Belemo Beki Bikima 25
25
1AKI Feseto oyaka nd’ese ekae, ko bembile besato beoleka, aolimana Kaisalia, aocwa Yelusalema. 2Ko nkanga ya joso l’anto ba mpifo b’a-Yuda baolosangela likambo ja Paulo; ko baoloonda, 3wae akamby’iyo ko asuke Paulo, ko aet’ende nda Yelusalema; el’iyo baoloangela wete bifoom’ende nda mboka. 4Lolonde Feseto aolamba, Paulo aotungama nda Kaisalia, ko ende mongo ifocw’eko nk’elingi. 5Ko aokela, Bam’akinyo ba mpifo bakende l’emi, ko ayaka likambo lil’eko nd’ewela ea bont’one, kela boak’ende liko.
6Aki’nd’oyala el’iyo bembile mwambi nkina jom, aokitela nda Kaisalia; ko nda mbile ea lobi aokit’ase nda ngwende e’akambo, ko aotom’omwa wete bayele Paulo. 7Ko aki’nd’oyaka, Ba-Yuda bakitelaki lima Yelusalema bakemi baoloenga, baoloaka baoyi’auke ba bolo bak’iyo ntabakuseya loeney’ende wae bale nsosolo. 8Lolonde Paulo aolokola boloko bokae, aokela, Emi ncisekola bisekyelo bia Ba-Yuda, l’oeko w’ilombe ya Nzakomba, ko ncikela Kaisala joi j’obe. 9Lolonde Feseto nd’ewel’eki’nd’olangaka losimo ja Ba-Yuda, aolamba Paulo, aokela, Olanga wae ocwe Yelusalema, kela ntene likambo ja baoyi’ane nk’eko? 10Lolonde Paulo aokela, Njemi nda joso ja ngwende e’akambo ea Kaisala, wae ngwende ea etenelo e’akambo endeji l’etenelo ea likambo likami; ncikeela Ba-Yuda joi limoko j’obe, elenge endea we mongo. 11Ng’emi nde bokeli ow’obe, ko nga njokela joi lindeji l’iwa, mpofeza wete ncwe nd’iwa; lolonde ayaka joi limoko ja baoyi bambak’iyo lifa nsosolo, nk’onto ole la mpifo wae andekya el’iyo. Emi ntomba likambo ele Kaisala mongo. 12Nkako Feseto, aki’nd’osoolaka la nteke, aolamba, Otomba likambo ele Kaisala; wifokenda nk’ele Kaisala.
13Ko aki mbil’emo olekaka, Agulipa Bokulaka owa roi la Belunike baokita nda Kaisalia, ko baoy’oena Feseto. 14Ko ak’iy’omongak’eko bembile beuke, Feseto aosangela bokulaka likambo ja Paulo, aokela, Bont’omo oki Felika ocikaka nd’onyolo al’ane; 15aki’mi nda Yelusalema, nkanga ya joso la bingambe bia Yuda baonsangela likambo likae, ko buolaki wae njoumbe likambo. 16Ko njaambaki, afa elenge ea Ba-Loma wete baleky’onto nko loswele, elaka nko ende l’iyo bandoaka baokumana, ko bont’oko aat’elokoelo nda likambo lindoak’iyo. 17Ko ak’iy’otakanaka endoko, ncitema, lolonde nda mbile ea lobi nkitak’ase nda ngwende e’etenelo ea likambo, ko ntomaki bomwa wae bayele bont’oko. 18Ko aki baaki ba likambo oemalaka, iyo ntaboaka joi j’obe limoko liki’m’okanelaka; 19lolonde baoloaka l’aoyi’amo ba ememyelo ea Nzakomba ekiyo, la nd’eloko ea Yesu omo owaki, oki Paulo okelaka ayoike. 20Emi njokakaana elenge e em’oengela baoyi’ako, ko njoluol’ende nkina alanga wae acwe Yelusalema, wete batene likambo likae ja baoyi’ane eko. 21Lolonde aki Paulo otombaka likambo ele Kaisala mongo wae lifongame, elaka nk’ende aotena liko, ntomaki bomwa wete boesanya, elaka nko njosokoz’ende ele Kaisala. 22Ko Agulipa aokela Feseto, Emi mongo ndanga wae ndokoza bont’oko. Aokela, Lobi wifokoz’ende.
23Nda mbile ea lobi, aki Agulipa la Belunike oyaka la jilangi mongo, ko baolotswa nd’ilombe y’akambo, iyo la commandants la bingambe bi’onanga, baolotsweya Paulo la lotomo ja Feseto. 24Ko Feseto aokela, Bokulaka Agulipa, l’ant’auma bal’ane, inyo lolena bont’one, oki etukuluku ea Ba-Yuda nda Yelusalema l’endo ombondaka nda likambo likae, ko baobeleza, baokela wete ende afeji wae aike lenkina. 25Lolonde ndenaki wete ende ntakela joi lindeji l’iwa; ko aki’nde mongo otombaka likambo ele Kaisala, nsangyaki wae njifosokoz’ende. 26Lolonde mpa la joi loswele li em’okotela Nkolo ekami. Nd’ewel’eko, njoloyela nda joso likinyo, ko nda joso like mongo, Bokulaka Agulipa, kela toengel’ende wae mbate joi loswele li em’okota. 27El’emi mpene elenge ea wanya wete nsokoza bonto otungi nd’onyolo, ko mposange likambo lindoak’iyo.
Currently Selected:
Belemo Beki Bikima 25: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
