Mako 9

1(Yesu) bebalungwile’shi: Binyibinyi nenuamba’shi: Kwi bamo bemane hano ta bakamono lufu, mpaa n’ahabakamono bufumu bw’Efile-Mukulu abufiki na bukome.

2Habakile mafuku asamombo Yesu bātshile Petelo, na Yakoba, na Yoano, bebakunkwishe mu ngulu yibula, mwiīlu abo ba na mwinyi: E bālulukile kumpala kwabo. 3Bilamba bie bibahenyahenyanga anka soo bu mafulu a nsubanga; sunga ta kwi mutoshi hano ha nsenga teuku kwibitosha biabia. 4Henyihaha Elaidja na Mosesa abamwekyele kwabadi, babadi abākula na Yesu. 5Petelo balungwile Yesu eshi: A mwanana, hano mpetulombene kwikala, bibuwa tukite bitanda bisatu, kimune nkiobe, kingi kia Mosesa, kimo’nyi ki’Elaidja. 6Mwanda ta mwiukye kia kwakula, mwanda babadi na moo ukata. 7Kubafikile ekumbi dibebahutshile, n’eyi dibatukile mwikumbi’shi: Uno nyi mwan’ande mufudibwe kifulo, hushai eyi die. 8Kahindji n’āka habatadil’eku n’aku, tabamwene sunga ngumune, anka Yesu n’abo bana mwinyi, nyaa. 9Habadi abayiki ha ngulu E bebakamikile’shi: Ta nukalungulanga muntu myanda yanubamono, anka ahakasanguka Mwan’a Muntu ku lufu. 10N’abo abalamine uno mwanda munda mwabo, babadi abeihushena’shi: A kusanguka kwa mu lufu kwi na minyi?

11Abamwihwishe’shi: A Bafundji-ba-Mikanda a nkinyi kiabamba’shi: Elaidja akabadila kufika? 12E bebālulwile’shi: Binyibinyi Elaidja akabadila kufika, akalumbula bintu bioso bu bia bibadi kwibedi, na bu bibafundjilwe Mwan’a muntu’shi, akamono malwa e bungi na kubendwa. 13Ank’ami nenuamba’shi: Elaidja tabahwila kufika, tabahwile kumukita mwabakyebele, bu biabamufundjile.

14(Ku mongo) habafikile kwi bana be ba bukishi, bamwene kibumbu kikata kimane habadi, na Bafundji-ba-Mikanda abebehusha myanda. 15Na binobino kibumbu kioso, habamumwene abakanyine bikata, abakamine lubilo kwadi, abamwimwine. 16E behwishe Bafundji-ba-ikanda’shi: A nwibehushanga kinyi? 17Muntu a mu kibumbu bamwalulwile’shi: A Mulambukishi, nafisha kodi mwan’ande mulume, e na mukishi wa kamama. 18Koso kwaumuyisha aumwasākinya, aumutusha efulu ku kanwa, aumwisumisha meno, aumuhongolosha mbidi; nehushanga bana b’obe ba bukishi’shi, bamubingile kwanka, ank’abo abakutwa. 19E bamwalulwile’shi: A ee! anwe ba kihindji kishī na kukumina, a nankashala n’enu kihindji ki bula na minyi? aneshinena n’enu bihindji bi na minyi: mufwishei kwandji’mi. 20Abamufwishishe kwadi; habamumwene, kihindji n’āka mukishi bamusunyishe, na mwana bahonene kingadingadi na kwalasha n’efulu ku kanwa taa. 21(Yesu) behwishe nshe’shi: Uno mwanda ubafikile kwadi kihindji ki bula na minyi? Bamwalulwile’shi: Anka habadi ki mukinga. 22Na misusa yi bungi ubamwelanga mu kālo, na mu mema kumwiha; anka su obe euku kukita kintu etufwile lusa, etukwashye. 23Yesu bamulungwile’shi: Su euku kukumina, biabia myanda yoso kwi sha kukumina aiuku kukitshibwa. 24Kahindji n’āka shye mwana bēlele musase na kudila mpolo’shi, Mwanana, nakumina, nkwashye kushī-kukumina kwande. 25Habamwene Yesu kibumbu kikwete kwibuñena mbilo basashile mukishi wi ntanka’shi: Obe mukishi wa kamama na wa kitwi, nakukamika’shi: Tuka munda mwe, totwelanga mwanka dimo.

