Ba-Loma 3
3
1BO-YUDA aolekol’ant’auma la na? ko nkito ea ntatena ea nsonge ele na? 2Bouke wa bilenge la bilenge; nda joso wete baoyi ba Nzakomba bakaemaki el’iyo. 3Ko nkina bam’akiyo ntabimeza mo? bosamba’okiyo w’imeezo wifooma nde nsosolo ea Nzakomba? 4O nye; onde, kela Nzakomba ayale nsosolo, lolo wengi’onto ayale bofombi; eleng’ele joi jokotama,
Wae oyengwa nd’aoyi’akawe,
Ko ae w’oya nd’etenelo e’akambo, olonge.
5Lolo nkina bosamba’okiso wa liongi bofolaza liongi ja Nzakomba, tifokela mo? kamba Nzakomba osombola nkele asamba liongi? (Ntefela elenge ea bonto). 6O nye; nkin’ele ngoko, Nzakomba aten’akambo b’anto b’okili ngamo? 7Lolo nkina nsosolo ea Nzakomba eokaka el’imemya ikande nd’ewela ea joi liki’m’ofombaka, emi ndumbama likambo nga bonto ow’obe lae? 8ko tofokele, (eleng’ele benkindo bia mpafata, ko ngole bamo basanga wete iso totelela ngoko), Kel’iso tokel’obe wae bolotsi wiele? Umbelo ekiyo eji o njelama.
9Limo na? Iso tolalekola nde nd’olotsi? Afa ngoko, o nye; ek’is’oakaka nda joso Ba-Yuda la Ba-Elene wae bale nd’obe, nk’iy’auma; 10eleng’ele joi jokotama,
Nk’onto ole la liongi, nko l’omoko o nye:
11Nk’omo okotola,
Nk’ondasa Nzakomba;
12Iy’auma baolunga, baoyalema banto basamba nkito, iy’auma;
Nk’okela baoyi b’olotsi, nko l’omoko o nye;
13Bongongo bokiyo bole boomba bokombwa:
Baofomba la ndeum ikiyo;
Ngenge ea njwa ele nd’ase ba mbebu ikiyo;
14Bomwa’okiyo bokama la bitoli la baoyi ba jino;
15Bakaka’akiyo bale la loangu oom’anto;
16Lofito l’elo bale nda mboka ikiyo;
17Ko ntabeaka mboka ea kuci;
18Boangi wa Nzakomba bofa nda joso ja baiso’akiyo nye.
19Lolo tea wae wengi baoyi nko loswele bakela bisekyelo, biko bikel’iyo bale nda mpifo ea bisekyelo: wete wengi’omwa boumbame, ko ba bokili bauma bumbame nd’umbelo ea Nzakomba; 20nd’ewel’eko, nk’onto oyengwa nda joso likande la belemo bia bisekyelo: ele bobe weana la bisekyelo. 21Lolo aeyoko liongi ja Nzakomba jolenya nko bisekyelo, ko bisekyelo la bateli basanga liongi liko; 22wae liongi ja Nzakomba lindiela l’imeezo ele Yesu Masiya el’iy’andimeza bauma; nk’ecikwanelo; 23ele bant’auma baokwa nd’obe, ko baosamb’imemya ya Nzakomba; 24baoyengwa boyengo l’oya’okande wa nganji, la nsiko el’ele Masiya Yesu: 25oki Nzakomba olekyaka wae ayale nga mbeka ea eamanyelo, l’imeezo nd’alongo’akaude, wete aeney’anto liongi likande, eki’nd’ofenzaka baoyi’obe baiso, wae bako bakelamaki nda joso, nd’isei ya Nzakomba ya ntatemya: 26nkela nde, wete aeney’anto liongi likande nd’ekek’ene e’aeyoko, wae ende mongo ayaleme owa liongi, ko la boyengoli ow’onto ondimeza Yesu. 27Ekumyelo e’amongo ele nko? Eolimana. La bisekyelo bia na? Bia belemo? O nye; lolo l’esekyelo ea imeezo. 28Nd’ewela eko, totanga wae bonto ayengwa boyengo l’imeezo kika, afa l’elemo bia bisekyelo. 29La Nzakomba ale Nzakomba ea Ba-Yuda kika? ende afa Nzakomba ea Bafaya o ngoko? Onde, ale Nzakomba ea Bafaya o ngoko: 30nga Nzakomba ale nk’emoko, ko ende ifoyengola batenama nsonge l’imeezo, ko la bafotename nsonge l’imeezo. 31Tooma nde bisekyelo l’imeezo? Afa ngoko, o nye; tokemya bisekyelo.
Currently Selected:
Ba-Loma 3: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
