Belemo Beki Bikima 27
27
1KO ak’iy’osangyaka wae tocwe Italia, baolekya Paulo la njanga imo ele capitaine ea soldats bonkama, otangema Yulio, ow’oloi wa Anguseto. 2Ko tokondela nd’asua ba Adulamutiona, baotutama losemwa wae bakende nda bise bile nd’eselo ea Asia, ko tosemwa. Alisitaluko, bosi Tesalonike nda Makedonia aki l’iso. 3Ko nda mbile ea lobi, tosema nda Sidona: ko Yulio aoleneya Paulo liota, aoloka elekelo wae acwe eka balongo’akae, bosalanganya. 4Lim’eko tosemwa, tokenda ntutama la Kupulio, eki bempompo otosukaka. 5Ko ak’is’ofendaka lieke lile ntutama la Kilikia la Pampulia, tosema nda Mula, bonanga wa Lukia. 6Ko capitaine ea soldats aotan’eko basua ba Alesandulia bacwa Italia; ko aotokondeza nd’asua’ako. 7Ko ak’is’okendaka bembile beuke la lokuto, ko toya l’elemo mongo ndongama la Kinido, eki bompompo ntabotoka mboka, ko tokenda o nce ntutama la Kulete, ndongama la Salami; 8ko l’olemo mongo tokenda lenkina o nce, elaka nko tokit’itenela imo itangema Bisemelo bi’olotsi; ko bonanga wa Lasea boki ntutama l’iko.
9Ko aki elingi olekaka, ko lokendo loyalema ja booma, eki ekeke ea nkakila ea toma olekana, Paulo aolalaka, 10aokela, Baowa, njena wae lokendo lone lifoyalema j’elo mongo l’iomi iuke, afa ya toma la basua kika, lolonde ya loiko lokiso mongo. 11Lolonde capitaine ea soldats aolokoza baoyi ba capitaine la bomongo basua, ko ntokoza baoyi baki Paulo okelaka. 12Ko banto ba leki’auke baokela wae basemwa lim’eko, eki esemelo eko nteonga bolotsi wete bayal’eko nd’ekeke ea mpio, ko baokanela nkina bakita nda Poinike, ko bayal’eko nd’ekeke ea mpio nd’esemelo emo ea Kulete eala Nord-Est la Sud-Est. 13Ko aki impempe lima Sud oyaka, batangaki wete baata joi lik’iy’olangaka joliela, ko baosemwa, baokenda ntutama la Kulete, o nce. 14Lolonde nk’elingi bompompo w’onene botangema Eulakulu bokumba lim’ese eko: 15ko aki basua osukama, ntaonga wae baune l’ompompo, ko tocika wae basua bakende la boko. 16Ko ak’is’ocwaka ntutama mongo l’ekole e’isisi, etangema Kauda, totungyaki wato w’isisi l’olemo mongo: 17ko ak’iy’osangyaka boko nd’aliko, baokola bekulu bi’anene, ko baokiteza beko nd’ase ba basua, baolemba beko; ko ak’iy’oangaka boangi, nyango bafusame nda Saluti, baokiteza bito, ko baokenda l’ompompo nk’eleng’eko. 18Ko aki basua ofukyamaka bouke l’ompompo, nda mbile ea lobi iyo baanga loboka toma nd’asi; 19ko nda mbile e’isato baoboka belemo bia basua l’akata’akiyo mongo. 20Ko aki jefa la tooci ntangesa el’iso bembile l’etso beuke, ko bompompo w’onene bokongokumba, iso ntatoata lenkina lolendezo wae toike. 21Ak’iy’okilaka toma elingi mongo, Paulo aolemala nd’etei ekiyo, aokela, Baowa, nga lonjokozaki, ko ntalosemwaki lima Kulete, siki ntatoata efitanelo ene l’iomi. 22Lolo aeyoko mbond’inyo wae lik’etema; ele nk’ont’omoko’okinyo ow’olo, lolo basua kika bifofitana. 23Ele ekima ea Nzakomba, ole bomong’emi, ko osael’emi, aolemala l’emi l’otso bone, 24aokela, Paulo, toangake; wifemala nda joso ja Kaisala; ko bala, Nzakomba aokokaya bant’auma bakenda la we nd’asua. 25Nd’ewel’eko, baowa, losalangana: el’emi njimeza Nzakomba wae joi lifokelama ngoki liko osangemaka el’emi. 26Lolonde tifusama nd’ekole emo.
27Aki botso wa jom l’inei okita, ko tocinzama l’ompompo wiji la wiji nda lieke ja Adulia, l’onkeke w’otso, basali b’asua batangaki wae baotutama l’okili’omo: 28ko ak’iy’omekaka njindo, baotana baboko ntuk’ife; ko nk’elingi baomeka njindo lenkina, ko baotana baboko jom l’atano. 29Ko baangaki, nyango tofusame nd’okili wa bikenje, baolusa mboko inei lima jenda j’asua, ko baoonda wae jefa likye. 30Ko aki basali b’asua oase wae balote lim’asua, ko baokiteza wato w’isisi nga bause mboko lim’a joso j’asua, 31Paulo aokela capitaine ea soldats, Nga bant’ane bafoyale nd’asua lofaoika nye. 32Nkako soldats baotena bekulu bia wato w’isisi, ko baocika boko nd’asi. 33Ko aki jefa okya, Paulo aolaond’iy’auma wae bale toma, aokela, Mbil’ene ele mbile ea jom l’inei endesany’inyo, ko ekil’inyo toma, ko inyo ntatoleki. 34Nd’ewel’eko mbond’inyo wae lole toma tomo; ele toma tone toiky’inyo; ele nko libwo limoko j’etsa bekinyo lifitana nye. 35Aki’nd’otefelaka ngoko, ko aokola mampa, aosima Nzakomba boya nda joso likiy’auma; ko aoten’eko, aanga lola. 36Nkako iy’auma baokema nd’otema, ko iyo mongo baleki toma ngoko. 37Banto benkam’efe l’anto ntuku nsambo l’otoa baki nd’asua. 38Ak’iy’oleka toma tokokaki l’iyo, baolimola bolito w’asua, baoboka loso nd’asi. 39Ko aki jefa okya, ntabea bokili’oko: lolonde baolena likumba lile l’esemelo, ko baokanela nkina eonga wae bacinza basua nk’eko. 40Baotena bekulu bia mboko, baocik’iko nd’asi, ko nd’ekek’eko baolembola bekulu bek’iy’olembaka jenda; ko baosangy’eto ea joso nd’ompompo, baolasa wae bakite nd’esemelo. 41Lolonde baokita nd’itenela iki bieta befe okumane, baotomb’asua nda jelo: ko joso j’asua jokambema bolo mongo, ko jenda j’asua joanga lounya l’efukelo ea basi ba lieke. 42Ko soldats baosangya wae baome njanga, nyango bafokwela nd’asi, balote. 43Lolonde capitaine ea soldats aolasuka nda lisangya likiyo, eki’nd’olangaka wete aikya Paulo; ko aokela wae iy’andea basi bakwel’asi, bakende nda joso nd’okili; 44ko baciki bakende, bamo nd’abaya, bamo nd’elemo bemo bi’asua. Koko ok’eleng’eko bant’auma baokita nd’okili nk’olotsi.
Currently Selected:
Belemo Beki Bikima 27: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
