Mako 4

1E babangile dimo kulambukisha ku bukunkula kw’eshiba. Kubamwibungile kibumbu kikata, henyihaha e baikile m’bwato, tashalele ha mema; kibumbu kioso kia bantu kibaimene ku mahia ku bukunkula kwa mema.

2E tebalambukisha bintu bi bungi mu nkindji, tebalungula mu lulambukisho lwe’shi; 3Hushai; talangai, biakubatukile mukunyi’ēbala’shi: Nkakune. 4Bibakitshine hakukuna, yingi yibahone ku bukunkula kw’eshinda, na tonyi twa mwiilu tubeimene yoso. 5Yingi yibahone ha lubwebwe, ha shī nsenga yi bungi; kahindji na kano yibamene, mwanda yibakutshilwe nsenga yingi ya kwiisha mūshi. 6Anka nguba hakukamina yibatatshile, mwanda yibakutshilwe mishi, yibaumina’nka hoo. 7Yingi namu yibahone’ milobo, anka milobo yibakūle, yibeibondele, na bikuba bibakutshilwe kuhā. 8Yingi namu yibahone mu nsenga yibuwa; yibamene, ayo nkuha bikuba bifwime, yingi makume asatu, yingi makume asamombo, yingi namu lukama. 9E bebambile’shi: Sha matwi a kuhusha, ahushe.

10Habadi buhenka, na bangi babadi n’abo hehi, na b’ekumi na babidi, tabamwihusha mwiyile lwa lukindji. 11E bebalungwile’shi, Kwanudi nubahebwa kushingula bifibwe bia bufumu bw’Efile Mukulu, anka kwi’ba be hasha, bintu bioso abikitshibwa mu nkindji’shi. 12Kumona, abakamono, anka ta bashingula; kuhusha, abakahusha, anka tabashingula; tala abakālula mashimba’bo, na milwisho yabo ayikebalekyelwa. 13E bebehwishe’shi: Tanushingula luno lukindji’nyi? biabia anukashingula nkindji yoso bi kunyi?

14Muminyi nyi amina mwanda (w’Efile Mukulu). 15Aba nyi benyi be ku bukunkula kwishinda, nyi habadi baminwe awa mwanda; anka baba habahu kuhusha, Satana, kahindji na kano afiki kumañuna mwanda uminwe ’mashimba’bo. 16Anka hamune n’aba abaminwe mu mbalakata; nyi hakuhusha mwanda, kahindji n’āka abeutambula nakusehela. 17Hakukutwa mishi munda mwabo bana bene, biabia abanyingi anka kihindji kihi; kumongo, ahakafiki malwa su kusābulwa ha uno mwanda, binobino abakakokolwa hanka. 18Aba namu nyi benyi baminwe munkatshi mwa milobo, nyi benyi abahusha winyi mwanda. 19Anka binango bia myanda bia hanohansenga, na kudimbwa kwa mono, na kwabila kwa bingi bintu abitwela mwanka, abifinena mu uno mwanda, nyi haubakutshilwe kuha bikuba. 20Aba namu nyi benyi abaminwe ha nsenga yilumbulukye, nyi benyi abahusha winyi mwanda, na kwiutambula na kuha bikuba, au makumi asatu, au makumi asamombo, mungi namu lukama.

21N’E bebehwishe’shi: Etala aditushwa mu kutweshwa mūshi mw’ekumbo, su mūshi mwa lusala’nyi? ta ditulwa ha kitudilo kiadio su? 22Mwanda ta kwi sunga nkimune kifībwe kishī akikaleshibwa, sunga nkidibwe lukuku kishī akikatushibwa hatoka. 23Sha matwi akuhusha, ahushe. 24E bebalungwile’shi: Dimukai bianuhusha, anka ku kihīmo kianuhīmi n’akio, altikenuhīmwa namu; na kwanudi anuhusha, yingi ayikatentekwa’nyi. 25Mwandā’ wa e n’akio, kwadi e akahebwa bingi’nyi; ank’awa shī n’akio akaatshibwa na kinyi kiadi n’akio.

26E bākwile’shi, anka biabia namu mbufumu bw’Efile Mukulu bwi hamune muntu aminyi mbio ha nsenga. 27Alala tulo, abuku bufuku na kanya, mbio namu ayituluka na kutama, anka ta shingula mwaimena. 28Nsenga ayitusha bikuba yi na mene; kwibedi kutuluka, kumongo mieho. 29Anka ahakamongo mbio, akatumu bena miele bakunoa, mwanda mafuku a hakunwaa abafiki.

30E behwishe’shi, Atukahwandjikisha bufumu bw’Efile-Mukulu na minyi? sunga nkwibwelela lukindji, atwibwelela na minyi? 31Nyi hamunenka katete ka mutada, ako ke ntshā, anka hakwikakuna mu nsenga, nkakile mbio yoso yi ha nsenga. 32Anka hakwikakuna akatuluka, akatama, na kukila midioko yoso bukata, na kutshimpila ntabi yikata; biabia tonyi twa mwiīlu atwiuku kubombela mu mutala wao. 33Biabia mu yingi nkindji yibungi bebelanga mwanda (w’Efile-Mukulu) mwabadia kwiukila kuhusha. 34Anka kushī na nkindji ta mwisambe n’abo, anka habadi n’abo buhenka bwabo, bahatulwidile bana be ba bukishi myanda yoso.

35Diadia efuku hakutwela nguba, bebalungwile’shi, tuabukei adi’eshia. 36Hakwandula mwilo abamwikishe mbwato anka mubadi mwikele. Kubadi namu tungi twato n’e. 37Kubebwele kihukuhuku kia luhahi, na mbundambunda yibekuhilanga mbwato; kahindji n’āka bubaulendaa. 38E badi kwikolo kwa bwato mulale tulo ha musamo; abamubushishe, tabamwamba’shi: A mulambukishi, a tokanya biatukyebe kufwā’be? 39E babukīle, batosheshe luhahi, bākwile kwi mema’shi: Fukama nyaa. Luhahi lubafukamine nyaa, kubadi anka tāloo. 40N’E bebehwishe’shi: A Anubakwatshila moo kinyi? Kianushī na lukuluhilo nkinyi? 41Babakambile kukwata moo, tabeihushena’shi: A uno e bino nanyi a kokyelwa na luhahi na mema?

Currently Selected:

Mako 4: NTLK52

Highlight

Copy

Compare