Belemo Beki Bikima 11
11
1KO bikima l’alongo baki nda Yudea baoloka wete Bafaya baolamba joi ja Nzakomba ngoko. 2Aki Petelo oyaka nda Yelusalema, iy’atenamaki nsonge baolikya bikoli, 3baokela, W’otswaki el’anto batatenama nsonge, ko oleki toma l’iyo, 4Lolonde Petelo aang’oasangela joi liko lim’iango, 5aokela, Emi nki nd’onanga wa Yafo, ko mbondaki; njolen’enelo nga nda liloto, wae wimaka ng’eto e’enene eokitela lima loola, ekitama nd’atungu banei; ko eyaki nk’el’emi: 6aki’m’oalaka eko te, njokanela, ko njolena nyama iuma y’akaka’anei y’okili, la nyama ya wale, la towawa tondakula, ko la tofulu ta loola. 7Ko njoloka lofoso lonkela, Emala, Petelo, boma ko leka. 8Lolonde njokela, Afa ngoko, Nkolo; ewela wae bofambe wa nko loswele la wa linyamo botafotswa nd’omwa’okami. 9Ko lofoso lolamba wamba w’efe lima loola, Yomba iki Nzakomba ofetolaka, totangak’iko mbindo. 10Ko joi line jokelama bekel’esato; ko bokolama lenkina nda loola. 11Ko bala, nkakoyoko bant’asato batomamaki el’emi lima Kaisalia bakemi nda joso j’ilombe ik’is’okitak’ase. 12Ko Bolimo aontoma wae nkende l’iyo, nk’okakaano. Balongo’ane botoa baocwa l’emi; ko tolotswa nd’ilombe y’onto’oko; 13ende aotosangeia elenge eki’nd’oenaka ekima ea loola emi nd’ilombe ikae, ko aokela, Tom’anto nda Yafo, bete Simona ole la lina ja nkombo Petelo; 14ende ifokosangela baoyi bae we l’ilongo ike iuma oika. 15Ko aki’m’oangaka lotefela Bolimo w’olotsi aolakwela, ngoki el’iso nd’iango. 16Ko njofwaki joi liki Nkolo, elenge eki’nd’okelaka, Yoane inak’anto nd’asi, nsosolo; lolonde inyo lifinama nda Bolimo w’olotsi 17Ayaka Nzakomba akaak’iyo nganji nk’eko eki’nd’otokaak’iso, ak’is’oimezaka Nkolo Yesu Masiya, emi nki na wae nsukeya Nzakomba? 18Ak’iy’ookaka baoyi’ako, baoyala wai, ko baomemya Nzakomba, baokela, Nzakomba aokaya Bafaya ngoko eututaelo lim’aoyi’obe wae baike.
19Iy’afalangai wiji la wiji nd’enyoko beangaki nd’ewela ea Setefano baokenda, baokita Poinike, la Kupulio, ko la Antiokia, lolo baosanga nsango ea Joi nk’ele Ba-Yuda kika. 20Lolonde bam’akiyo, basi Kupulio la basi Kulene, ak’iy’okitaka Antiokia, baotefela la Ba-Elene ngoko, baolaongoza bosako w’olotsi wa Nkolo Yesu. 21Ko likata ja Nkolo liki l’iyo; ko bouke w’anto baolimeza, ko baokengwana ele Nkolo. 22Ko bosako wa joi likiyo bolokana nd’atoi ba ekelesia eki nda Yelusalema; ko baotoma Balunaba nda Antiokia; 23ko aki’nd’oyaka, ko aolena boya wa Nzakomba, aosalangana: ko ende aolakemy’iy’auma, wae bakatemele Nkolo la wango w’otema; 24nd’ewela wae ende aki bonto ow’olotsi, okamaki la Bolimo w’olotsi ko l’imeezo; ko bant’auke baoamana la Nkolo. 25Ende aocwa Taluseu oasa Saula; 26ko aki’nd’otanaka, aoloyela nda Antiokia. Ko année emoko euma iyo baotakana l’ekelesia, ko baolaka bant’auke mongo; ko bakimi baotangema Ba-Masiya nda Antiokia nda joso.
27Nd’ekek’eko bateli baokitela lima Yelusalema, baoya nda Antiokia. 28Om’okiyo otangema Agabo aolemala, aoleneya la Bolimo wae eto mongo ea nzala ifokwela bise biuma bi’okili; ko eko ielaki nd’ekek’eki Kulaudio Kaisala. 29Ko bakimi’auma, wengi’onto ngoki’nd’oata, baosangya wae basokoza balongo bafetsaki nda Yudea nganji ya boya; 30ko baokela joi liko, baosokoza nganji iko la likata ja Balunaba la Saula.
Currently Selected:
Belemo Beki Bikima 11: NTMN58
Highlight
Copy
Compare
Share
Want to have your highlights saved across all your devices? Sign up or sign in
Bonkanda Wa Nzakomba W’aeyoko © Aliiance Biblique de la RD Congo, 1958.
