Belemo Beki Bikima 5
5
1LOLO bont’omo aki eko, lina likae Anania, la waji’okae Safila, aotekya lisala likiyo, 2ko aolikamela liondo limo ja francs, ko waji’okae aotung’ombale l’ende, ko aoyela liondo limo, ko aolambya liko nd’akaka ba bikima. 3Lolonde Petelo aokela Anania, Satana aokokinza botema’oke wete ofombe Bolimo w’olotsi, ko wikamele liondo limo ja francs lae? 4Aki lisala liko la we, ntaliki likawe mongo nde? ko aki w’otekyaka liko, ntalicikala nda mpifo eke mongo nde? Oangaki wango’one nd’otema’okawe ngamo? ntofomb’anto, lolonde Nzakomba. 5Aki Anania oke baoyi’ane, aokwa, ko aowa ci; ko booma mongo bokwela bant’auma bandokaki joi liko. 6Ko basekota baolemala, ko baoloomba; baolooza, ko baolokunda.
7Aki jefa olekana nga heures isato, waji’okae aolotswa, ntea joi likelamaki. 8Ko Petelo aoloamba, Onsangele nkina lotekyaki lisala la wiko bone. Ko aokela, Onde, wiko o boko. 9Lolonde Petelo aolokela, Inyo lotung’ombale wete lomeke Bolimo wa Nkolo ngamo? bala, bakaka b’asekota bakundaki bome’oke bale nda wiso, ko bifokotomba we nd’anza. 10Nkako aokwa nd’akaka ba Petelo, ko aowa ci; ko basekota baolotswa, baolotana wae aosil’owa, ko baolooza, ko baolokunda ntutama la bome’okande. 11Ko booma mongo bokwela ekelesia euma, l’ant’auma bandokaki baoyi’ako.
12Ko bouke wa ntaza l’elemo bia nkakamwa baokelama el’anto l’akata ba bikima; ko iy’auma baki la lokai lomoko nda mbalasai ea Solomona. 13Lolonde nk’ont’onkina okuseya loamana l’iyo; lolo banto baolamemya; 14lolonde bandimeza bauke baoamana la Nkolo, bitukuluku bi’aende l’amato; 15wete baoloza bandoka nkangi nda mboka, baolaambya nda ntange la totoko wae alekana Petelo, nkina lililingi likae lifokuka om’okiyo. 16Ko etukuluku e’anto baotakana lim’enanga ntutama la Yelusalema, baoyela banto bandoka nkangi, l’iy’aki l’elo ea bekali bia linyamo; ko baoika nk’iy’auma.
17Lolonde nkanga ea joso mongo aolemala, l’iy’auma baki l’ende (wae boloi wa Basadoke), ko baokama l’inkunya, 18baokanda bikima, baolaila nd’ilombe ya njanga. 19Lolonde ekima ea Nkolo aokombola bikuke bi’ilombe ya njanga l’otso, aokela, 20Lokenda, lemale nd’ilombe ya Nzakomba, losangelaka banto baoyi’auma b’Eikyelo ene. 21Ak’iy’ookaka joi liko, baolotswa nd’ilombe ya Nzakomba la nkesa mongo, baolak’anto. Lolonde nkanga ea joso mongo aoya, l’iy’aki l’ende, baotakanya nteke ea bingambe la boloi wa bilimo bia bana ba Yisalaele bouma, ko aotom’anto nd’ilombe ya njanga wae bayel’iyo. 22Lolonde police bayaki, ntabatan’iyo nd’ilombe ya njanga; ko baoluta, 23baokela, Totanak’ilombe ya njanga ikombi bolotsi, la baesanyi bakemi nda biiso; lolonde ak’is’okombolaka bikuke, ntatotana bonto nd’etei nye. 24Aki capitaine e’ilombe ya Nzakomba la nkanga ya joso ookaka baoyi’ane, baokakaana nd’ewela ea bako, wae joi line likite nko? 25Nkako omo aoya, aolakela, Bala, bant’ako bak’iny’oilaka nd’ilombe ya njanga bemi nd’ilombe ya Nzakomba, balak’anto. 26Ko capitaine aokenda la police aolayela, lolonde afa la bolo; ek’iy’oangaka banto, nyango bafusel’iyo bikenje. 27Ak’iy’oayelaka, baolaemaza nda joso ja nteke ea bingambe. Ko nkanga ea joso mongo aolauola, 28aokela, Iso tosangelak’inyo wae lofaolaka lenkina nda lina line; ko bala, loyoza Yelusalema la lilako likinyo, ko lolanga wae lotofots’iso likambo j’alongo b’ont’one. 29Lolonde Petelo la bikima baolamba, baokela, Eji l’iso wae timeza Nzakomba, afa banto. 30Nzakomba e’aise bakiso aetolaki Yesu lim’iwa, ok’iny’oomaka ci, la mbaaka nd’otamba. 31Nzakomba aolosangy’ende nda wiji wa likata likae j’elome wae ayaleme Bokulaka mongo la Boikyi, wete akaya Ba-Yisalaele eututaelo la etungwelo lima baoyi’obe. 32Iso tole temoins b’aoyi’ane, ko Bolimo w’olotsi oki Nzakomba okaak’iy’auma bandoimeza ale temoin ngoko.
33Lolonde ak’iy’ookaka joi liko, baokama la nkele, baolanga wango wae baom’iyo. 34Lolonde Bofalusi’omo, bolaki owa bisekyelo, otangema Ngamaliele, oki bant’auma okumyaka; ende aolemala nda nteke ea bingambe, aotoma wae boza bant’ako fele. 35Aolakela, Iny’anto ba Yisalaele, losing’okela joi li iny’okela, lokanela nd’ewela ea bant’ane. 36Nda joso ja bembil’ene, Teuda aolemala, aokumy’omongo wae ale bonto owa lokumo; ko bouke w’aende nga benkam’enei baoamana l’ende: bont’oko aomamaki; ko iy’auma bandoimezaki baofalangana, ko ntabakela joi limo. 37Ko nd’afeka b’ont’one Yuda owa Ngalilaya aolemala nd’embile bia nkakota ea baina, ko aobela bam’anto el’ende; ko ende aowa ngoko; ko iy’auma bandoimezaki baofalangana. 38L’aeyoko nsangel’inyo, Locika bant’ane, ko talokeelak’iyo joi, la ncina wae, nga wango’one la bolemo’one bole w’anto, wifofitana nye: 39lolonde nga bole wa Nzakomba, lofaofiteya boko: nyango lofaenya wae louna la Nzakomba. 40Iyo baoloimeza; ko ak’iy’oetaka bikima, baolakunda la lojiji, ko baolasasa wae bafaotefela nda lina ja Yesu, ko baolatungola. 41Koko baolimana lima nteke ea bingambe, bayosalangana; ek’iy’oandemaka bandeji oen’elo ea nsoi nd’ewela ea Lina liko. 42Wengi’aefa ntabambya lolaka ko loongoza bosako wa Yesu Masiya nd’ilombe ya Nzakomba la nd’ola.
Currently Selected:
Belemo Beki Bikima 5: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
