Belemo Beki Bikima 10
10
1KO bont’omo aki nda Kaisalia, lina likae Kolunelio, capitaine ea boloi wa soldats bonkama botangema wa Italia, 2bonto omemyaki, ko oangaki Nzakomba, ende l’ilongo ikae iuma, okafelaki banto b’eola nganji iuke ya liota, ko ayoonde Nzakomba bembile l’embile. 3Nga trois heures ea mbile, aolen’enelo fole ea ekima ea Nzakomba aolotsw’el’ende, aolokela, Kolunelio. 4Aki’nd’oal’ende te, aoloka bofolu, aokela, Joi na, Nkolo? Aolokela, Beondo bekawe la nganji ike ya liota iolulela ele Nzakomba nga jofwa. 5L’aeyoko yotom’anto nda Yafo, kela bete Simona, ole la lina ja nkombo Petelo; 6aokit’ase eka Simona boaki owa bikoto, ilombe ikae ile nd’eselo ea lieke j’okwa [ende ifokosangela baoyi bandeji wae okele]. 7Aki ekima ea loola otefelaki l’ende okendaka, aoleta basali’akae bafe b’ilombe, la soldat emo, bomemyi owa Nzakomba, lim’el’iyo bandosaelaki bikeke biuma; 8ko aki’nd’oasangelak’iyo baoyi’ane bauma, aolatoma nda Yafo.
9Mbile ea lobi, ak’iyo nda lokendo, ko baotutama l’onanga, Petelo aounda nd’aliko ba nsamba e’ilombe wae aonde, nga midi; 10ko aoloka nzala, aolanga wae ale toma; lolonde ak’iy’olambelak’ende toma, aokwa nga nda liloto; 11ko aolena nd’enelo wete loola lokombwa, ko la wimaka boyokitele nd’okili, nga eto e’enene mongo ekitama nd’atungu banei; 12nyama iuma ya bakaka banei la towawa tondakula nd’okili ko la tofulu ta loola baki eko. 13Ko lofoso lolokana el’ende lokela, Emala, Petelo; boma, ko leka. 14Lolonde Petelo aokela, Afa ngoko, Nkolo; eki’mi ncifola bofambe wa nko loswele la wa linyamo. 15Ko lofoso lolokana el’ende lenkina, lokela, Yomba iki Nzakomba ofetolaka, totangak’iko mbindo. 16Ko joi line jokelama bekel’esato: ko nkakoyoko wimaka bokolama nda loola.
17Aki Petelo okakazaka bouke nd’otema ncina ea enelo eki’nd’oenaka bant’ako batomamaki la Kolunelio, buolaki ilombe ya Simona, bemalaki nda joso j’ekuke, 18ko baobeleza, ko baoluola nkina Simona ole la lina ja nkombo Petelo ayal’eko. 19Aki Petelo okanelaka enelo, Bolimo aolokela, Bala, bant’asato bakasa we. 20Lolonde emala, ko kitela yokende l’iyo, tokakaanake; nd’ewela wae njatomaki. 21Petelo aokitela ele bant’ako, aokela, Bala, emi nde nk’ende ondas’inyo: loya ncina na? 22Baokela, Kolunelio, capitaine ea soldats, bont’owa njelama, oanga Nzakomba, ole la lokumo j’olotsi ele bant’auma ba Yuda, aolakema l’ekima e’oeko ea Nzakomba wae akete we nd’ilombe ikande, wet’ende oke baoyi lim’ele we. 23Aolaeta nd’ilombe, aolaya boya.
