auke; 30koko ende aetak’iyo baki’nd’osonaka nda joso: ko ayengolak’iyo baki’nd’oetaka: ko bako baki’nd’oyengolaka, aolaila nda mpifo ea jilangi.
31Lim’ako, joi li is’otefela nd’ewela ea baoyi’ane na? Ayaka Nzakomba ale l’iso, otosuka isuki na? 32Ende otafekaki la Bona’okande mongo owa jende, lolo aololekya nd’eloko ekis’auma, la afaotokaya l’ende toma touma l’oya ngamo? 33Os’oaka basonami la Nzakomba likambo ale nko? Oyengola boyengo wae Nzakomba; 34os’oumba na? Masiya Yesu owaki, onde, ko aetswaki lenkina lim’ele bawei, ko ale nda wiji wa likata ja Nzakomba j’elome, ko ayoonde nd’eloko ekiso. 35Os’otolenola lim’eefe etoka Masiya na? L’elo, l’okambo, l’onyoko, l’eto ea nzala, la botaka, la ntutama l’iwa, l’ifaka y’etumba nde? 36Ngole joi jokotama wae,
Toomama mbile-mbile nd’eloko ekawe;
Totangema nga mpate indeji l’eomelo.
37Lolonde tolekola lolonga nd’aoyi’ane bauma l’ende otokak’eefe. 38El’emi ndimeza wae iwa, la loiko, la bikima bia loola, la mpifo ya jilangi, la baoyi bal’aeyoko, la baoyi bay’olo, la mpamba, 39la lisangi, la njindo, l’om’olemo bondemami nko loswele, bak’auma bafaokusa lotolenola lim’eefe etoka Nzakomba el’ele Masiya Yesu Nkolo ekiso.
Currently Selected:
Ba-Loma 8: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
