Belemo Beki Bikima 19
19
1KOKO aki Apolo nda Kolinto ko Paulo aosiz’otuwana bise bi’aliko, aoya nda Efeso, aotana bakimi’amo; 2aolakela, Inyo lambaki Bolimo w’olotsi, ak’iny’oimezaka? Baolokela, Nye, ntatoka wete Bolimo w’olotsi aokaema. 3Aolakela, Linamaki nd’inamelo ea na? Baokela, Nd’inamelo ea Yoane. 4Ko Paulo aokela, Nsosolo, Yoane inaki l’inelo ea mbututala ea baoyi’obe, ko aosangel’anto wae bamb’ende oya nd’afeka’akae, wete Yesu. 5Ak’iy’ookaka ngoko, baolinama nda lina ja Nkolo Yesu. 6Ko aki Paulo oafyak’akata bakae el’iyo, Bolimo w’olotsi aoy’el’iyo; ko baotefela nda mposo, ko baotel’aoyi. 7Iy’auma baki nga banto jom l’afe.
8Ko Paulo aolotswa nda sunagoga, aosanga nk’ofolu nsanza isato, aolalaka, ko aolaonda nd’ewela ea baoyi ba likulaka ja Nzakomba. 9Lolonde aki bamo ocilingana nd’etema, ko baotendol’otendo, ko baotanga Mbok’eko lotango j’obe nda joso j’anto b’etukuluku, aolimana el’iyo, aolimola bakimi, ko aolaka lilako wengi mbile nd’ilombe ya ecole ea Tulane. 10Ende aokela ngoko années ife, ko bant’auma bafetsaki nda Asia, la Ba-Yuda ko la Ba-Elene, baoloka joi ja Nkolo. 11Ko Nzakomba aokamba belemo bi’ofilo bi’enene l’akata ba Paulo; 12wae baotomba totambala la bito lima jonge likae ele banto ba nkangi, ko nkangi iolimana el’iyo, ko bekali bi’obe beolola. 13Lolonde nkanga y’ampulu y’a-Yuda bandeteta wiji la wiji, baomeka wete baande lina ja Nkolo Yesu el’iyo baki la bekali bi’obe, baokela, Mbond’inyo la nsimbi ea lina ja Yesu ondongoza Paulo. 14Ko bana b’aende nsambo b’ont’omo lina likae Sekewa, bosi Yuda, nkanga ea joso, bakelaki ngoko. 15Ko bokali w’obe aolamba, aolakela, Njea Yesu, ko njea Paulo; lolonde inyo lole na? 16Ko bonto oki l’okali w’obe aofumbwa el’iyo, aolaumba, aolaikamela, ko baolota lim’ilombe iko l’otaka la mpota. 17Ko joi liko joleana el’ant’auma bafetsa nda Efeso, Ba-Yuda la Ba-Elene; ko booma bokwel’iy’auma, ko lina ja Nkolo Yesu jokumyama. 18Ko bant’auke bandimezaki baoya, baolieza beketo bekiyo, ko baosanga beko. 19Ko bam’auke bakelaki baoyi b’akunda baotakanya benkanda bekiyo, baotumb’eko nda joso j’ant’auma; ko baoandola wiko wa beko, ko bokita francs kese itano. 20Eleng’eko joi ja Nkolo jokaka o nkakaka, ko joyalema la mpamba.
21Ko aki baoyi’ane osilaka, Paulo aosangya lisangya nd’olimo, wae a end’osiza lotuwana Makedonia la Akaya, acwe Yelusalema, aokela, Nd’afeka ba lokendo lokami eko, eji wae njene Loma ngoko. 22Aki’nd’otomaka bant’afe nda Makedonia lim’el’iyo bandokambyaki, wae Timoteo la Elaseto, ende mongo aocikala fele nda Asia.
23Nd’ekek’eko etongo e’enene eoliela nd’ewela ea Mbok’eko. 24Ele botuli owa argent, lina likae Demetulio, otulaki baidola ba argent ba Diana, oatelaki batuli’amo belemo beuke bia nkito; 25aotakany’iyo l’auma bakamb’elemo bia argent, aokela, Baowa, inyo lea wae l’olemo’one toata liaci likiso. 26Ko inyo lolena, ko loloka, af’endo nda Efeso kika, lolonde ntutama la bise biuma bia Asia, wae Paulo one aolak’anto bauke, ko aolaangola, asanga wete iko indemama l’akata ifa nzakomba: 27ko afa wae bolemo’one’okiso kika botutam’osotsama; lolonde ilombe ya nkinda ya nzakomba e’enene e’omoto Diana isotsama ngoko, ko ende mongo omemya Asia euma l’anto b’okili bouma ifimana nda jilangi likae lileki. 28Ak’iy’ookaka joi liko baokama la nkele, baobeleza, Diana owa Ba-Efeso aleki lokumo! 29Ko bonanga’ouma boyalema jengi mongo: ko banto baolikumwa la lokai lomoko nd’itenela y’isano, ko nda mboka baokanda Ngayo la Alisitaluko, banto ba Makedonia baamanaki la Paulo nda lokendo. 30Lolonde aki Paulo olangaka wae acwe el’anto, bakimi ntabimeza, 31Ko bamo ba-mpifo ba Asia baki l’oseka, iyo la Paulo, baolotomela bomwa, baoloonda wae afaotswa nd’itenela y’isano. 32Bamo baobeleza joi limo, ko l’ankina joi linkina; nd’ewel’eki etakano o jengi mongo; ko balekolaki bauke wae banto batea ncina ek’iy’otakanaka. 33Baoyela Alesandulo lim’etukuluku, ko Ba-Yuda baololekya nda joso. Ko Alesandulo aolasasa l’akata, aokela wae alokole boloko el’anto fele. 34Lolonde ak’iy’okotolaka wete ende ale Bo-Yuda, iy’auma baobeleza la lofoso lomoko nga heures ife, Diana owa Ba-Efeso aleki lokumo! 35Ko bokoci ow’onanga aosas’anto b’etukuluku, aokela, Iny’anto ba Efeso, bonto ofea wae bonanga wa Efeso bole wesanyi ow’ilombe ya nkinda ea Diana, ko ow’efoya ekweki lima Zeu, ale nko? 36Iny’andea wae bafaikyeya baoyi’ako bikoli, eji l’inyo wae loyale o wai, ko lofokele joi ja yoyo. 37Ko loyelaki bant’ane endo, iyo bafa baiyi ba nkinda la basaoli ba nzakomba ekiso. 38Nd’ewel’eko, nga Demetulio la batuli bale l’ende bale la joi ja nko loswele, juges bal’eko, ko l’anto ba-mpifo; kela balokole nd’elenge endeji. 39Lolonde ayaka lasa joi j’akambo’ankina, kela lisile nda nteke endeji. 40El’iso totutama la joi nd’eloko e’etongo ea mbil’ene, esamba ncina, ko tofokuseya losanga ncina ea etakano ene. 41Aki’nd’otefelaka ngoko, aofanzola etakano.
Currently Selected:
Belemo Beki Bikima 19: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
