Belemo Beki Bikima 18
18
1ND’AFEKA b’aoyi’ane Paulo aolimana Atenia, aoya nda Kolinto. 2Aotan’eko Bo-Yuda otangema Akwila, bosi Ponto, ende la waji’okae Pulisekila, mpanga bayaka lima Italia, eki Kulaudio oitanyaka Ba-Yuda bauma lima Loma; ko aolotswa ele bant’ako; 3ko la ncina ek’iyo l’ende oeaka bolemo’omoko, aokit’ase l’iyo, ko baokamb’olemo; bolemo bokiyo boki nsasamba ea tolombe ta bito. 4Ko aolaka nda sunagoga wengi Sabata, ko aolikola Ba-Yuda la Ba-Elene bikoli.
5Lolonde aki Sila la Timoteo oyaka lima Makedonia, Paulo aokama la joi nkakama, aosangela Ba-Yuda wae Yesu ale Masiya. 6Ko ak’iy’oikyaka bikoli, ko baosaola Nzakomba, aofukusa benkoto bekae, aolakela, Balongo’akinyo bayale nd’etsa bekinyo mongo; emi nde soto: lim’aeyoko njifocw’ele Bafaya. 7Aolimana lim’eko, ko aolotswa nd’ilombe y’ont’omo otangema Titio Yuseto, bomemyi owa Nzakomba, ko ilomb’ikae iosingitana la sunagoga. 8Ko Kulisipo, chef ea sunagoga, aolimeza Nkolo, ende l’ilongo ikae iuma; ko bouke wa banto ba Kolinto baoloka, ko baolimeza, ko baolinama nd’asi. 9Ko Nkolo aosangela Paulo nd’enelo l’otso, aokela, Toangake, lolonde sanga o nsasanga, toyalake wai; 10el’emi nde la we, ko nk’onto okokeleya joi j’obe: el’emi mbata bant’auke nd’onanga’one. 11Ko aoyal’eko année emoko la nsanza botoa, ko aolalaka joi ja Nzakomba.
12Lolonde aki Ngalio gouverneur ea Akaya, Ba-Yuda baolemala la lokai lomoko, baosuka Paulo isuki, baoloyela nda joso ja ngwende e’akambo, 13baokela, Bont’one aolak’anto wete bamemya Nzakomba l’elenge efeji la bisekyelo. 14Lolonde aki Paulo okelaka wae aumbol’omwa bokae, Ngalio aokela Ba-Yuda, Inyo Ba-Yuda, nga joi line lile j’obe, nkina ja lofundo ja loma, siki njokoz’inyo; 15lolonde nga likambo lile j’aoyi ba ntefela, la baina, la bisekyelo bikinyo mongo, inyo mongo losiza likambo liko: mpange wae ntene bakambo’ako. 16Ko aolaitanya lima ngwende ekae e’akambo. 17Ko iy’auma baokanda Sosetene, chef ea sunagoga ea Ba-Yuda, baolokunda nda joso ja ngwende e’akambo. Lolonde Ngalio ntakanela baoyi’ane bauma.
18Aki Paulo omongaka bembile beuke nd’afeka b’aoyi’ane, aosesana#18.18 aosisana. l’alongo, aosemwa, ko aocwa Sulia, ende la Pulisekila la Akwila; ende aokoola botsa’okae nda Kenkulea; eki’nde osimbaka nsimbi. 19Baoya nda Efeso, ko aolacik’eko; lolonde ende mongo aolotswa nda sunagoga, aolaka Ba-Yuda. 20Ko ak’iy’ouolaka wae acikale fele, ntimeza; 21lolonde aosesana l’iyo, aokela, Njifokita nd’elambo endiela nda Yelusalema; nga Nzakomba alanga, njifut’el’inyo lenkina; ko aosemwa lima Efeso. 22Aki’nd’osemaka nda Kaisalia, aosafwa, ko aoluola ekelesia, ko aokitela nda Antiokia. 23Ko aki’nd’otemak’eko fele, aolimana, ko aotuwana bise bia Ngalatia la Fulungia, ka-ka, ko aokemya bakimi’auma.
24Ko Owa-Yuda omo lina likae Apolo, bosi Alesandulia, botefeji owa nkaso, aoya nda Efeso. Ende aolekela la bikotelo bia Nzakomba njekela mongo. 25Bont’one aolakema la mboka ea Nkolo, ko eki’nd’okaka la mposa nd’olimo, aosanga, ko aolaka baoyi ba Yesu o ci, lolonde eaki nk’inelo eki Yoane kika; 26ko aanga losanga nko bofolu nda sunagoga. Lolonde aki Pulisekila l’Akwila ookak’ende, baolokola el’iyo, baolofolaza mboka ea Nkolo fole mongo. 27Ko aki’nd’olangaka wae afende nda Akaya, balongo baolokambya, ko baokotela bakimi wete boambe; ko aki’nd’okite, aokamby’iyo bandimezaki l’oya o nkakambya; 28eki’nde oumbaka Ba-Yuda nda bikoli l’umbelo mongo, la nd’esayenge, eki’nd’oeneyaka la bikotelo bia Nzakomba wae Yesu ale wete Masiya.
Currently Selected:
Belemo Beki Bikima 18: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