Ko mbile ea lobi aolemala, aocwa l’iyo, ko balongo bamo lima Yafo baocwa l’ende. 24Mbile ea lifi baomotswa nda Kaisalia. Kolunelio aolafala, ko aotakanya bioto l’alongo bakande. 25Koko aki Petelo otswaka, Kolunelio aokumana l’ende, aokwa nd’akaka’akae, aolokusamela. 26Lolonde Petelo aoloemaza, aokela, Emalaka; el’emi nde bonto kika. 27Aki’nd’osoola l’ende, aolotswa, aotana bant’auke baotakana; 28ko aolakela, Inyo mongo lea wae lifeji la bisekyelo wete bonto owa Ba-Yuda aamane la bonto owa ese enkina, nkina aye el’ende; lolonde Nzakomba aonjeneya wae afeji wete ntange bont’omo bonto owa nko loswele, nkina owa linyamo; 29nd’ewel’eko ak’iny’onjetaka, njoya; ko ncikyaki bikoli. Nd’ewel’ene njuola ncina ek’iny’onjetaka. 30Ko Kolunelio aokela, Bembile benei beoleka, nda heure ene e’isato, mbondaki nd’ilombe ikami, ko bala, bonto emalaki nda joso likami l’enkoto bia ngesingesi mongo, 31aokela, Kolunelio, boondo boke bolokana, ko nganji ike ya liota ile nga jofwa nda joso ja Nzakomba. 32Ko tom’anto nda Yafo, yoete Simona, ole la lina ja nkombo Petelo; aokit’ase nd’ilombe ya Simona, boaki owa bikoto, nd’eselo ea lieke. 33Nd’ewel’eko, nkotomelaki banto nkakoyoko; ko okelak’olotsi mongo eki w’oyaka. L’aeyoko is’auma tol’ane nda joso ja Nzakomba, wae tokoza baoyi’auma baki Yawe okosiselaka. 34Petelo aoumbol’omwa, aokela, Nsosolo mongo njena wete Nzakomba ntambak’anto la likali: 35lolonde nd’ese nko loswele bonto ondoanga, ko aokel’eketo bendeji, ende aosimam’olotsi l’Ende. 36Joi liki’nd’osiselaka bana ba Yisalaele, aki’nd’osangaka bosako w’olotsi wa kuci la Yesu Masiya, (Ende ale Nkolo e’ant’auma), 37ko inyo mongo lea joi liko, lindongwanaki nda Yudea euma, lima Ngalilaya nd’iango, nd’afeka ba nsango e’inelo eki Yoane osangaka; 38wae nsango ea Yesu owa Nazaleta, elenge eki Nzakomba obuzak’ende nd’oeko la Bolimo w’olotsi ko la mpamba mongo; ende aoleteta ayokambe belemo bi’olotsi; ko ayoikya bant’auma batukama la Satana; eki Nzakomba oyalaka l’ende. 39Iso tole temoins ba baoyi’auma baki’nd’okelaka nd’ese ea Ba-Yuda ko la nda Yelusalema; iyo baoloom’ende la mpafanya nd’otamba. 40Nzakomba aoloetola lim’ele bawei nda mbile e’isato, ko aololekya wete enya fole-fole, 41af’ele bant’auma, lolonde ele temoins baki Nzakomba osonaka nda joso, wae el’iso baleki toma ko bamelaki l’ende nd’afeka b’eetswelo ekae lim’ele bawei. 42Ende aototoma wete tongoza bosako el’anto, ko tosange wae ende aosonama la Nzakomba wete ayale juge owa bayoike l’awei. 43Bateli’auma baotela nd’eloko ekae wae la lina likae wengi’onto ondimez’ende ifotungwa lim’aoyi’obe bakae.
44Nk’atefela Petelo baoyi’ane, Bolimo w’olotsi aokwela bant’auma bandokaki joi, 45Ko iy’atenamaki nsonge bandimezaki, wae iy’auma bayaki la Petelo, baokamwa eki nganji ea Bolimo w’olotsi outezamaka ele Bafaya o ngoko. 46El’iyo baoloka wae bayotefela la mposo, ko bayokumya Nzakomba. Nkako Petelo aolamba, 47Bont’okuseya lofek’asi wae bane bandambaki Bolimo w’olotsi ngok’iso bafiname, ale nko? 48Aokela wae biname nd’asi nda lina ja Yesu Masiya. Ko baoloonda wete ateme l’iyo bembile bemo.
Currently Selected:
Belemo Beki Bikima 10: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
