Ba-Loma 14
14
1LAMB’ONTO ol’ingoi nd’imeezo, lolo afa wae losiz’akambo ba bikoli bi’onto. 2Bont’omo ale l’imeezo wae ale toma touma; ko onkina ol’ingoi ayole nko njunda kika. 3Kel’ende oleka afotengwel’ende ofole; ko kel’ende ofole afumb’ende oleka, ele Nzakomba aoloamba. 4We, ondeza baoyi ba bosali ow’ont’onkina, w’ole na? L’emalaka, l’akweka, likambo ja Nkolo ekande mongo. Onde, ko ifemala; ele Nkolo ale la mpamba wae oemaza. 5Bont’omo atangaka wete mbil’emo eolekol’enkina, bont’onkina atangaka bembile beuma bele o fio. Kela wengi’onto afonga jea ezelo ea joi liko nda lokai lokande mongo. 6Ofikaka mbile loswele, afikelaka Nkolo mbil’eko: ko ende oleka toma, aleka ele Nkolo, el’ende asima Nzakomba boya; ko onkina ofole toma, afole ele Nkolo, ko asima Nzakomba boya. 7Nk’ont’okiso ayoike el’ende mongo, ko nk’onto aowa el’ende mongo. 8Ayaka toyoike, toyoike ele Nkolo; ko ayaka towa, towa ele Nkolo; nd’ewela eko, la toyoike la towa, tole ba Nkolo. 9Masiya awaki nd’ewela ene, ko aoika lenkina wete ende ayaleme Nkolo ea bawei l’ea bayoike. 10Lolo we, oez’aoyi ba lilongo likawe lae? ko la we, otengwela lilongo like lae? el’is’auma tifemala nda joso ja ngwende etena Nzakomba bakambo. 11Ele joi jokotama,
Yawe akela, Emi njoike, ko wengi baongo bifonkusamel’emi,
Ko wengi ndeum ifomemya Nzakomba.
12Eleng’eko wengi’ont’okiso ifolokola boloko bokae mongo wa beketo bekae ele Nzakomba.
13Nd’ewela eko, kela tambya loezan’aoyi: lolo leza joi line wae nk’onto aile ekunumwelo l’ekweyelo ele nga lotuta j’ilonga nda mboka ea lilongo likande. 14Njea, ko botema’okami bosilama ele Nkolo Yesu wae nko yomba ile linyamo iko mongo, imola nk’el’ende otangaka iko linyamo, ile linyamo el’ende. 15Ncina wae nkina lilongo like oka lokeseli nd’ewela ea toma ta ndala, ofokende lenkina nda lolango. Tofitake bonto oki Masiya owelaka la toma tola we. 16Talolangake bolotsi bokinyo botangema lotango j’obe: 17ele likulaka ja Nzakomba lifa ndala la mamela, lolonde liongi la kuci l’ekemo nda Bolimo w’olotsi. 18El’ende osalela Masiya la baoyi’ane aokya Nzakomba ekemo, ko aosimam’olotsi l’anto. 19Nd’ewela eko, kel’iso tokimane la baoyi bandieza kuci, ko la baoyi ba is’okemyana. 20Tofitake bolemo wa Nzakomba nd’ewela ea toma ta ndala. Toma touma tole feto nsosolo: lolo bobe wae bonto aleka, ko akunumwez’amo l’elelo ekande. 21Bolotsi wete ofole nyama, ko ofomele vina, ko ofokele joi nko loswele likunumweza lilongo like. 22Imeezo eata we, fonga loat’eko ele we mongo nda joso ja Nzakomba. Bonto ole l’ekemo wae oko ofumb’ende mongo likambo nda joi lisim’ende bolotsi. 23Lolo ende oyokakaana, ko ala, aolumbama likambo, el’ende afole l’imeezo: joi nko loswele lifa j’imeezo lile wae bobe.
Currently Selected:
Ba-Loma 14: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
