Belemo Beki Bikima 2

1KO aki mbile ea ntuku itano okitaka, iy’auma bakotakai nd’itenela imoko. 2Nkako sasimo lolingo loyaki lima loola nga bompompo w’onene, ko ilombe iuma ik’iy’okit’ase iokama la loko. 3Ko ndeum iki nga tsa ikafwana ioleny’el’iyo; ko loleum lomoko ja tsa jolafema ele wengi’onto’okiyo. 4Ko iy’auma baokama la Bolimo w’olotsi, ko baangaki lotefela la ndaka inkina, ngoki Bolimo oakaak’etefelo.

5Ko nd’ekek’eko banto b’a-Yuda bamemyaki Nzakomba lima bise biuma bile nd’ase ba loola, baoyala nda Yelusalema. 6Ko aki lofoso loko okanaka, banto b’etukuluku baotakana, ko baolok’ooma mongo, eki wengi’onto ookaka wae baotefela lofoso lokae mongo. 7Iy’auma baolok’ooma, ko baokamwa, baokela, Bala, iy’ane bauma batefela bafa basi Ngalilaya nde? 8Na, iso toka wengi’onto nda lofoso lok’is’ootswaka ngamo? 9Ba-Palutia, la Ba-Madia, la Ba-Elama, ko l’iy’afetsa nda Mesopotamia, la nda Yudea la Kapadokia, la nda Ponto la nda Asia; 10la nda Fulungia la nda Pampulia, nda Ejipeto la nda bise bia Libwe ntutama la Kulene, ko l’afaya lima Loma, Ba-Yuda mongo ko la Bafaya bafaningwaki Ba-Yuda; 11Ba-Kulete ko la Ba-Alaba, iso taok’iyo batefela nda mposo ikiso mongo belemo bi’ofilo bia Nzakomba. 12Ko iy’auma baokamwa, ko baokakaana, baoluwana, Ncina ea joi line na? 13Lolonde bankina baolalengola, baokela, Iyo baokinda l’asanga b’aeyoko.

14Lolonde Petelo aolemala ende la ba-jom-l’omoko, aobeleza, aolakela, Inyo basi Yudea l’ant’auma bayala nda Yelusalema, kela lea joi line, ko lokoza baoyi’akami. 15Ele bant’ane bafolangwa, elenge etang’inyo; ele jefa jokita neuf heures kika; 16lolonde joi line lile joi liki boteli Yoele otefelaka wae

17Nzakomba aokela, Joi lifiela nd’embile bia nsukela,

Wete njifuteza Bolimo’okami ele bant’auma:

Ko bana’akinyo b’aende la b’amato bifotel’aoyi,

Ko basekota’akinyo bifena bienelo,

Ko bingambe bikinyo bifolota baloto;

18Onde, nd’embil’eko njifuteza Bolimo’okami

Ele bakwala’akami b’aende la b’amato; ko bifotel’aoyi;

19Ko njifeneya belemo bia nkakamwa nd’aliko,

Ko la ntaza nd’okili bole nd’ase;

Wete balongo, la tsa, ko la lomonge j’olinga:

20Jefa mongo lifofaningwa wilima,

Ko la nsonge ifofaningwa balongo,

Nda joso j’eyelo ea mbile ea Yawe,

Wae mbil’eko ea nene ea lokumo:

21Ko joi lifiela wae wengi’onto ondeta lina ja Yawe nd’oondo ifoika o mbaika.

