Mako 3

1N’E batwēle dimo mu kitumbwilo, amo mubadi muntu badi na mboko yiume. 2Henyihaha tabamutala’shi, su amuhwisha mu dia Sabado, biabia bamone mwa kumutewila. 3E tākula kwi muntu badi na mboko yiume’shi: Ebwele munkatshi. 4E tebamba’shi: A nkishila kukita bibuwa mu dia Sabado’nyi, su nkukita bibubi? Su nkuhasha muwa, su nkwihā? Anka’bo babauminyine nyaa. 5Hakubatala na kukyengwila boso na meso a nsungu, na kwishimba fututū mwanda wa kukoma kwa mashimba’bo, E bākwile muntū’wa’shi: Ola mboko yobe! N’e bōlwele yanka; na mboko ye yibealulwile, tayidi bukome hamune na yikwabo. 6Henyihaha bafadiseo babatukile mwanka, tabamudila lukuku na bena Heloda lwa kwituhishena n’e lwa mwa kumwihayila.

7Anka Yesu batentulukile kwishiba dia mema na bana be ba bukishi, na kibumbu kikata kia bantu ba ku Ngadilea abamulondele kwanka, na bangi namu be bungi ba mu Yudea. 8Na ba mu Yelusalema, n’aba ku Idyumea, n’aba ’diēshia dia Yodana, n’aba ku luhese lwa Tyila, na Sedona, boso kwanka kibumbu kikata kinyi, habahushishē’bia bikata bibadi akitshi, tabafiki kwadi. 9E bambile bana be ba bukishi’shi: Nyeshei na kāto, mwanda wa kibumbu, tala kianfina. 10Mwanda e bahwishishe bangi bangi, nyi habamūngwidile boso abakumbu bihuha mwabadi akumukumina. 11Na bikudi bi butete hakumumona bibahonehashi ku mpala kwe, tabiele musase’shi: Obe e Mwan’Efile Mukulu. 12E bebisashile’shi, ta nukanukishanga ku bantu.

13Binyibiabia bakamine ku ngulu, taitanyina’ba akyebe kwishimba die, n’abo abayile kwadi. 14Basangwile b’ekumi na babidi bakwikala n’e, mwadia kwibatumina kulungula mukāndu-wibuwa. 15Dingi nyi’shi, babahebwe matalwa akuhasha abakumbu kubofula kwa mbidi, na kubinga mikishi. 16E baudikile Shimona ding’eshina’ashi, bu-Petelo. 17Na Yakoba mwan’a Sebede na Yoano mukwabo, abo bebaudikile’shi bu-Boanejye, nyi kwamba’shi, bana ba kukungula kwa mpeshi. 18Andeleyo, na Fidipa, na Batolomyu, na Mateyo, na Tomase, na Yakoba mwan’a Alafesa, na Tadeusa, na Shimona mwin’a Kenane. 19Na Yudasa Isakadiata, winyi bamuhene kwi bangi. N’abatwele mu nshibo.

20Kibumbu kibebungile dimo hamune, ta mbamone sunga mwa kudila (bidībwa,) ooo. 21Bakwabo (na Yesu) habeuhushishe, abayile mu kumukwata, mwanda abadi abamba’shi, e ’mutesha.

22Bafundji ba mikanda babatukile ku Yelusalema abo’shi: E na Bēlesebuba. Tabamba’shi: Nkwi nfumu a mikishi kwadi muate bukome bwa kubinga mikishi. 23Binyibiabia hakwibetanyina kwadi, bebele nkindji’shi: A Satana euku kwiibinga e na mwinyi? 24Su bufumu namu abwilamuna, abu bu na mwinyi, biabia bwabwa būfumu abukutwa kushāla. 25Su nshibo namu ayilamuna ayo yi na mwinyi, biabia ayikutwa kwimana. 26Su Satana namu beībwelele na mwinyi, n’ēlamuna, biabia akutwa kwimana, biabia bafudila. 27Sunga ngumune, su mpa kinyi, su mpa kinyi, euku kutwela mu nshibo ya kimankinda kuhaula bintu bie, anka abadila kuanya kinyi kimankinda, biabia biakimona mwa kuhaula bia mu nshibo ye. 28Binyibinyi bia nyinuamba’shi; Yoso milwisho ayikalekyelwa bana ba bantu, na milomo yoso yabakaanga. 29Anka’awa akakaa Kikudi-E-Selelee, ta kalekyelwa mwanda, ooo, anka adimukye akekala bahīle myanda ya kuhona mpaa na kwikalaika: 30Mwanda abamwambile’shi: We na kikudi ki butete.

31Henyihaha bakwabo abafikile na nyin’e, tabemene hāsha, abo nkumutumina, akumwitanyina. 32Kibumbu kia bantu kibadi bashāle hādi, tabamwamba ’shi: Tala, nyin’obe na bakwenu be hāsha abakukyebe. 33N’e bebālulwile’shi: A nyin’ami na bakwetu mbanyi? 34Hakutala ha boso babadi bashāle kibumbu kimushemeshe tākula’shi: Talai, nyin’ami na bakwetu ank’aba. 35Mwanda ese akakitshi amukyebela eshimba di’Efile Mukulu, yawa nyi mukwetu mulume, na mukwetu mukashi, na nyin’ami.

Currently Selected:

Mako 3: NTLK52

Highlight

Copy

Compare