Belemo Beki Bikima 13
13
1BATELI l’alaki, wete Balunaba, la Simona otangemi Nigela, la Lukia owa Kulene, la Manae webi owa Elode e’okulaka, ko la Saula, baki nda Antiokia nda ekelesia eki eko. 2Ak’iy’osaelaka Nkolo, ko baokila toma, Bolimo w’olotsi aokela, Lombuleza Balunaba la Saula nk’el’olemo boki’m’oaetaka. 3Nkako, ak’iy’okilaka toma, ko baoonda, baolafy’akata bakiyo el’iyo, ko baolatoma.
4Ak’iy’otomamaka la Bolimo w’olotsi, baokitela nda Seleukia; lim’eko baosemwa, ko baocwa Kupulio. 5Ak’iy’okitaka nda Salamia, baosanga joi ja Nzakomba nda basunagoga b’a-Yuda; ko Yoane aki l’iyo nga bokambyi’okiyo. 6Ak’iy’otuwanaka ekole euma, baokita Pafo, ko baotan’eko boloki’omo, boteli ow’ampulu, bosi Yuda, otangema Balayesu; 7ende akokit’ase eka gouverneur, Selugio Paulo, bonto owa wanya. Ende aoleta Balunaba la Saula el’ende, aolanga wae okoza joi ja Nzakomba. 8Lolonde Eluma nkanga eko (liko wae lina likae limo) aolasuka, aolasa wete akengole gouverneur lim’imeezo eko. 9Lolonde Saula, otangema Paulo ngoko, aokama la Bolimo w’olotsi, aoloala te, 10aokela, We okama l’olokotano l’obe bouma, bona owa Liloka, wini ow’aoyi ba liongi bauma, ofambya oungusanya mboka ya Nzakomba ya ci nde? 11L’aeyoko, bala, likata ja Nkolo lile nk’ele we, ko wifoyala owei’aiso, ofaena jefa elingi fele. Nkakoyoko lomonge la wilima baolokwela; ko aolesesa, oas’onto ondokita la likata. 12Aki gouverneur oenaka joi likelamaki, aolimeza, ko aokamwa la lilako ja Nkolo.
13Paulo l’alongo’akae baosemwa lima Pafo, baokita nda Pelunga nd’ese ea Pampulia; ko Yoane aoliman’el’iyo, aoluta nda Yelusalema. 14Lolonde ak’iy’otuwana Pelunga, baoya nda Antiokia ea Pisidia; baolotswa nda sunagoga nda mbile ea Sabata, ko baokit’ase. 15Ak’iy’osizaka loanda benkanda bia bisekyelo l’ateli, chefs ba sunagoga baolasisela, baokela, Balongo, ayaka lole la joi limo likemy’anto, losanga liko. 16Paulo aolemala, aolaeta la likata, aokela, Iny’anto ba Yisalaele, l’iny’aanga Nzakomba, lokoza; 17Nzakomba ea bant’ane ba Yisalaele aosona baise’akiso, ko aokumya bant’ako ak’iyo nda lifaya nd’ese ea Ejipeto, ko aolayela lim’eko la lo ja mpamba. 18Ko ende ikaki botema nda bilenge bikiyo nga années ntuk’inei nd’etekeleke. 19Ko aki’nd’ofitaka banto ba bise nsambo nda Kanana, aolaka bise bikiyo nga lisango, années nga benkam’enei la années ntuku itano, 20ko nd’afeka aolaka juges, elaka nk’ekeke ea Samwele owa boteli. 21Ko nd’afeka baoluola wae baate bokulaka owa roi; ko Nzakomba aolaka Saula bona owa Kisi, ow’oloi wa Benyamina, années nga ntuk’inei. 22Aki’nd’oimolak’ende, aolemya Dawidi wae ayale bokulaka’okiyo owa roi; aosanga nsango nd’ewel’ekae, aokela, Njolena Dawidi, bona owa Yisai, bonto ngole botema’okami mongo, ende ifokela wango’okami bouma. 23Nzakomba aoyela Boikyi Yesu ele Ba-Yisalaele lim’ele bana b’ont’one, ngoki elaka ekande; 24aki’nde atafoya, Yoane aosanga nsango e’inelo ea mbututala lim’aoyi’obe ele bant’auma ba Yisalaele. 