Belemo Beki Bikima 15
15
1KO bant’amo baokitela lima Yelusalema, ko baolaka balongo, baokela, Lako lotenama nsonge l’elenge e’esekyelo ea Mose, lofaoika nye. 2Ko aki Paulo la Balunaba oikyana l’ant’ako bikoli, ko baoluwana l’iyo, bakimi baosona Paulo la Balunaba, ko l’amo bakiyo, wae bacwe Yelusalema ele Bikima l’ampaka nda joi line. 3Baki nd’ekelesia baolacindeza nda mboka, ko iyo baotuwana Poinike la Samalia, baosanga eututaelo ea Bafaya lim’aoyi’obe, ko baosalanganya balongo’auma nsalanganya mongo. 4Ak’iy’okitaka Yelusalema, ekelesia la bikima l’ampaka baolaamba, ko iyo baosanga baoyi’auma baki Nzakomba okelaka l’iyo. 5Lolonde bamo b’oloi w’afalusi bandimezaki, baokela, Eji wae batename nsonge, ko balakeme wete iyo bafonge bisekyelo bia Mose.
6Bikima l’ampaka baotakana wae bengele joi liko. 7Ak’iy’oikyanaka bikoli bouke, Petelo aolemala, aolakela.
Balongo, inyo lea wete kalakala Nzakomba ansonak’emi lim’el’inyo, wete Bafaya boke baoyi b’osako w’olotsi l’omwa’okami, ko bimeza. 8Ko Nzakomba, ondea botema, aolaimeza la lotaza, eki’nd’oakaaka Bolimo w’olotsi, o ngoki’nde otokaak’iso mongo; 9ko ende ntacikwany’iso l’iyo, eki’nd’ofetolaka betema’ekiyo l’imeezo. 10L’aeyoko lomeka Nzakomba ncina na? Lolanga wae lile bolito nda nkingo ea bakimi, bok’iso l’aise’akiso ntatokuseyaki nde? 11Lolonde iso timeza wete tifoika l’oya wa Nkolo Yesu, iso l’iyo eleng’emoko.
12Etukuluku euma e’akimi baoyala wai; ko baolokoza nsango ea Balunaba la Paulo ea ntaza l’elemo bia nkakamwa beki Nzakomba okelaka l’iyo nda bise bi’afaya. 13Ak’iy’osiz’otefela, Yakobo aolamba, aokela, Balongo, lonjokoza: 14Simona aosang’elenge eki Nzakomba oyaka ele Bafaya nda joso, wae akole lim’el’iyo banto nd’eloko ea lina likae. 15Ko baoyi baki bateli baosongana la joi liko; ngole joi likotamaki,
16Nd’afeka b’aoyi’ane njifuta,
Ko njifotonga lenkina ilombe iki Dawidi ikwei;
Ko njifotonga lenkina ilombe ifitana.
Njifemya iko lenkina;
17Wae banto baciki base Yawe,
Ko la Bafaya bauma, batangema la lina likami,
18Yawe ondeneya baoyi’ane lima kalakala, aotefela ngoko. 19Nd’ewel’eko joi linden’emi bolotsi wete tofotumole Bafaya bako bakengwana ele Nzakomba; 20lolonde takotel’iyo wae bakile linyamo ja baidola, la jibi, la nyama iomamaki la nkakoma, ko l’alongo. 21Ele Mose lima kalakala ale l’asangi’akae nd’enanga beuma, ko baanda benkanda bekae nda basunagoga wengi Sabata.
22Nkako bikima l’ampaka l’ekelesia euma baokanela bolotsi wae basone bant’am’akiyo, ko batom’iyo nda Antiokia la Paulo la Balunaba; ko baosona Yuda otangema Balusaba, la Sila, banto b’imemya el’alongo: 23ko baokota bonkanda bocwe l’iyo ngone, Bikima la bampaka b’alongo, ele balongo ba Bafaya bale nda Antiokia la Sulia la Kilikia, bosalangano el’inyo; 24Toloka wae bamo bacwaki lim’el’iso baotumol’inyo l’aoyi ba ntefela, ko baofukya betema’ekinyo; iso ntatotom’iyo nye: 25nd’ewel’eko totanga bolotsi wete, ek’is’oyalemaka lokai la wango bomoko nda joi line, tosone banto, tatom’iyo el’inyo la Balunaba la Paulo balangema l’iso, 26banto bakotutsi l’iwa nd’eloko ea lina ja Nkolo ekiso Yesu Masiya. 27Nd’ewel’eko, totoma Yuda la Sila, ko iyo mongo bifosangel’inyo nk’aoyi’ane l’omwa. 28Ele Bolimo w’olotsi atang’olotsi, ko l’iso o ngoko, wete tofil’inyo bolit’omo, imola nko baoyi’ane bandeji; 29wae lokile nyama ilekyama ele baidola, la balongo, la nyama iomamaki la nkakoma, ko la jibi: wenaka lokel’aoyi’ako, lifoonga bolotsi. Lofonga lokema.
30Ak’iy’otomamaka, baokitela nda Antiokia, koak’iy’otakanyaka etukuluku e’akimi, baolakitsa bonkanda. 31Ak’iy’oandaka boko, baosalangana l’aoyi ba ncicimya. 32Ko Yuda la Sila, iyo mongo baki bateli, baolak’alongo l’aoyi’auke, ko baolakemya. 33Ak’iy’otemak’eko fele, balongo baolatoma la kuci wae bute el’iy’andatomaki. 34[Lolonde Sila aotang’olotsi wae acikal’eko fele], 35Ko Paulo la Balunaba baomonga nda Antiokia, baolaka ko baolongoza bosako w’olotsi wa joi ja Nkolo, iyo l’am’auke o ngoko.
36Nd’afeka b’embile bemo Paulo aokela Balunaba, Kela tute aeyoko, tene balongo nd’enanga beuma bek’is’osangaka joi ja Nkolo, tengele elenge eyal’iyo. 37Ko Balunaba aosangya wae batombe l’iyo Yoane ole la lina ja nkombo Malako. 38Lolonde Paulo ntatanga bolotsi wae batomb’ende ondasundolaki nda Pampulia, ko ntakenda l’iyo nda bolemo. 39Ko baseki lisa, ko nd’ewel’eko baokafwana, ko Balunaba aotomba Malako l’ende, aosemwa aocwa Kupulio; 40lolonde Paulo aosona Sila, ko aokenda, aki balongo oalekyaka ele boya wa Nkolo. 41Ende aotuwana Sulia la Kilikia, aokemya bikelesia.
Currently Selected:
Belemo Beki Bikima 15: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
