Mako 8

1Mu aa mafuku namu, kibumbu kia bantu biakibadi kikale kikata ki moo, babadi bashī na biakudia: Henyihaha Yesu baitanyine kwadi bana be ba bukishi, bebalungwile’shi: 2Nyi na bano bantu lusa, mwanda’bo babashala n’ami binobino mafuku asatu, tabe na bidibwa bia kudia. 3Su nebahalakasha na nsala, abo kwenda kwabo, abakakoko mwishinda, mwanda bangi mbafikye kula. 4Bana be ba bukishi abamwihwishe’shi; Muntu euku kwikutshisha bano bantu mu kabāka kwi kunyi? 5E bebehwishe’shi: A nwi na mitanda ya mikate yingi? Abamwalulwile’shi: Nyi musambobidi. 6E balungwile kibumbu kia bantu’shi: Bashale hashi; bātshile mitanda ya mikate musambobidi, batumbwile Efile-Mukulu, beitshimwine, beihele bana be ba bukishi’eshi; Kebatudilei, biabia abeitudile bantu. 7Babadi’nyi na kasasa ka tushiha, biabia hakutumbwile n’ato, bebambile’shi: Kebahei na twinyi tuno. 8Biabia babadile, abaikwite. Abātshile bisele musambobidi bia bifingifingi bibashele. 9Beyi babadile babadi su mbinunu binanka, n’E bebahalakeshe.

10Henyihaha bekile mbwato na benyi bana be ba bukishi, bafikile mu mpese ya Ndalamanuta. 11Bafadiseo babatukile kwadi, ababangile kumwihusha mwanda’shi: Etuleshe kitundwilo kia mwiīlu, anka nyi nkumutompa. 12E beikishe muwa bikata mwishimba die, bambile’shi: Ba mu kino kihindji abakyebela kitundwilo mwanda kinyi? Binyibinyi nenuamba’shi: Takwi kitundwilo akikahebwa kwi ba kino kihindji, ooo. 13E bebalekyele, bakekile m’bwato dimo’nyi bayile adi’eshia.

14Bana be ba bukishi abailwa kutwala (n’abo) ya bidibwa, m’bwato namu tamubadi mukile mutanda umune wa mukate. 15E bebakamikile’shi: Dimukai, nwikale badimukye ku kitatusho kia Bafadiseo na kinyi kia Heloda. 16Baba, tabahatakasha munkatshi mwabo’shi: Nyi mpa mwanda ta twi na mikate. 17Yesu habeushingulwile bebālulwile’shi: Mwanda ta nwi na mitanda ya mukate, a nkinyi kianuāmbishena ’nyi, ta nunangushena sunga kushingula, nukī na mashimb’enu e bukoho’nyi? 18A meso anwe n’ao ta numonā, a matwi namu anwe n’ao, ta nuhushā, ta nutentekyesha’nyi? 19Hanatshimwine mitanda yitano munkatshi mwa binunu bitano, ā bungi bwa bisele bibaule na bifingifingi bianubātshile mbinga? Abamwalulwile’shi: Nyi ekumi na bibidi. 20A ha mitanda musambobidi namu ku binunu binanka, a mbisele binga bia bifingifingi bianubātshile? Abamwalulwile’shi; Nyi musambobidi. 21E bebehwishe’shi: A nkinyi ta nushingula?

22Bafikile ku Betaseda. Abafikile kwadi na muntu mpofu, abamusendelele’shi; bamukume. 23Henyihaha bakwete mpofu ku mboko, bamukunkwishe ku bukunkula kwa kibalo; habamufidile mata ’meso na kumutenteka maboko, bamwihwishe’shi: Omono kintu su? 24N’e babandulukile’shi: Namono bantu bēfwane mitshi bakwete kutambuka. 25Kumongo, bamutentekyele maboko ku meso e dimo, bamutadishe mwiīlu, (mpofu) bahwishibwe, badi tamono bantu boso anka bibuwa. 26(Yesu) bamutakwile ku nshibo ye eshi: Totwelanga mu kibalo, sunga nkulungula umune mu kibalo.

27Henyihaha Yesu na bana be ba bukishi babakatukile, abayile mu bibalo bia Kesalea Fidihai; mwishinda behwishe bana be ba bukishi’shi: A bantu abanamba’shi; Nanyi? 28Abamwalulwile’shi: Bangi abakwete kwamba’shi: E nyi Yoano Mubatshishi, bangi’shi: E nyi Elaidja, bamo nyi’shi: E nga batemuki. 29E bebehwishe’shi: Anka anwe anutemuna bu’nyi? Petelo bamwalulwile’shi: Obe we Kidisitu mwinyi. 30E bebakamikile’shi: Tanundungwilanga muntu.

31Binyibiabia babangile kwibalambukisha’shi: Mwan’a muntu ngwa kumweshibwa malwa e bungi, na kuhedibwa kwi bakulu, na kwi batshiite-bakwidi bakata, na kwi bafundji ba mikanda, na kwīhayibwa; na hahakakidi mafuku asatu kusanguka dimo. 32E batubwidile bantu boso uno mwanda. Biabia Petelo bayilen’E ku bukunkula, babangile kumutosha. 33Anka habālulwile kutala bana be ba bukishi batosheshe Petelo’shi: Kile kumongo kwande, obe Satana, mwanda obe twe na kanya ka bintu bi’Efile-Mukulu, anka ku bia bantu.

34Yesu habetamine kibumbu kwadi, na bana be ba bukishi namu, bebambile’shi: Ese akyebe kundonda, ehele e na mwinyi, eboshe nkulusu ye, andonde. 35Mwanda ese akyebe kuhasha muwa we akeushimisha, ank’ese ashimisha muwa we, ha mwanda w’ande, na ha mwanda wa mukāndu wibuwa, nyi winyi akeuhasha. 36A muntu akasungula kinyi, su bāta bioso bia hano ha nsenga na kushimisha muwa we u na mwinyi? 37A biabia namu muntu e na kintu kinyi kia kushintushena mu kusungula muwa we dimo’nyi? 38Binyibiabia awa akamwena’mi būfu na ku bishima biande, mu kino kihindji kia basha mabasa na kia basodi ba myanda, biabia Mwan’a muntu namu akamufwila būfu ahakafiki mu ntumbo ya Shye na bamwikeilu bahatulukye selelee.

Currently Selected:

Mako 8: NTLK52

Highlight

Copy

Compare