Mako 5

1Biabia ababukīle adi’eshia di’eshiba, mu mahia a Ngadalene. 2Hakwabuka mu bwato, anka henyihaha bafumankene na muntu mukwatwe na kikudi ki butete mutukye mu mashama. 3Badi mubombele ’mashama, ta kubadi akumōbesha kumuanya ooo, sunga mu nkano: 4Mwanda badi mufungibwe misusa na misusa mu miomba na nkano, nkano namu e na mwinyi beihobolanga, na miombo yinyi beitshomwene bihindji bihindji: Sunga ngumune akumukokyesha. 5Bukyelebukyele, bufuku na kanya badi mu mangulu na mu mashama, badi ēle misase, kwete kwītaha na mabwe. 6Habamwene Yesu kula, bakamine lubilo, bamulangwidile. 7Banyishishe eyi dikata’shi: A n’obe n’aminyin’obeunyi? Obe Yesu Mwan’Efile-Mukulu ’mukile ntumbo a mwiīlu, nakutshihila mwishina di’Efile-Mukulu’shi, to’mweshanga malwa. 8Mwanda (Yesu) bamulungwile’shi: Tuka munda mwa muntu ū, obe kikudi ki butete. 9N’E bamwihwishe’shi: Eshina diobe mbu’nyi? E bamwalulwile’shi: Eshina diande mbu Ngoshi, mwanda twi bungi. 10E bamusendelele bikata’shi: Toetutakulanga mu ano mahia. 11Tala, kubadi lombe lukata lwa ngulube hehi na ma ngulu, lukwete kudia. 12Mikishi yoso yibamusendelele’shi: Etutume munda mwa ngulube, tukatwele mwanka. 13Yesu kahindji n’āka beikuminyine’shi: Ee, ndai. Henyihaha bikudi bi butete bibamutukile, bibakatwelele munda mwa ngulube; biabia lombe loso lubakulumukile mu iuhongo mpaa na ’mema, (yibadi hehi binunu bibidi) yibafwile’mema. 14Aba babadishanga ngulube babasukile, babakalungwile aba babadi mu kibalo, mpaa na babadi mu mafuba, uno mwanda. Abo namu babayile mu kutala bibakitshibwa. 15Abafikile kwi Yesu, abamwene awa badi na mikishi mushāle tadi mufwadikwe bilamba, tadi namu na binangu bia bu muntu, biabia babakwete moo. 16Aba babahetekyelwe abadi tabākula mwa kibakitshinwe kwi’wa badi mukwatwena mikishi, na bibakitshinwe ngulube. 17Bababangile kumusendela’shi: Etukatukile mu yino mpese yetu. 18(Yesu) habatwele mbwato, winyi badi mukwatwe na mikishi bamusendelele’shi: Nende n’obe. 19Anka Yesu ta mukumine, bamulungwile’shi: Nda kwenu kwi ba kifuko bobe, okebalungule bibakukitshina Nfumu obe, na bibakufwila lusa. 20N’e bayile, babangile kushingulusha bantu ba mu Dekahodise myanda yikata yibamukitshine Yesu, na bantu boso abakanyine.

21Yesu habābukile dimonyi ’mbwato kudi’eshia, bantu abakongyele kibumbu kikata kwadi E; badi kubukunkula kw’eshiba. 22Henyihaha tala, kubafwīle umune a batontshi ba mu kitumbwilo, eshina die mbu Yailusu; e, habamumwene bēle ku ngwa y’E. 23Bamusendelele bikata’shi: Mwan’ande’hela mukashi takyebe kufwa; otwende, okamutentekye māsa akahashibwe, akekala na muwa. 24(Yesu) bayile n’e, na kibumbu kikata kibamulondele, kibefinene hadi.

25Kubadi mwana mukashi badi na busungu bwa kushila luendenda bihwa ekumi na bibidi. 26Bakambanga kumweshwa malwa kwi bananga-buka be bungi; twi ku minwe twe tubamuhwile, busungu bwe ta mbutale, anka bubakalabele. 27Habadi muhushe nkumo ya Yesu bafikile mu kibumbu kia bantu kumongo kwe, bakumine ku mutwelo w’E. 28Mwanda bākwile munda mwe’shi: Su neuku kukuma sunga ku mutwelo w’E nankahashibwa. 29Kahindji n’āka hambangilo ha mase e habaumu, n’ebefwakene mu mbidi ye bwinyi busungu bubahwishibwa. 30Anka henyihaha Yesu, hakushingula munda mwe’shi, bukome bubantuku, benyoñene munkatshi mwa kibumbu, bambile’shi: A bankumu ku mitwelo yande nanyi? 31Bana be ba bukishi abamwambile’shi: Obe omono kibumbu nkifinene hodi na kwihusha’shi, a nanyi bankumu? 32N’E bashokolweshe meso aku n’aku’shi, ’mone bankitshi bino. 33Anka mwana mukashi hakushingula bibamukitshinwa basushile moo, bafikile, batwile manwi hāshi kumpala kwe, bamulungwile myanda yoso ya binyibinyi. 34E bamwambile’shi: Mwan’ande, lukuluhilo lobe lubakuhasha, ndanga n’eshimba diobe ditale nyaa! ekala muhwishibwe mukumbo w’obe.

35Habadi kiesamba, kubafikile bantu ba mutontshi a mu kitumbwilo babambile’shi: Mwan’obe mwana mukashi bahu kufwa, akiokambakasha’nyi Mulambukishi binobino nkinyi? 36Habahushishe Yesu mwanda w’abākwile, balungwile mutontshi a mu kitumbwilo’shi: Totshinanga, anka kumina. 37E ta mukumine muntu kumulonda, anka Petelo, na Yakoba, na Yoano mukwabo na Yakoba. 38Bafikile ku nshibo ya mutontshi a mu kitumbwilo, bahetele eunga na kiuwa kikata kia basha mālo. 39E habatwele mwanka bebehwishe’shi: Nkinyi kianwele eunga na kudila’nwe? Songwakashi ta mufwe, tulo tuadi mulale. 40Tabamuseha na kumukyengula. Anka E habebakatwishe boso, bātshile shye na nyin’a songwakashi, na baba abafwile n’abo, abatwelele mwanka mubadi mulale songwakashi. 41Bakwete songwakashi ku mboko, bamwambile’shi: Tadita Kumi, kuhatula nkwamba’shi: Obe songwakashi, nakwamba’shi, buka. 42Kahindji n’āka songwakashi babukile, batambukile, mwanda tabadi mufishe bihwa bu ekumi na bibidi. N’abakanyine na lukanyo lwi moo. 43E bebalungwile bukoho’shi: Ta nukashingulanga muntu uno mwanda, bambile namu’shi: Muhei biakudia.

Currently Selected:

Mako 5: NTLK52

Highlight

Copy

Compare