Belemo Beki Bikima 9
9
1LOLONDE Saula aokongooza baoyi ba biano la mbaoma ele bakimi ba Nkolo, aocw’ele nkanga ea joso mongo, 2aolouola benkanda wae atombe beko nda basunagoga ba Damaseke, wete ayaka atana banto bale Ba-Mboka eko, l’aende l’amato, ayel’iyo ntungama nda Yelusalema. 3Aki’nd’okende, aotutama la Damaseke; ko sasimo fole mongo lima loola eongesa el’ende kio samanyu! 4Ko aokwa nd’amoci, ko aoloka lofoso londokel’ende, Saula, Saula, onyokol’emi ncina na? 5Aolamba, Nkolo w’ole na? Aokela, Emi nde o Yesu onyokola we: [ele bolo wae ocinza besongo. 6Ende aolenga ko aokamwa, aokela, Nkolo olanga wete nkele na? Ko Nkolo aolokela,] Emala yomotswa nd’onanga, ko wifolakema baoyi bandeji wae okele. 7Baende bakendaki l’ende bakemi o wai, iyo baoloka lofoso, lolonde ntaben’onto. 8Saula aolemala lim’amoci, ko aki baiso’akae olifwaka, ntena nye; ko baolokita la bakata, baoloyela nda Damaseke. 9Bembil’esato ende ntena nye, ko ntala yomba, ko ntamela.
10Bokimi’omo aki nda Damaseke, lina likae Anania; bo Nkolo aolokela nd’enelo, Anania! ko ende aokela, Bala, Nkolo, em’one. 11Nkolo aolokela, Emala yokende nda mboka etangema Ci, w’uol’eko nd’ilombe ya Yuda bonto otangema Saula, bosi Taluseu; bala, ayoonde; 12ko aolena nd’enelo bonto otangema Anania wae aolotswa, ko aolafy’akata el’ende, wae ende ene lenkina. 13Lolonde Anania aolamba, aokela, Nkolo, njoloka lokumo j’ont’one lim’ele bant’auke, la baoyi’obe bauke baki’nd’okeelaka ba-boeko bake nda Yelusalema; 14ko ende ale la mpifo lim’ele nkanga ya joso wae akande bant’auma bandeta lina like nd’oondo. 15Lolonde Nkolo aolokela, Kenda; el’ende ale efeko eki’m’osonaka, wae atombe lina likami nda joso ja Bafaya, l’akulaka ba roi; ko la nda joso j’ana ba Yisalaele; 16el’emi njifoeney’ende baoyi’auma b’elo ba end’oena nd’eloko ea lina likami. 17Ko Anania aokenda, ko aolotswa nd’ilombe; aolafy’akata bakande el’ende, aokela, Lilongo Saula, Nkolo mongo, wae Yesu, ondenyaki ele we nda mboka eki’w’oyaka, ende aontoma wae wene lenkina, ko okame l’olimo w’olotsi. 18Ko nkakoyoko baimaka nga bifaso baokwa lim’aiso bakande, ko aolena o njeena; ko aolemala, aolinama nd’asi; 19aleki toma, ko akemaki nda jonge. Ende aoyala bembil’emo l’akimi baki nda Damaseke. 20Ko nkakoyoko aokumya Yesu nda sunagoga, wae ende ale Bona owa Nzakomba. 21Bant’auma bandokak’ende baokamwa, baokela, One af’ende ofitaki iy’andetaki lina line nd’oondo nda Yelusalema? ko ende ayaki endo la ncin’ene, wae ayel’iyo ntungama nda joso ja nkanga ya joso? 22Lolonde Saula aokaka l’ekemo, aolumba Ba-Yuda bafetsaki nda Damaseke nda bikoli bikiyo, eki’nd’oakaka joi wae One ale Masiya.
23Aki bembile beuke olekanaka, Ba-Yuda baolanga wango wae boom’ende; 24lolonde wango’okiyo boleana ele Saula. Iyo besanyaki biiso la mbile l’otso wete boom’ende; 25lolonde bakimi baolokola l’otso, baolokiteza wij’a lobala ja bikenje nda ifole y’inene.
26Aki’nd’okitaka Yelusalema, aomeka wae aamane l’akimi; lolonde iy’auma baoloanga, ek’iyo ntabimeza wet’ende ale bokimi. 27Lolonde Balunaba aolokola aoloyela ele bikima, aolasangela elenge eki’nd’oenaka Nkolo nda mboka, ko Ende mongo aotefela l’ende, ko l’elenge eki’nd’oongozaka bosako nda lina ja Yesu la nkaso nda Damaseke. 28Ende aki l’iyo nda Yelusalema, ayotswa ko ayole, 29aosanga bosako nda lina ja Nkolo la nkaso; aotefela la Ba-Elene, ko aolaikya bikoli; lolonde iyo baolasa wae boom’ende. 30Aki balongo oeaka ngoko, baoloyela nda Kaisalia, baolotoma nda Taluseo. 31Nkako ekelesia nda Yudea la nda Ngalilaya ko la Samalia eki la kuci, ko eokema o nkakema: ko eokenda nd’oangi wa Nkolo la nda ncicimya ea Bolimo w’olotsi, ko eofula o mpafula.
32Koko aki Petelo otuwanaka bise biuma, aokitela ele ba-boeko bafetsaki nda Luda. 33Aotan’eko bont’omo otangema Ainea, otacika ntange ekae nda années mwambi, ncina wae aki la nkangi ea nkataana. 34Petelo aolokela, Ainea, Yesu Masiya akoikya we; emala yotande ntange eke. Nkakoyoko aolemala, 35Ko bant’auma bafetsaki nda Luda la nda Salona baolena, ko baokengwana ele Nkolo.
36Ko bokimi loswele aki nda Yafo otangema Tabita, wae Doluka; bomot’oko aokaka l’eketo bi’olotsi la bia liota beki’nd’okelaka. 37Ko nd’embil’eko aokona nkangi, aowa; ak’iy’osolaka ilaka, baolamby’iko nda ntena e’aliko. 38Luda eki ntutama la Yafo, ko ak’iy’ookaka wae Petelo al’eko, bakimi baolotomela bant’afe, baoloonda, bakela, Yak’endo el’iso, totemake. 39Petelo aolemala, ko aocwa l’iyo. Aki’nd’oyaka, baoloyela nda ntena e’aliko; ko bituka biuma bakemi ntutama l’ende bayolele la mpisali, baoloeneya benkoto bia bilenge la bilenge beki Doluka osambaka, aki’nde l’iyo. 40Lolonde Petelo aolaoz’iy’auma, aokus’aongo, ko aonda; ko aokengwana el’ilaka, aokela, Tabita, betswa. Ende aolifola baiso’akande, ko aki’nd’oene Petelo, aosongongala. 41Aoloka likata likae, ko aoloemaza; ko aoleta ba-boeko la bituka, aololekya el’iyo ayoike. 42Joi liko jokumyama nda Yafo euma; ko bant’auke bimezaki Nkolo. 43Koko Petelo aoyala bembile beuke nda Yafo eka Simona, boaki owa bikoto.
Currently Selected:
Belemo Beki Bikima 9: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
