Belemo Beki Bikima 4
4
1NK’ATEFEL’IYO l’anto, nkanga la capitaine e’ilombe ya Nzakomba la Basadoke baoy’el’iyo, 2ko baolemwa ek’iy’olakak’anto, ko bao kumya la Yesu eetswelo e’anto lim’ele bawei. 3Baolakanda, baolaila nd’ilombe ya njanga elaka nko lobi; ele bokolo bokita. 4Lolonde bant’auke bandokaki joi bimezaki; ko boanji w’aende bokita nga nkot’itano.
5Koko nga lobi, bant’akiyo ba mpifo la bingambe l’akoci b’enkanda baotakana nda Yelusalema; 6ko Anasa nkanga ea joso mongo aki eko, ende la Kayafa, la Yoane, la Alesandulo, l’ilongo iuma ya nkanga ea joso mongo. 7Ak’iy’oilaka bikima nd’etei ekiyo, baolauola Lokelaki joi line la mpamba na? la nda lina na? 8Nkako Petelo aokama la Bolimo w’olotsi, aolakela, Iny’anto ba mpifo, la bingambe, 9ayaka lotengel’iso mbil’ene nd’ewela ea joi j’olotsi likelamaki ele bonto ow’otengu, wae lea ondoikyaki; 10kela lea iny’auma, la Ba-Yisalaele bauma, wete nda lina ja Yesu owa Nazaleta, ok’iny’oakaka nd’ekulusu, ko oki Nzakomba oetolaka lim’ele bawei, o l’ende bont’one emal’endo nda joso likinyo ko ayoike. 11Ende ale ekenje ek’inyo batongi otonaka, eyalema ea joso nda likono. 12Ko nko loiko el’onkina nye; ele nko lina linkina lile nd’ase ba loola likaema el’anto, litoikyeya nye.
13Ak’iy’oenaka nkaso ea Petelo la Yoane, ko baolena wete baki banto bateaki bianya bi’okili, baokamwa; ko baolaea wete baki la Yesu. 14Ko enden’iyo bonto oikaki ayemale la bikima, iyo ntabaki l’etefelo emo nd’ewela ea joi liko. 15Lolonde ak’iy’oimolak’iyo fele lim’etakano, baocwa lokuko, 16baokela. Iso tifokeela bant’ane na? ele bolemo w’ofilo wa lokumo bokelama l’iyo, ko boleana el’ant’auma bafetsa nda Yelusalema; ko tofa l’anganelo nda joi liko nye. 17Lolonde la ncina wae joi liko lifaokita em’esi ele bant’amo, kel’iso taan’iyo wano, wete lim’aeyoko bafaotefela l’onto nko loswele nda lina line. 18Ko baolaeta, baolasangela o nsangela mongo wae bafotefela, ko bafolake nda lina ja Yesu nye; 19Lolonde Petelo la Yoane baolamba, baolakela, Inyo mongo lezaka; nkina joi lil’olotsi nd’aiso ba Nzakomba wet’iso tokoz’inyo, ko tofokoza Nzakomba; 20el’iso tofa la mboka emo, imola nko tosange baoyi bak’is’oenaka ko la bak’is’ookaka. 21Ko ak’iy’oanak’iyo lenkina la wano, baolatungola, ek’iyo ntabena eloko el’iyo wae basisoz’iyo, nd’ewela ea banto; ele bant’auma baomemya Nzakomba nd’ewela ea joi likelamaki. 22Ele bont’oko oki lotaza lone okelamaka aolekana années ntuk’inei.
23Ak’iy’otungwa, baocwa ele boloi’okiyo, baosanga baoyi’auma baki nkanga ya joso la bingambe osangelak’iyo. 24Ak’iy’ookaka baoyi’ako, baosangya lofoso lokiyo la lokai lomoko ele Nzakomba, baokela, O Yawe, we ondemaki loola l’okili la lieke j’okwa, ko l’elemo beuma bele nk’eko, 25We otefelaki la Bolimo w’olotsi l’omwa wa ise ekiso Dawidi, bosali’okawe, wae
Banto b’afaya baofangwa,
Ko banto baokanela baoyi ba mpampa ncina na?
26Bakulaka b’okili baolemala nd’etumba,
Ko ba-mpifo baotakana
Wae basuke Yawe la Masiya ekande isuki;
27La nsosolo mongo Elode la Pontio Pilato, la Bafaya l’anto ba Yisalaele, batakanaki nd’onanga’one wae basuke Bona’oke ow’oeko, 28Wete bakele joi nko loswele liki likata like la wango boke oangaka nda joso wae biele. 29L’aeyoko, Yawe, bala biano bekiyo; ko kambya bakwala’ake wete basange baoyi’akawe nk’ofolu, 30asembola we likata like wae oikya nkangi y’anto; kela ntaza l’elemo bia nkakamwa bakelame nda lina ja Bona’oke ow’oeko Yesu. 31Ak’iy’oondaka, itenela ik’iy’otakanaka iofukyama; ko iy’auma baokama la Bolimo w’olotsi, ko baosanga baoyi ba Nzakomba la nkaso nk’ofolu.
32Ko linyenga j’anto bandimezaki baki l’otema nk’omoko l’olimo nk’omoko; nk’onto okelaki wete yomb’imo iat’ende ile nk’ikae mongo; lolonde baosanganya toma tokiyo touma. 33Ko bikima baokumya nsango ea eetswelo ea Nkolo Yesu lim’iwa la mpamba mongo; ko boya w’onene boki el’iy’auma. 34Iyo ntabaki l’onto ondelaki wela nye; ele bamongo basala la tolombe baotekya bako, ko baoyela francs ya toma tok’iy’otekyaka, 35ko baolamby’iko nd’akaka ba bikima; ko baokaf’ele wengi’onto, elenge endelengan’ende.
36Ko Yosefa, otangemaki la bikima Balunaba (wete Bona owa Ncicimya), owa Lewi, bosi Kupulio, 37aki la lisala, ko aotekya liko, ko aoyela francs, ko aolamby’iko nd’akaka ba bikima.
Currently Selected:
Belemo Beki Bikima 4: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
