Ba-Loma 1
1
1PAULO, bokwala owa Yesu Masiya, ondetama l’etelo wae ayaleme ekima, ko obuzama wete asange bosako w’olotsi wa Nzakomba 2boki’nd’ocikak’elaka nda joso la bateli’akande nd’enkanda bia Nzakomba bi’oeko, 3nd’eloko ea Bona’okande, ootswaki nd’ooci wa Dawidi eleng’ele jonge: 4ende aokumyama Bona owa Nzakomba la mpamba, eleng’ele Bolimo wa boeko, o l’eetswelo lim’ele bawei; wae Yesu Masiya Nkolo ekiso, 5iso toata boya la mpifo ea ekima l’ende, ele lifiki j’imeezo nd’etei ea ba bise bauma, nd’eloko ea lina likande: 6koko inyo lole nd’oloi’okiyo ngoko, iny’andetama l’etelo wete loyaleme ba Yesu Masiya; 7el’iy’ale nda Loma bauma balangema la Nzakomba, ko baoletama l’etelo wae bayaleme ba-boeko: boya la kuci el’inyo lim’ele Nzakomba Fafa ekiso la Nkolo Yesu Masiya.
8Nda joso, nsima Nzakomba ekami boya la Yesu Masiya nd’ewela ekiny’auma, ele nsango ea imeezo ekinyo eosangema nd’enanga beuma. 9Temoin ekami wae Nzakomba, osael’emi l’olimo’okami nda nsango e’olotsi ea Bona’okande, wete njoand’inyo nda beondo bekami nko jomo; 10mbonda nkin’aeyoko mbat’olo elekelo la wango wa Nzakomba wae nj’el’inyo. 11El’em ndoka mposa wae njen’inyo, wete nsambez’inyo nganji emo e’olimo, wae inyo lokemyame; 12wae inyo lonsalangany’emi l’imeezo ekinyo, ko emi nsalangany’myo l’imeezo ekami, l’ekinyo l’ekami. 13Koko mpange wae inyo loyaleme nga lofea, balongo, nsangyaki wete nj’el’inyo besangya beuke, (lolo nsukamaki), wete mbate bamuka’amo el’inyo, nk’elenge eat’emi ele Bafaya bamo. 14Nde l’ombale ele Ba-Elene l’ele Basenji, ko l’ele ba wanya l’el’iy’asamba wanya. 15Nd’ewela eko, ng’elenge ekusey’emi, njolelama wae nsangel’iny’ale nda Loma nsango e’olotsi. 16El’emi mpoke nsango e’olotsi ea Masiya nsoi; eko ele wae mpamba ea Nzakomba endiela nda loiko ele wengi’onto ondimeza: ele Bo-Yuda nda joso, ko l’ele Bo-Elene ngoko. 17Ele liongi ja Nzakomba jolenya l’eko lim’imeezo nk’el’imeezo: eleng’ele joi jokotama, Lolo ba liongi bayoike l’imeezo.
18Ele nkele ea Nzakomba eolenya lima loola, esuka baoyi bafosonge la Nzakomba bauma, la bosamba wa liongi w’anto bandikamela nsosolo eko la baoyi basamba liongi; 19ele baoyi ba Nzakomba bandeana baolenya el’iyo; eki Nzakomba oaeneyak’ako. 20Ele baoyi bakande batenyaka lim’emelo e’okili,—wete mpamba ekande etasilaka la mpifo ekande ea Nzakomba,—baolenya fole, ko baoleana l’elemo bendemama: ko iyo bafoat’esengamelo; 21ek’iy’oeaka Nzakomba, lolo ntabomemya nga Nzakomba, ko ntabasimak’ende boya: lolo bayalemaki ba mpampa nda bikoli bikiyo, ko betema’ekiyo besamba wanya beolinda wilima yo. 22Bakela wae bale la wanya, lolo baoyalema belole mongo, 23ko baofaningola jilangi ja Nzakomba etawaka nd’esonganya ea efoya ea bonto owaka, ko l’ea tofulu, l’ea nyama, l’ea towawa tondakula.
24Nd’ewel’eko, Nzakomba aolacika wae bakimane la mposa ileki ya betema’ekiyo, wete bakele baoyi ba linyamo, ko bafite baonge’akiyo mongo: 25ek’iy’oenzaka nsosolo ea Nzakomba la joi ja mpafomba, ko bafikaki ko basaelaki belemo bendemami, nga belekola Wemi ondemaki beko, ende aomemyama bikeke la bikeke. O ngoko. 26Nd’ewel’ene, Nzakomba aolacika wae bakimane la mposa ya nsoi mongo, eki bamato’akiyo ofaningolaka elenge ekiyo e’omoto endeji, ko bakel’elenge efeji l’omoto; 27ko baende nk’eleng’eko, baocika elenge e’amato endeji, ko iyo mongo bokana mposa y’obe, baende l’aende’amo bayokel’eketo bia nsoi befeji, ko bayambe el’iyo mongo ndako endeji l’eketo’eko bia nsoi.
28Koko ngok’iyo ntabalanga wete bea Nzakomba, ende aolacika wae bakimane la nkai ya bofeza, wete bakel’eketo befeji. 29Betema’ekiyo beokama la bosamba wa liongi, ko la lofundo, ko la mposa e’aumba eleki, ko la nkele ea bonkita; baoyola to l’inkunya la mbaoma e’anto, ko la lisa, ko la bolokotano, ko la bosulu; bale batongi 30ko la batangi, bale l’elenge etona Nzakomba, ko bale la loma, ko l’eloloko, ko la nkakumya e’amongo, bale baoci ba baoyi’obe, batendoli b’aise l’anyango, 31basamba wanya, bayofonya bilaka, bale boola wa lolango j’ooto, la boola w’isei: 32bako bea esekyelo ea Nzakomba wete iy’ayokele baoyi’ako beji l’iwa, lolo bayokele nko baoyi’ako, ko bimeza bant’amo bayokele nk’eleng’eko.
Currently Selected:
Ba-Loma 1: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
