Belemo Beki Bikima 21
21
1KOKO ak’is’oimanak’el’iyo, ko tosemwa, tofenda ci, ko tokita Kosa, ko nda mbile ea lobi nda Lode, lim’eko tokita Patalia; 2ko ak’is’otanaka basua bafenda nda Poinike, tokondela, tosemwa. 3Ak’is’oenaka Kulese, ko tocika eko nda wiji wa likata ja waji, tocwa Sulia, ko tosema nda Tula; el’iyo baocwa osafol’eko toma toki nd’asua. 4Ko ak’is’otanaka bakimi, toyal’eko bembile nsambo; ko bane baosangela Paulo la Bolimo wete afocwe nda Yelusalema. 5Aki bembile’eko okokaka, tolimana, ko tocwa lokendo lokiso; ko iy’auma, l’aaji l’ana, baotocindeza, elaka nko tolola lim’onanga; ko tokus’aongo nd’eselo ea lieke, toonda, 6ko tosesana#21.6 tosisana.; ko iso tokondela nd’asua; lolo iyo baolut’ola.
7Ak’is’osizaka lokendo lima Tula, tokita Petolemai; ko toluola balongo, toyala l’iyo mbile emoko. 8Ko nda mbile ea lobi tokenda, tokita Kaisalia; tolotswa nd’ilombe ya Filipo, bosangi owa nsango e’olotsi, omo owa nsambo, ko tokit’ase l’ende. 9Bont’one aki la bana b’amato banei batafoalana l’aende, ko batelaki lotelo. 10Ko ak’is’omongak’eko bembile beuke, boteli omo otangema Agabo, aokitela lima Yudea. 11Ende aoy’el’iso, aokola bosenge wa Paulo, aotungy’akaka l’akata’akae mongo, aokela, Bolimo w’olotsi aotefela baoyi’ane, Ba-Yuda nda Yelusalema bifotungya bomongo bosenge’one eleng’ene, ko bifoleky’ende nd’akata ba Bafaya. 12Ak’is’ookaka baoyi’ane, iso l’akimi b’onanga’oko, toloonda wete afocwe nda Yelusalema. 13Nkako Paulo aolamba, Inyo lokela ngamo? Lolela, ko lotena botema’okami lae? el’emi njolelama, afa wae ntungame kika, lolonde mbwe nda Yelusalema nd’eloko ea lina ja Nkolo Yesu. 14Aki’nde ntimeza boondo’okiso, tocika, ko tokela, Jango ja Nkolo likelame.
15Nd’afeka b’embile bene tokoma toma, tocwa Yelusalema. 16Ko bakimi’amo lima Kaisalia baokenda l’iso, ko baototomba ele Menesona owa Kupulio, bokimi owa kalakala, ko tocw’okit’ase eka’nde.
17Ak’is’okitaka Yelusalema, balongo baotamb’iso l’osalangano mongo. 18Ko nda mbile ea lobi Paulo aolotswa l’iso ele Yakobo; ko bampaka bauma baki eko. 19Aki’nd’ouolak’iyo, aolasangela belemo, bomoko l’omoko, beki Nzakomba okambaka ele Bafaya l’ekambelo ekae. 20Ko ak’iy’ookaka, baokumya Nzakomba; ko baolokela, Lilongo, olena wae bitukuluku mongo bia Ba-Yuda baolimeza; ko iy’auma bale la mposa mongo ea bisekyelo; 21ko bant’amo baolasangela, wae olaka Ba-Yuda bauma bale nda bise bia Bafaya wete basundole Mose, ekela we wae bafotene nsonge ya bana’akiyo, ko bafokime bilenge bi’aise. 22Tokele na? el’iyo bifoka wae oya. 23Eonga wae okela joi line likosangel’iso; tole la bant’anei basimbaki nsimbi; 24w’akole, ko ofetole we mongo l’iyo l’efetswelo ea bisekyelo, ko we mongo futa nd’eloko ekiyo, wae bakool’etsa bekiyo; ko bant’auma bifea wete baoyi’auma bak’iy’ookaka nd’eloko eke bafa nsosolo; lolonde bifea wae we mongo okenda nd’elenge endeji, ko ofonga bisekyelo. 25Lolonde nd’eloko ea Bafaya bandimeza, tokotaki besise bek’is’oezaka wae bakile nyama ilekyamaki ele baidola, l’alongo, la nyama iomamaki la nkakoma; ko la jibi. 26Nkako Paulo aokol’ant’ako, ko mbile ea lobi aofetol’ende mongo l’iyo l’efetswelo ea bisekyelo; baolotswa nd’ilombe ya Nzakomba, ko baoleneya esilelo ea bembile bia efetswelo, elaka nko mbeka eolekyama nd’eloko ekiy’auma.
27Ko aki bembile beko nsambo otutam’osila, Ba-Yuda ba Asia, ak’iy’oenak’ende nd’ilombe ya Nzakomba, basomanya banto b’etukuluku l’ende, ko baolokita l’akata, 28baobeleza, Banto ba Yisalaele, lotokambya; One ale nk’ende olaka bant’auma nda bise biuma wete batoton’iso, la bisekyelo, ko l’itenel’ine y’oeko; ko aoyela Ba-Elene nd’ilombe ya Nzakomba ngoko, ko aofita itenel’ine y’oeko. 29Ek’iy’oenaka nda joso Tulofimo bosi Efeso l’ende nd’onanga, ko baotanga wae Paulo ayel’ende nd’ilombe ya Nzakomba. 30Ko bonanga’ouma bofuka, ko banto baolikumwa wij’omoko; baokanda Paulo, ko baolobela lim’ilombe ya Nzakomba: ko nkako bikuke biokombama. 31Ko ak’iy’oasaka wae boome, banto baosangela commandant ea soldats wae Yelusalema euma eofuka. 32Ko nkakoyoko aokola soldats la capitaines, ko aolikumwa el’iyo: ko ak’iy’oenaka commandant la soldats baolambya lokunda Paulo. 33Nkako commandant aotutama, ko aolokanda, aokela wae ende atungame la benyolo befe; ko aoluola lina likae, ko la joi liki’nd’okelaka. 34Bamo b’etukuluku baobeleza joi limo, ko bankina joi linkina; ko aki’nde ntea ncina ea joi nd’ewela ea etongo, aokela wae boyel’ende nda forteresse. 35Ak’iy’okitaka nd’eundelo, aotombama la soldats nyango wale w’etukuluku: 36ele banto b’etukuluku baokimana l’iyo, ko baobeleza, Loimol’ende!
37Ko ak’iy’otutamaka lotsweya Paulo nda forteresse, ende aokela commandant, Kela nkosangele joi. Aolamba, Kamba wea lofoso ja Ba-Elene? 38We ofa bont’oko owa Ejipeto, otakanyaki banto nd’etumba nda joso j’embil’ene, ko atombaki baende nkot’inei baomi b’anto nd’etekeleke nde? 39Lolonde Paulo aokela, Emi nde Bo-Yuda, bosi Taluseu nda Kilikia, bosi bonanga bofosambe lokumo: nkoonde oncike wae ntefeele banto. 40Aki’nd’okaak’ende etefelo, Paulo aolemala nd’eundelo, aolet’anto la likata; ko ak’iy’oyalaka wai, aolasangela nda lofoso ja Ba-Ebele, aokela.
Currently Selected:
Belemo Beki Bikima 21: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
