Belemo Beki Bikima 24
24
1AKI bembile betano olekaka, Anania nkanga ea joso mongo aokitela, ende la bingambe bimo, l’otefeji omo owa nkaso, otangema Telutulo; ko baosangela gouverneur likambo ja Paulo. 2Ko ak’iy’oetaka Paulo, Telutulo aanga loak’ende ngone, aokela,
Andok’iso ekemo eki w’otoatela kuci mongo, ko w’oongeza banto b’ese ene baoyi batakeji la lokai loki w’okanelaka nda joso, 3iso tamba ngoko nda bilenge biuma la nda totenela touma, ko tokosima boya mongo, Felika oleki lokumo! 4Lolonde nkoonde wae l’isei ike otokoz’iso nd’aoyi baf’auke, nyango mpokoatela bompele l’aoyi’auke. 5El’iso tolena bont’one ow’obe mongo, bosomanyi owa bitongo ele banto ba Yuda bauma nda bise biuma bi’okili, ko ale bonto owa joso nd’oloi wa Ba-Nazaleta; 6ko ende aomeka wae asekole boeke w’ilombe ya Nzakomba: ko iso tolokanda, [ko tolangaki wae tosambe likambo likae eleng’ele bisekyelo bikiso. 7Lolonde commandant Lusia aoy’el’iso, ko aotofonola bont’one l’etumba mongo, 8ko aotoma baaki’akae wete baye ele we.] Ko nga we mongo w’oengel’ende, wifea baoyi’ane bauma bandoak’iso. 9Ko Ba-Yuda baoamana l’ende, ko baokela wete baoyi’ako bale o nsosolo.
10Ko aki gouverneur oetak’ende la likata wae atefele, Paulo aolamba.
Emi ndokole boloko’okami l’ekemo, endea emi w’ole juge ea banto b’ese ene années iuke; 11ele we mongo wifea wae bembile jom l’efe kika beolekana lim’eki’m’ocwaka Yelusalema wete mmemya Nzakomba; 12ko iyo ntabantana wae njikyak’onto bikoli, nkina nsomanya banto b’etukuluku l’etongo nd’ilombe ya Nzakomba, la nda sunagoga, la nd’onanga; 13ko bafokuseya lokeneya wae baoyi bambak’iyo bale nsosolo. 14Lolonde njimeza joi line nda joso like, wae nda Mbok’eko etang’iyo boloi, emi nsaela Nzakomba ea baise’akiso, ko njimeza baoyi’auma bakotamaki nda bisekyelo, la nd’enkanda bi’ateli; 15ko emi nde la lolendezo ele Nzakomba wete lolendezo londendez’iyo mongo, wae banto bandeji la bafeji bifoetswa lim’iwa. 16Nd’ewela eko mmeka wae mbate juge e’otema efa l’ekwa nda joso ja Nzakomba l’anto nda bikeke biuma. 17Ko aki années iuke olekaka, njela banto b’ese ekami nganji ya liota la toma ta ndalekya; 18ko baontana nd’olemo’oko nd’ilombe ya Nzakomba, njofetswa feto l’efetswelo ea bisekyelo, lolonde nciki l’etukuluku, nciki l’etongo; lolonde bamo ba Yuda lima Asia baki eko. 19Ko ayak’iyo bale la likambo l’emi, siki bayaki endoko nda joso like wae bambake joi liko. 20Ng’afa ngoko, kela bant’ane basange joi j’obe lik’iy’otanaka el’emi, aki’m’okemi nda joso ja nteke ea bingambe, 21imola nko joi line limoko liki’m’obelezaka, aki’m’okemi nd’etei ekiyo wete, Baonjengela mbil’ene nd’ewela ea eetswelo ea bawei.
22Lolonde Felika aolatemya fele, nd’ewel’eki’nd’oeaka elenge ea Mbok’eko njea mongo, aokela, Ae Lusia commandant oya, mpanga ntene likambo likinyo. 23Ko aotoma capitaine ea soldats wae esanya Paulo, lolonde afa la bolo; ko afofeke balongo’akae balanga bay’okambya.
24Aki bembile bemo olekaka, Felika aoya la waji’okae Dulusila, bomoto owa Yuda, ko aoleta Paulo, aolookoz’ende nd’ewela ea imeezo el’ele Yesu Masiya. 25Ko aki’nd’osangaka elenge ea baoyi ba njelama, la njeeza ea mposa, ko l’etenelo e’akambo eoya, Felika aolenga l’ooma, ko aolamba, Wambokende fele aeyoko; ko a em’oata ekeke endeji, njifoketa el’emi. 26Ko ende aolendeza wae Paulo akay’ende bosolo; ko la ncin’eko aoloeta bieta biuke, ko aosoola l’ende. 27Lolonde aki années ife olekaka, Polukio Feseto aosulungana Felika; ko Felika aocika Paulo nd’onyolo, eki’nd’olangaka losimo ja Ba-Yuda.
Currently Selected:
Belemo Beki Bikima 24: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