25Aki Yoane okambaka bolemo’okae, aokela, Lontang’emi na? Mp’ende nye. Bala, omo ifoya nd’afeka’akami, ko mpeji wae ntungole bikoto bia bakaka’akae. 26Balongo, bana b’ilongo ya Abalayama, l’amo’akinyo baanga Nzakomba, joi ja loiko lone jotomama el’iso. 27Iy’afetsa nda Yelusalema la ba-mpifo bakiyo, ek’iyo ntaboea Ende l’aoyi b’ateli baandema wengi Sabata, iyo baolieza bako, ek’iy’oumbak’ende likambo. 28Ko ak’iyo ntabena eloko e’iwa el’ende, baoluola Pilato wae aomame. 29Ak’iy’osizaka baoyi’auma bakotamaki nd’eloko ekae, baolokiteza lim’otamba, ko baoloambya nd’oomba. 30Lolonde Nzakomba aoloetol’ende lim’ele bawei; 31ko aolenya bembile beuke el’iy’ayaki l’ende nda Yelusalema lima Ngalilaya, ko iyo bal’aeyoko temoins el’anto. 32Ko iso toyel’inyo bosako w’olotsi w’elaka ecikamaki el’aise, 33wete Nzakomba aoliez’elaka eko ele bana’akiso, eki’nd’oetolaka Yesu lim’ele bawei; elenge ekotama nda Nsau e’ife, W’ole Bona’okami, njokoota mbil’ene. 34Ko nda joi liko wete aoloetola lim’iwa, ko afaena efonju, aokela ngone, Njifokay’inyo bekako bia nsakema bi’oeko la bia seko beki Dawidi. 35Nd’ewel’eki’nd’okelaka nda Nsau emo, Ofaolekya Okawe ow’oeko wae ene efonju nye. 36Ele Dawidi, aki’nd’osiz’okela wango wa Nzakomba nd’eotswelo ekande, aoletama, ko aokundama l’aise’akae, ko aolen’efonju. 37Lolonde ende oki Nzakomba oetolaka lim’ele bawei, nten’efonju nye. 38Nd’ewel’ene, balongo, kel’inyo lea wae l’ont’one etungwelo lima baoyi’obe esangema el’inyo; 39ko os’oimeza baoyi’ane, ifoyengwa l’ende nd’aoyi baki’nde ntayengwaka la bisekyelo biki Mose. 40Nd’ewel’eko, loalaka, nyango joi liko likotamaki l’ateli lifiele el’inyo, wae:
41Loalaka, inyo batengweli, lokamwaka, lofitana;
El’emi nkamb’olemo nd’embile bekinyo,
Mpeka la bont’omo asangel’inyo, lofaimeza bolem’oko nye.
42Ko ak’iy’oole, baoonda bikima wete baoyi’ane basangeme el’iyo nda Sabata eoya. 43Ko aki etakano ofalangana, banto ba Yuda l’afaya bamo bafaningwaki Ba-Yuda, bamemyi ba Nzakomba, baokimana la Paulo la Balunaba; ko iyo baotefela l’iyo, ko baolakama wete basekwa nd’oya wa Nzakomba seko.
44Sabata emo eoya, ko nga bant’auma b’onanga baotakana wae bokoza joi ja Nzakomba. 45Lolonde aki Ba-Yuda oenaka banyenga b’anto, baolok’inkunya, baoliky’aoyi baki Paulo osangaka bikoli mongo, baosaola isaola. 46Lolo Paulo la Balunaba baotefela la nkaso, baokela, Eji wae joi ja Nzakomba lisangeme nda joso el’inyo; nd’ewela wae lotona, ko loleza inyo mongo wete lofeji la loiko ja seko, bala, telela Bafaya. 47Ele Nkolo aototoma o ngoko, aokela,
Njokila we fole ea Bafaya,
Wae oyaleme eikyelo el’anto bauma, elaka nko ntundo mongo y’okili.
48Aki Bafaya ookaka joi line, baosalangana, baokumya joi ja Nzakomba; ko iy’auma basonama ele loiko ja seko baolimeza. 49Ko joi ja Nkolo jolongwana nda bekako’eko beuma. 50Lolonde Ba-Yuda baolangela bamato bamemyi ba Nzakomba ba mpifo, la bingambe bia bonanga, wae banyokole Paulo la Balunaba, ko baolaitanya lima bise bikiyo. 51Lolonde iyo baotitola biucu bia bakaka’akiyo ele bant’ako, ko baoya nd’Ikonio. 52Ko bakimi baokama l’osalangano la Bolimo w’olotsi.
Currently Selected:
Belemo Beki Bikima 13: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
