Belemo Beki Bikima 8
8
1KO Saula aolimeza iwa ikae. Nkako benyoko mongo beangaki nda mbil’eko ele ekelesia eki nda Yelusalema; ko bakimi’auma baofalangana nda bise bia Yudea la Samalia, imola nko bikima. 2Ko bamemyi ba Nzakomba baokunda Setefano ko baololela bouke mongo. 3Lolonde Saula aofita ekelesia la lofito mongo, aolotswa nda tolombe touma, aobela baende l’amato, ko aolalekya nd’ilombe ya njanga.
4Nd’ewel’eko, iy’afalangai baoleteta wiji la wiji, baolongoza bosako w’olotsi wa Joi. 5Ko Filipo aokitela nd’onanga wa Samalia, aosangel’iyo nsango ea Masiya. 6Ko bitukuluku bi’anto baolokoza baoyi baki Filipo osangaka la lokai lomoko, ak’iy’ookaka, ko ak’iy’oenaka ntaza iki’nd’okelaka. 7Nd’ewela wae bekali bia linyamo beolola lim’ele bant’auke baki la beko, beobeleza o mbeleza; ko banto baki la nkangi ea nkataana la betengu, baoika. 8Ko bosalangano bokaka nd’onanga’oko o nkakaka.
9Lolo bont’omo aki eko, lina likae Simona, okambaki nda joso belemo bia liloka; ko aokamweya banto ba Samalia, aokumy’omongo wae ale bonto owa lokumo: 10iy’auma baolookoza, lima ba tosisi elaka nko b’anene, baokela, Bont’one ale Mpamba eko ea Nzakomba etangema Bonene. 11Baolookoza, eki’nd’okamweyak’iyo lima kalakala la baoyi’akande ba liloka. 12Lolo ak’iy’oimezaka bosako w’olotsi boki Filipo oongozaka wa likulaka ja Nzakomba la lina ja Yesu Masiya, baolinama nd’asi, baende l’amato. 13Ko Simona mongo aolimeza ngoko: aolinama, ko aoyala la Filipo; ko aki’nd’oenaka ntaza l’elemo bi’ofilo beokelama, aokamwa.
14Aki bikima baki nda Yelusalema ookaka wae Samalia ambaki joi ja Nzakomba, baolatomela Petelo la Yoane; 15ko ak’iy’okitelaka, baondaki nd’eloko ekiyo, wete bambe Bolimo w’olotsi; 16el’Ende atafoya el’omoko’okiyo: baolinama kika nda lina ja Nkolo Yesu. 17Nkako baolafya bakata’akiyo el’iyo, ko baolamba Bolimo w’olotsi. 18Lolonde aki Simona oenaka wete Bolimo w’olotsi aokaema la njaafya ea bakata ba bikima, aokela wae ende akay’iyo francs, 19aokela, Lonka emi mpifo ene ngoko, wete bonto nko loswele o em’oafya’akata, ambe Bolimo w’olotsi. 20Lolonde Petelo aolokela, We, kela francs ike ifitane la we, eki w’okanelaka wae oata nganji ea Nzakomba la francs. 21Ofa la likafo la liondo nda joi line nye: ele botema’oke bofeji nda joso ja Nzakomba. 22Nd’ewel’eko, bututala bobe’one’oke, ko bonda Yawe, nkina wifotungwa lima lokai j’otema’okawe. 23El’emi njena wae ole nda likwala j’elo la nda bikata bi’obe mongo. 24Ko Simona aolamba, Ombondele Nkolo, wae nko joi limoko ja baoyi’ako baki w’oandaka linkwel’emi.
25Nkako ak’iy’osangaka joi ja Nkolo, ko baokumya liko, baoluta nda Yelusalema, ko baolongoza bosako w’olotsi nda benanga beuke bia Samalia, 26Lolonde ekima ea Nkolo aosangela Filipo, aokela, Emala yokende nda wiji wa sud nda mboka ekitela lima Yelusalema ecwa Aza; wij’oko bole etekeleke. 27Aolemala, aokenda; ko bala, bont’omo owa Etiopia, bonto owa eunuko ondilami nda mpifo ea nene la Kandake, bokulaka ow’omoto owa roi owa Etiopia, wesanyi owa baumba’akae bauma, ende ayaki nda Yelusalema wae amemya Nzakomba; 28ko ende aoluta, ko aokit’ase nd’etombelo ekande, aanda bonkanda w’oteli Yesaya. 29Bolimo aokela Filipo, Tutama yoamane l’etombelo eko. 30Filipo aolikumwa el’ende, aolok’ende aanda bonkanda w’oteli Yesaya, aokela, Na, wea baoyi baanda we nde? 31Aokela, Emi njifea ngamo, imola nko bont’omo aondaka ncina ea baoyi’ane? Ko aonda Filipo wae aunde, akit’ase l’ende. 32Joi liki’nd’oandaka liki wae.
Aotombama nga mpate nd’eomelo;
Ko nga bona owa mpate ole nda joso ja bosaki’okae owa nkunza afotefela,
O ngoko ntaumbola bomwa’okae;
33Nd’esotselo ekae baolofima etenelo e’akambo:
Osanga eotswelo ekande na?
Ele loiko lokae lotombama lim’okili.
34Owa eunuko aolamba Filipo, aolokela, Nkoonda, onsangele; boteli atefela joi line nd’ewela ea bonto na? nd’ewela e’omongo, nkina nd’ewela e’onkina? 35Filipo aoumbol’omwa, aanga lim’ekotelo ene ea Nzakomba, aolosangel’ende nsango ea Yesu. 36Nk’akend’iyo nda mboka, baokita nd’asi’amo; ko owa eunuko aokela, Bala basi; joi linsuk’emi wae mpiname nd’asi lile na? 37[Filipo aokela, Nga wimeza l’otema’oke bouma, wambiname. Aolamba, aokela, Ndimeza wae Yesu Masiya ale Bona owa Nzakomba.] 38Aokela wae etombelo esilame; ko baokitela nd’asi, Filipo l’owa eunuko; ko aoloina nd’asi. 39Ak’iy’osafwaka lim’asi, Bolimo wa Nkolo aolimola Filipo; ko owa eunuko ntoen’ende lenkina, eki’nd’okendaka nda mboka ekae l’osalangano. 40Lolonde Filipo aolenya nda Azoto; atuwan’ende, aolongoza bosako w’olotsi nd’enanga beuma, elaka nko aokita nda Kaisalia.
Currently Selected:
Belemo Beki Bikima 8: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