22Iny’anto ba Yisalaele, lokoza baoyi’ane: Yesu owa Nazaleta aki bonto oki Nzakomba okumyak’el’inyo l’elemo bi’ofilo la bia nkakamwa ko la ntaza iki Nzakomba okelaka l’ende nd’etei ekinyo, elenge endea inyo mongo; 23ende aolekyama la wango mongo la njea eki joso ea Nzakomba, ko inyo mongo loomak’ende nd’ekulusu l’akata b’anto basamba bisekyelo; 24ko Nzakomba aoloetola lim’iwa, ko aolotungola lim’elo e’iwa; eki’nde ntatungameya l’iko. 25Ele Dawidi aotefela nd’eloko ekande,

Njenaki Yawe bikeke biuma nda joso j’elongi ekami;

Nd’ewela wete ende ale nda wiji’okami w’elome, wae mpaofukyama nye;

26La ncin’eko botema’okami bokem’ekemo,

Ko loleum lokami losalangana;

Ko la jonge likami lifoyala nda lolendezo;

27Ele we ofaocika bolimo’okami nd’Adese,

Ko la ngoko ofaocika Okawe Ondeji wete ene efonju.

28Onjeneyaki mboka ya loiko:

Wifonkinza l’osalangano l’elongi ekawe.

29Balongo, nsangel’inyo fole nd’eloko ea engambe Dawidi, wae awaki, ko akundamaki, ko boomba’okae bole l’iso o mbil’ene. 30Nd’ewel’eki’nde boteli, ko aolea wae Nzakomba aolocikel’elaka, wete lim’ele bana’akae omo ifokit’ase nda ngwende ekae e’okulaka; 31nd’ewel’eki’nd’oenaka ngoko nda joso atelaki lotelo j’eetswelo ea Masiya lim’iwa, wae ende ntacikala nd’Adese, ko jonge likande ntajen’efonju nye. 32Nzakomba aetolaki Yesu one, nd’ewel’eko is’auma tole temoins bakae. 33Aki’nd’osangemaka nda wiji wa likata ja Nzakomba j’elome, ko eki’nd’oambaka elaka ea Bolimo w’olotsi lim’el’Ise, aolutez’one, onden’inyo ko ondok’inyo. 34Eki Dawidi ntulela nda loola: lolonde ende mongo aokela,

Yawe aokela Nkolo ekami,

We, kit’ase nda wiji wa likata likami j’elome,

35Elaka nko njile baini’akawe nd’ase b’akaka’ake.

36Nd’ewel’eko, kela bant’auma b’ilongo ya Yisalaele bea nsosolo mongo, wete Nzakomba aosangya Yesu one ok’iny’oakaka nd’ekulusu wae ayaleme Nkolo la Masiya.

37Ak’iy’ookaka baoyi’ako, baotenya nd’etema la lokeseli, ko baokela Petelo la bikima biuma, Balongo, tifokela mo? 38Ko Petelo aolakela, Loututala baoyi’obe, ko linama nd’asi nk’iny’auma nda lina ja Yesu Masiya ele etungwelo lima baoyi’obe bakinyo; ko lifoata nganji wae: Bolimo w’Olotsi. 39Ele elaka ele nk’el’inyo, l’ana’akinyo, ko l’anto bauma nko loswele bae Yawe Nzakomba oet’el’ende. 40Ko aolasangela baoyi’amo bauke, ko aolakama, aokela, Loiky’inyo mongo lim’eotswelo ene e’okakatano. 41Ko iy’andambaki baoyi’akande baolinama nd’asi; ko banto nga nkot’isato baoamana l’iyo nda mbil’eko. 42Ko iyo baoyala la loncinji nda lilako ja bikima la nd’esanganelo, la nd’etenelo ea mampa ko la nda beondo.

43Nkako booma bokwela bant’auma; ko belemo bia nkakamwa ko la ntaza baokelama la bikima. 44Ko iy’auma bandimezaki baoamana, ko baki nd’esangano ea toma touma; 45ko baotekya liaci la toma tokiyo, ko baokafela bant’auma, ngoki bonto nko loswele oelenganaka. 46Ko bembile beuma baoyala la lokai lomoko nd’ilombe ya Nzakomba, ko baotena mampa nda tolombe tokiyo, ko baleka toma l’osalangano l’etema bia nsosolo, 47baofika Nzakomba, ko baosimama l’ant’auma. Ko Nkolo aoamanya l’iyo wengi’aefa banto baikyama.

Currently Selected:

Belemo Beki Bikima 2: NTMN58

Highlight

Copy

Compare