Belemo Beki Bikima 20
20
1AKI etongo osilaka, Paulo aoleta bakimi, aolalaka, aosisana#20.1 aosesana. l’iyo, ko aolimana, aocwa Makedonia. 2Ko aki’nd’otuwanaka bise biko, ko aolakemya bouke, aoya nda Elene. 3Ko aki’nd’oyalak’eko nsanza isato, ko nk’asemw’ende wae acwe Sulia, Ba-Yuda baolangel’ende wango, ende aosangya wete ute la mboka ea Makedonia. 4Bamo baolocindeza nda Asia, wete Sopatulo owa Beloya, bon’owa Pulo; ko l’amo ba Tesalonike, wae Alisitaluko la Sekundo; la Ngayo owa Delube la Timoteo; la ba Asia, Tukiko la Tulofimo. 5Lolonde bane bacwaki nda joso, ko baotolendeza nda Tuloa. 6Tosemwaki lima Filipoi nd’afeka b’embile bia mampa isamba nyango, ko tolaat’iyo nda Tuloa nd’embil’etano; toyal’eko bembile nsambo.
7Nda mbile ea joso ea semaine, ak’is’otakanaka nda Mesa ea Nkolo, Paulo aolalaka, eka’nd’okelaka wae akende lobi; ko aolaka ndalaka elaka nko bonkeke w’otso. 8Ko totswa touke toki nda ntena e’aliko e’ilombe ek’is’otakanaka. 9Ko bosekota omo otangema Eutuko aokit’ase nda wiso wa fenêtre, aowa l’ais’ilo mongo; ko aki Paulo olakaka elingi mongo, ko bosekota’oko aokaka l’ais’ilo, aokwa lima nsamba e’isato e’ilombe, ko baoloambola aowa. 10Lolonde Paulo aokitela, aolokwela, aolokeketela, aokela, Talotongolake, ele loiko lokae lol’el’ende. 11Ko aki’nd’ounde, ko aotena mampa, ko aola, aotefela l’iyo elingi emo, elaka nko jefa jokya, aokenda. 12Baoyela bosekota ayoike, ko baocicima bouke nd’etema.
13Lolo iso tokendaki nd’asua nda joso, tosemwa tocwa Aso, wae tokondeza Paulo eko; el’ende mongo aezaki ngoko, eki’nd’osangyaka wae akende mboka e’okili. 14Aki’nd’okumanaka l’iso nda Aso, tolokondeza, tokita Mitulene. 15Tosemwa lim’eko, ko nda mbile ea lobi toya ntutama la Kio; la mbile ea lifi tosema nda Samo; ko toyalaki fele nda Tulogulio, ko nda mbile e’afeka tokita Mileto. 16Paulo asangyaki lisangya wete alekane Efeso, eki’nde ntalanga wae ateme elingi nda Asia; el’ende aokenda lomo-lomo, wae nkina akuseya lokita Yelusalema nda mbile e’elambo ea Ntuku itano. 17Ko lima Mileto aotom’omwa nda Efeso, ko aoleta bampaka ba ekelesia. 18Ak’iy’oyaka el’ende, aolasangela, aokela,
Inyo mongo lea, lima mbile ea joso eki’m’oyaka nda Asia, elenge ekami eki’mi l’inyo bikeke biuma, 19elenge eki’m’osaelaka Nkolo la linsimi ja lokai liuma, ko la mpisali, ko l’enyoko benkwelaki la biango bia Ba-Yuda; 20ko lea wete ncisa joi limoko lionga l’inyo, njolak’inyo nd’esayenge la nda tolombe la tolombe, 21njosangela Ba-Yuda la Ba-Elene eututaelo nda lokai lokiyo ele Nzakomba, ko l’imeezo ele Nkolo ekiso Yesu Masiya. 22L’aeyoko, bala, nkenda ntungama nd’olimo nda Yelusalema, ko mpea baoyi bankwela eko; 23imola nko Bolimo w’olotsi aonsangela nd’enanga beuma wae bikata l’aoyi b’elo bifonjiela. 24Lolonde mpotenya loiko lokami botema, lolonde ndanga wae nsiza lokendo lokami, l’olemo wa mpifo eki’m’oambaka lim’ele Nkolo Yesu, wae nsange nsango e’olotsi ea Nzakomba. 25Ko aeyoko, bala, njea wete iny’auma lofaena elongi ekami lenkina, em’ondetetaki el’inyo ko ondongozaki Likulaka. 26Nd’ewel’eko, nsangel’inyo mbil’ene, wae emi nde soto lim’alongo b’ant’auma. 27El’emi ncianga boangi losangel’inyo wango wa Nzakomba bouma. 28Lesany’inyo mongo, la botonga’ouma, boki Bolimo w’olotsi oilak’inyo baesanyi, wae loongole ekelesia ea Nkolo eki’nd’osombaka l’alongo’akae mongo. 29El’emi njea nd’afeka b’ekendelo ekami nkoi ya wale mongo ifotsw’el’inyo, ko ifaoikya botonga; 30ko banto bifemala lim’el’inyo mongo, bifotefel’aoyi ba njungusanya, babele bakimi wae bakim’iyo. 31Nd’ewel’eko, lesanya, ko lofwa wae années isato ncambya lolak’anto bauma l’otso la mbile o la mpisali. 32Aeyoko ndeky’inyo ele Nzakomba, la joi ja boya bokae, likemyey’inyo, ko likay’inye lisango el’iy’auma b’oeko. 33Ncikombola wolo la francs ko l’enkoto bi’onto nko loswele la mposa. 34Inyo mongo lea wete bakata’ane baombatela toma toki’m’oelaka wela, ko l’iyo baki l’emi ngoko. 35Njoleney’inyo l’aoyi’auma wae elenge endeji la nkakamba e’olemo lokambya ba tongoi, ko lofwa baoyi baki Nkolo Yesu mongo okelaka, Nkaka eolekola njaamba l’ekemo.
36Aki’nd’osangaka ngoko, aokus’aongo, ko aoonda l’iy’auma. 37Ko iy’auma baolela la mpisali, ko baokwela Paulo nkingo, ko baolosambela la baisers, 38lokeseli lokiyo lolekola nd’ewela ea joi liki’nd’okelaka, wae bafaena lenkina elongi ekae nye. Ko baolocindeza nd’asua.
Currently Selected:
Belemo Beki Bikima 20: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
