Mako 7

1Henyihaha BaFadiseo, na bamo ba bafundji ba mikanda babafwile ku Yelusalema abekongyele kwadi. 2Habamwene bamo ba bana be ba bukishi bakwete kudia mikate na māsa ashī eoshwe, bebabwele n’abo. 3Mwanda baFadiseo na baYudea boso, su ta mbeoshe biya ku māsa, ta bakudia, mwanda wa kulama lungalunga lwa bakulu. 4Na hakwaluka ku kisalwe, su ta mbeoshe ta bakudia; babadi namu na bingi bihikwa bi bungi bibatambwilwe kulama, na bia kusula makoho na ngesu, na bihulu bibakitshinwe na bilonda bia munyinga, na bia kusula mambata. 5Henyihaha baFadiseo na Bafundji ba mikanda abamwihwishe’shi: A nkinyi bana bobe ba bukishi tabe mu bihikwa bia lungalunga lwa bakulu, anka bakwete kudia na māsa ashī eoshwe. 6E bebālulwile’shi: Mbinyi Eseasa benutemukile’nwe bansesa bu bibafundjilwe’shi: Aba bantu mbanemekye ku milomo, anka mashimb’abo e kula n’ami. 7Tala, abandangwila bisumanga, abalambukisha bantu lulambukisho lwa milangilo ya bantu. 8Mwanda anulekye milangilo y’Efile-Mukulu, anulamata ku lungalunga lwa bantu mu kusula kwa ngesu na makoho, na bingi bintu biabia namu bianukitā. 9E bebambile’shi: Nyi binyibinyi bianuhele mulangilo w’Efile-Mukulu eshi, tulame lungalunga lwetu. 10Mwanda Mosesa bakwile’shi: Nemeka shobe na nyin’obe; awa akaa nshye, sunga nyin’e, āfwe lwinyi lufu. 11Ank’anwe’shi: Su muntu āmba shye su nyin’e eshi; kintu kibotshile ki Kobana, kuhatula nkwamba’shi, Nkintu kia buntu bw’Efile-Mukulu. 12Henyihaha ta nukuminanga e kukwashia shye sunga nyin’e, su nkinyi su nkinyi. 13Nyi henyi hanwalulwila mwanda w’Efile-Mukulu, taudi bu bisumanga ha mwanda wa lungalunga lwenu lwanwibatumbishe, na bingi bikitshino bi biabia.

14(Yesu) habetamine kibumbu kioso kwifubula kwadi, bebalungwile’shi: Hushai kwandji’mi anwe boso, nushingule binangu. 15Ta kwi kintu ki hasha ha muntu akitwele munda mwe akiuku kumulwisha; anka biabia abituku munda, nyi biobio abilwishā muntu. 16Su muntu e na matwi a kuhusha, ahushe. 17Binyibiabia habalekyele kibumbu kia bantu ku kibelo, batwelele mu nshibo, bana be ba bukishi abamwihwishe mwanda w’alwa lukindji. 18E bebehwishe’shi: Anwe namu ta nwi na binangu, ta nushingula kioso kintu ki hasha akitwele mu muntu, kiakia ta kiuku kumulwisha, a-a? 19Mwanda ta kiiya mwishimba, anka akienda mwifu, mpaa na ku nkumba, (Nyi muyile yino myanda kuhatula’shi) ku biakudia bioso bi selelee. 20E bambile’shi: Akituku munda mwa muntu, nyi akimulwisha. 21Mwanda ku munda, mu mashimba a bantu amutukā binangu bi bubi, na mabasa, na makyebanokyebano, na matombo, 22na bwifi, na meso-a-tone, nabubi, na ndjindji, na mudioholo w’eshimba dia bubi, n’eiso dibi, na kusabūla, na kwinemeka, na butesha. 23Yaya myanda yibi yoso ayitukā munda, ayilwisha muntu.

24Henyihaha bakatukile kwanka, bayile ku mpese ya Tyla na Shidona, batwelele mu nshibo, ta mukyebe muntu, sunga ngumune kwiuka, anka ta mumone mwa kufwamina. 25Mwanda kubadi mwana mukashi, mwan’e badi na kikudi ki butete bamuhushishe, bafikile, bahonene ku ngwa y’e. 26Winyi mwana mukashi badi mwina Ngidiki, a kwiilo dia Sailofenishya. Bamusendelele’shi, Ambingile mukishi munda mwa mwan’ande. 27Anka Yesu bamwambile’shi, Bana babande kwīkuta kwibedi, mwanda ta mbilombana kuata biakudia bia bana na kuela mbwa. 28E bamwalulwile’shi, Uolo yaiya Nfumwami, anka mbwa su yi mūshi mwa mesa aīdi bifingifingi bia bana. 29E bamulungwile’shi: Ha mwanda mwa bino bishima biobi eyile shobe, mukishi ubahu kutuka mwan’obe. 30Biabia habafikile mu nshibo y’e basānene mwana ha lusala, na mukishi tautukile.

31Dimo’nyi, hakutuka ku mpese ya Tyla na Shidona bafikile kwīshiba dia Ngadilea, bakile munkatshi mwa mpese ya Dekahodise. 32Babafishishe kwadi muntu sha kwitwi, n’eūkuta namu, abamusendelele’shi, amutentekye maboko. 33Yesu bayile n’e ku bukunkula kwa kibumbu, bamwelele minwe mwitwi, bafidile mata, bamukumine kwidimi. 34E batadile mwiīlu beikishe muwa, bamwambile’shi, Ehafata. Nyi nkwamba’shi; mwikale mushikukye. 35Kahindji n’āka matwi e abashikukile, na koshi k’edimi die kabatshibikile, badi takula bibuwa. 36E bebakamikile’shi, Ta nulungulanga muntu, sunga ngumune; anka habakambile kwibakamika, abo abakambil’eshimba dia kuhalakasha nkumo. 37Abakambile kukanya bikata’ shi; Bakitshi myanda yoso bibuwa, E ahwishā basha kitwi, tabahushā, n’abe kamama tabākulā.

Currently Selected:

Mako 7: NTLK52

Highlight

Copy

Compare