Belemo Beki Bikima 16
16
1KO ende aoya nda Delube la Lusetula ngoko; ko bala, bokimi omo aki eko, otangema Timoteo, nyango ekae bosi Yuda ondimezaki, lolonde ise ekae aki bosi Elene. 2Ende aki la lokumo j’olotsi eka balongo baki nda Lusetula la Ikonio. 3Paulo aolanga wete akende l’ende; aolokola, aolotenela nsonge, nd’ewela ea Ba-Yuda baki nda bise biko: ek’iy’auma oeaka wae ise ekae aki bosi Elene. 4Ak’iy’otuwana benanga, baolakitsa besise beki bikima la bampaka nda Yelusalema oasiselaka wae bafonge beko. 5Nkako bikelesia biokema nd’imeezo eko, ko biofula nd’oanji wengi’aefa.
6Baotuwana bise bia Fulungia la Ngalatia, nd’ewel’eki Bolimo w’olotsi oafekaka wae bafongoza bosako w’olotsi nda Asia; 7ko ak’iy’otutama la Musia, baomeka wete bacwe nda Bitunia; lolonde Bolimo wa Yesu ntimeza; 8baolekana Musia, baokitela nda Tuloa. 9Ko enelo eolenya ele Paulo l’otso; wae bonto owa Makedonia akemi, aonda, aokela, Yaka nda Makedonia otokamby’iso. 10Aki’nd’oenaka enelo eko, nkakoyoko tasaki wae tokende nda Makedonia, ek’is’otangaka wete Nzakomba atetaki wae tosange nsango e’olotsi nk’eko.
11Nd’ewel’eko tosemwa lima Tuloa, tofendaki nda Samotulake ci, ko nda mbile ea lobi tokita nda Neapoli; 12lim’eko tocwa Filipoi, bonanga wa joso w’ese ea Makedonia, lifeta j’a-Loma; toyala nd’onanga’one bembile bemo. 13Ko nda mbile ea Sabata tolola nd’anza ba wiso w’onanga, tocwa nd’eselo ea ntando, tokanela wete itenela ya boondo il’eko; tokit’ase, ko totefela l’amato batakai. 14Ko bomot’omo otangema Ludia, botekyi owa bito bia pourpre, bosi Twatila, omemyaki Nzakomba, ende aolok’aoyi’akiso, ko Nzakomba aokombola botema’okae, ko aolokoza baoyi baki Paulo osangaka. 15Aki’nd’oinamaka nd’asi, ende l’iy’aki nd’ilombe ikae, aotoonda, aokela, Ayaka lonjez’emi nde ow’imeezo ele Nkolo, loyaka nd’ilombe ikami, loyal’eko. Ko aotokama.
16Koko nk’acw’iso nd’itenela ya boondo, bomoto omo oki la bokali wa Putono, oatelaki bankolo’akae bouke w’aumba l’aoyi ba nkanga, aofomana l’iso. 17Ende aokimana la Paulo l’iso, aobeleza, Bant’ane bale bakwala ba Nzakomba Eleki ndekola, bandeney’inyo mboka ea loiko. 18Aokela ngone bembile beuke. Lolonde Paulo aokengwana, eki’nd’ookaka lokeseli mongo, aokela bokali, Nkosangela we nda lina ja Yesu Masiya, ola lim’el’ende! Ko bolola nkakoyoko.
19Lolonde aki bankolo bakae oenaka wae eatelo ea nkito ekiyo eolimana, baokanda Paulo la Sila, baolabela nd’itenela y’esombe nda joso ja ba-mpifo, 20ko ak’iy’oayelaka ele capitaines, baokela, Bant’ane, Ba-Yuda, baofukya bonanga’okiso o mpafukya mongo; 21ko baolak’anto bilenge bifeji l’iso Ba-Loma wae tambe. 22Ko banto b’etukuluku baolemala el’iyo, baolasuk’isuki, capitaines baolakanjola bito bikiyo, ko baolasisela wete bakundame la beambo. 23Ak’iy’oakundaka la beambo beuke, baolausa nd’ilombe ya njanga, ko baosangela wesanyi wae aesany’iyo njesanya mongo; 24ko aki’nd’otomamaka lotomo loko, aolausa nd’ilombe ya njanga iki nd’etei inongo, ko aolila bakaka’akiyo nda bifoke. 25Lolonde nga bonkeke W’otso, Paulo la Sila bayoonde ko bayembele Nzakomba nsau, ko njanga baolaokoza; 26ko sasimo bokili bofukaki mpafuka, elenge wae jango j’ilombe ya njanga jofukyama; ko nkakoyoko bikuke biuma biokombwa; bifoke bi’ant’auma biakwa. 27Wesanyi aoetswa lim’ais’ilo, aolena bikuke bi’ilombe ya njanga biokombwa, ko aolosola ifaka ikae y’etumba, akela wae aome bomongo, eki’nd’otangaka wae njanga baolota. 28Lolonde Paulo aobeleza, Tokeelake we mongo joi nye; el’is’auma tol’endo. 29Aoleta totswa, aolikumwa nd’etei, aokwa ndalenga l’ofolu nda joso ja Paulo la Sila, 30aolaoza, ko aokela, Bankolo, nkele na wete mbike? 31Baokela, Imeza Nkolo Yesu, ko wifoika, we l’ilongo ikawe. 32Ko baolosangela joi ja Nkolo, l’ende l’ant’auma baki nd’ilombe ikae. 33Ko nda heure eko e’otso, ende aolakola, aolasola mpota; ko nkakoyoko aolinama nd’asi, ende l’ilongo ikae iuma. 34Aolayela nd’ilombe ikae, aolalekeza toma, aosalangana bouke mongo, ende l’ilongo ikae, eki’nd’oimezaka Nzakomba.
35Aki jefa okya, capitaines baotoma police, baokela, Tungola bant’ako. 36Ko wesanyi ow’ilombe ya njanga aosangela Paulo baoyi’ako, aokela, capitaines baotom’omwa wae ntungol’inyo; nd’ewel’eko, lola aeyoko, lokenda o kuci. 37Lolonde Paulo aolakela, Baotokund’is’anto Ba-Loma nda joso j’anto, iso batumbama likambo nye, ko baotusa nd’ilombe ya njanga; kamba aeyoko batoza la lokuko nde? O nye! Lolonde baye iyo mongo, batoz’iso. 38Ko police baosangela capitaines baoyi’ane: ko iyo baolok’ooma mongo, ek’iy’ookaka wae bale Ba-Loma. 39Ko baoya, baolaonda; ko ak’iy’oaozaka, baolauola wae bimane lim’onanga. 40Baolola lim’ilombe ya njanga, baolotswa nd’ilombe ya Ludia; ko ak’iy’oenaka balongo, baolacicimya nd’etema, ko baokenda.
Currently Selected:
Belemo Beki Bikima 16: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