26Biabia (Mukishi) ubelele musase, ubamusunyīshe misusa yi bungi, ubamutukile, badi anka bu mufwe, biabia bangi’ shi bāfu. 27Anka Yesu bamukwete ku mboko, bamwimikile, baimene. 28Habatwelele mu nshibo, bana be ba bukishi babamwihwishe ku bukunkula’shi: A tukutshīlwe kumubingila na minyi? 29E bebālulwile’shi: Kino kihaso (kia mikishi) ta yibingwa bisumanga, anka ku luteko na kushila bidibwa.

30Abakatukile’ko, abakile munkatshi mwa Ngadileo, ta mukumine muntu kwiushingula. 31Mwanda badi alambukisha bana be ba bukishi, bebalungwile’shi: Mwan’a muntu talubulwa’masa a bantu, n’abo abakamwiha; habahu ku mwiha akasanguka h’efuku dia kasatu. 32Ank’abo tabashingulwile yaya mīsambo, babadina moo kumwihusha.

33Bafikile ku Kahanauma; mu nshibo mubadi badi ebehusha’shi: Kibadi kinyi kianubeleshenanga mpaka mwishinda? 34Anka’bo babauminyine nyaa, mwanda babadi abēleshena mpaka mwishinda’shi, a mukile mukwabo bukata nanyi? 35E bashalele, betamine b’ekumi na babidi, bebalungwile’shi: Su akukyebe muntu kukila ku mpala, ekale ku nyima kwa boso, na bu mufubi a boso. 36Bātshile mwana mukinga, bamwimikile munkatshi mwabo; habamwibosheshe ’maboko, e bebalungwile’shi: 37Awa’tambula mwana mukinga bi uno’bi mwishina diande, biabia antambul’ami: awa’ntambula, ta nami atambula, anka yawa bantumine.

38Yoano bamulungwile’shi: A mulambukishi, tubamwene umune badi abingi mikishi mwishina diobe, shī etulondo’twe; atwe tubamutosheshe, mwanda e te mu mulongo wetu. 39Anka Yesu bambile’shi: Ta numutoshanga, mwanda ta kwi muntu, sunga ngumune akakitshi kilengeleshi mwishina diande, euku kunyialulwila tampelesha lubilo. 40Awa ashī atuhela e n’etu. 41Mwanda aw’akenuha biakutoma, sung’ekoho dia mema mwishina diande, mwanda w’anwe nwi bena Kidisitu, nyi mbinyibinyi nenulungula’shi: E ta kakutwa bwedi bwe, sunga mpahelahela, ooo. 42Ank’awa akakokosha umune a mu bana bahela abankumine, akikemukile buwa efuto die’shi, su abamwanye ebwe dia bahela bukula mu nshinga ye, abakamwele namu mwishiba dia mema. 43Su mboko yobe ayikukokosha, biabia eitshibe, mwanda, kutwela ’muwa na kilema nyi kukila kodibe, su kuelwa mu Ngehena na māsa abidi mu kālo kashi keuku kushima. 44Nyi mwamwa kifinwa kiabo kishī akiuku kufwa, na kālo namu kashī akashima, ooo. 45Su ngwa yobe ayikukokosha, biabia eyitshibe, mwanda kutwela ’muwa na kilema nyi kukila kodibe, su kuelwa mu Ngehena na ngwa yobe yibidi mu kālo kashī keuku kushima. 46Nyi mwamwa kifinwa kiabo kishī akiuku kufwa, na kālo namu kashī akashima, ooo. 47Su eiso diobe namu adikukokosha, edikatusha, mwanda, kutwela mubufumu bw’Efile-Mukulu n’eiso dimune nyi kukila kodibe, su kuelwa mu kālo ka Ngehena na meso obe abidi. 48Nyi mwamwa kifinwa kiabo kishī akiuku kufwa, na kālo namu kashī akashima, ooo. 49Mwanda’nka hamune bintu mbishinwa mungwa, anka biabia namu bantu na kālo, na bitahwa bioso namu abikashina na mungwa. 50Mungwa wibuwa, anka su mungwa ubatukuluka aukatu na minyi? Nwikale na mungwa mu anwe bana bene, na kufukama namu muntu na muntu.

Currently Selected:

Mako 9: NTLK52

Highlight

Copy

Compare