Ba-Loma 7
7
1BALONGO, (ntefela el’anto bandea bisekyelo), kamb’inyo lofea wae bisekyelo bile la mpifo el’onto nk’aik’ende kika? 2Bomoto ole l’ome aotungama ele bome’oko la bisekyelo nk’aika bome; lolo ayaka bome aowa, ende aotungwa lima bisekyelo bindotungyaki ele bome. 3Ayaka bome ayoike, ko bomoto aocwa oamana la bont’onkina, ende ifotangema bomoto owa jibi: lolo ayaka bome aowa, bomoto aotungwa lima bisekyelo, ko mpeka la aamane la bont’onkina, afa bomoto owa jibi. 4Nd’ewela eko, balongo’akami, inyo lowaki ele bisekyelo nda jonge ja Masiya: wae loamane la Onkina, wete l’ende oetswaki lim’ele bawei, wae iso tocw’ele Nzakomba bamuka. 5Ak’iso nda jonge, mposa ya bobe iki nd’ewela ea bisekyelo ikambaki belemo nda bilama bikiso wae icw’amuka nd’iwa, 6Lolo aeyoko totungwa lima bisekyelo, towaki el’eko etokitaki; nd’ewel’eko, tosale nda bolimo w’aeyoko, afa nd’elenge e’onkanda wa kalakala.
7Lim’ako, tifokela mo? La bisekyelo bile bobe nde? O nye. Nko bisekyelo, siki ncea bobe; ng’esekyelo emo ntekela, Tawokake mposa ileki, siki ncea ndooka ea mposa ileki: 8lolo bobe botan’elekelo, ko bondokya mposa ya bilenge biuma nd’ewela ea esekyelo eko: lako bisekyelo, siki bobe bole nd’iwa. 9Emi mbikaki nda joso nko bisekyelo: lolo aki bosise oyaka, bobe boetswa, ko emi mbwaki; 10koko bosise bondielaka nda loiko, lolonde emi ntanaki boko boliela nd’iwa. 11Eki bobe otanaka elekelo, ko bonjongaki nd’ewela ea bosise, ko bombomaki la boko. 12Nd’ewela eko, bisekyelo bile boeko, ko bosise bole boeko, ko la liongi, ko l’olotsi. 13Kamba boko bol’olotsi boyalem’iwa el’emi? O nye. Lolo bobe bokambak’olemo w’iwa el’emi la boko bol’olotsi, wete bobe wenya bole nko bobe; —wae bobe boyaleme bobe mongo bondekola nd’ewela ea bosise. 14El’iso tea wae bisekyelo bile bi’olimo: lolo emi nde owa jonge, ndekyama nda likwala ja bobe. 15El’emi mpea bolemo bokamb’emi; ko bolemo bolang’emi, njokambe boko: lolo boton’emi, njokambe boko. 16Lolo nkina njokambe bolemo bof’em’olange, ndimeza wete bisekyelo bile bolotsi. 17Ko aeyoko afa lenkina emi okamba bolem’oko, lolo bobe boko boyal’el’emi. 18El’emi njea wae boketo w’olotsi bofoyal’el’emi, wete nda jonge likami: ndalanga el’el’emi, lolo nkakela e’oketo w’olotsi ef’eko. 19Ele bolotsi bolang’emi, mpokele; lolo bobe bof’em’olange, njokambe boko. 20Ayaka njokambe bolemo bof’em’olange, afa lenkina emi okamba, lolonde bobe boyal’el’emi. 21Ko njena esekyelo eleng’ene wae, alang’emi nkele boketo w’olotsi, bobe bol’eko. 22El’emi ndok’ekemo la bisekyelo bia Nzakomba nd’otema; 23lolo njen’esekyelo e’elenge enkina nda bilama bikami, eko eyoun’etumba la esekyelo ea lokai lokami, ko eko eyonkande loanga wae njale nda jombo j’esekyelo ea bobe ele nda bilama bikami. 24Emi bonto onden’elo oyei! Os’ontungol’emi lima jonge ja iwa ine na? 25Nsima Nzakomba la Yesu Masiya Nkolo ekiso boya. Lim’ako eleng’ene, emi mongo nsaela bisekyelo bia Nzakomba la lokai lokami, lolo nsael’esekyelo ea bobe la jonge likami.
Currently Selected:
Ba-Loma 7: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
