Mako 2

1Habakile mafuku (Yesu) batwele dimo mu Kahanauma, abahalakeshe ntumbo’shi E mu nshibo. 2Kahindji na kano kubebungile bantu be bungi, anka kubakutshilwe sunga kihindji, na ha kibelo henyi, n’e bebalungwile mikāndu-yibuwa. 3Kubamufwidile bantu abafishishe mukumbe kususa, mutwalwe na bantu bananka. 4Habakutshilwe mwa kwishesha kwanka mwanda w’efina dia kibumbu, abahulwile musaka, abatubwile mwanka, abayishishe lusala lubadi mulale sha busungu bwa kususa. 5Yesu habamwene lukuluhilo lwabo tākula sha busungu bwa kususa’shi, A mwana, milwisho yobe yibakulekyelwa. 6Anka kubadi bāmo ba Bafundji ba mikanda bashāle hanka, tabanangushena ’mashimba’bo’shi. 7Au uno namu nkinyi kiakwila kukaa Efile-Mukulu? A nanyi euku kulekyela milwisho su ñanka Efile-Mukulu? 8Kahindji na kano Yesu bibeukile mwishimba die biabadi abanangushena munda mwabo, tēbamba’shi; A nkinyi kianunangushena biabia munda mwenu?

9A kikambe kubofula nkinyi, a nkwamba uno akumbu kususa’shi; Milwisho yobe yibakulekyelwa, su nkwamba’shi; Buka, ebwēshe lusala lobe, wende? 10Ank’anwiukye’shi, Mwan’a muntu biadi na matalwa a kulekyela milwisho hano hashi (ākula ku sha busungu bwa kususa’shi). 11Nankwamba ’shi; Buka, ebwēshe lusala lobe, wende ku nshibo yobe. 12Kahindji na kano babukile, na hakwibwēsha lusala lwe, tēnde ku meso kwa boso, n’abo abamukanyine boso, tababihwandjikile Efile-Mukulu’shi: Tā’twe bimwene kashiā bihwandjikile na kino hamune.

13Binyibiabia (Yesu) batukile dimo kunfudilo kwa mema, na kibumbu kioso kibafikile kwadi, e namu tebalambukisha. 14Habadi akidi, bamwene Lewi mwan’a Alehesusa kwete kushāla ha kilambwilo; bamwambile’shi: Ndonde! E namu bebwele, tamulondo. 15Henyihaha Yesu habadi mushāle ha bidibwa mu nshibo ye, balambudi-ba-milambu, na balwishi be bungi bashāle hamune na Yesu, na bana be ba bukishi; mwanda be bungi babadi hanka, tabamulondo. 16Bafundji-ba-mikanda na bafadiseo hakumumona bi badianga na balambudi-ba-milambu na balwishi, tabamba bana be ba bukishi’shi: A nkinyi kiadila na kiatomena na balambudiba-milambu na balwishi’nyi? 17Yesu hakuhusha biabia tabamba’shi: Abo be musangyelo ta be na kia’bakyebela ñanga, ooo, anka’bo abakumbu kubofula kwa mbidi; nkimufwile kwitanyina balulame ba mashimba, anka balwishi belangei ’mashimba.

18Bana ba bukishi ba Yoano n’aba bafadiseo babadi abashidi biakudia, abafikile kumwamba’shi: A nkinyi bana ba bukishi ba Yoano na baba ba bafadiseo abashilā biakudia, anka b’obe ta bashilā? 19Na Yesu bebehwishe’shi: Bantu ba mubambi a mukashi abeuku mwa kushila biakudia hakī mubambi a mukashi e n’abo’nyi? habakī na mubambi a mukashi, ta bakwiuka mwa kushila biakudia. 20Anka mafuku akafiki kwanka ahakakashwa mubambi a mukashi, binyibiabia’nyi habakashila biakudia mu ā mafuku. 21Ta kwi muntu ēle kīla kia mbwisha yihia ku mutwelo ukulu, ooo, su b’ēle biabia aya yihia yioshiki hanka ayinyisha kusanusha h’etubu, biosobi h’etubu henyi habakamba kusanuka. 22Biabia ta kwi muntu alongesha malofu ahia mu milangi ya misokia yikulu, mwanda su biabia, malofu ahyaakatubula aya milangi ya misokia, n’ao asumbuka na milangi biayilwila; anka malofu ahya akyebe akitshinwe mu milangi ya misokia yihya.

23Binyibiabia e tēnde mu mabala a mebele mu dia Sabado, na bana be ba bukishi hakwenda ababangile kukula mebele a mifwafwa. 24Na bafadiseo abamwambile’shi; Talanga’kia nkinyi kiabashiiwila dia Sabado? 25E bebambile’shi: A ta nwi babalē’kia kibakitshine Dafida habakutshilwe bintu, na nsala yibamukwete, e, n’aba badi n’aba benyi? 26Mubakatwelele mu nshibo y’Efile-Mukulu mu bihwa bia Abiata, tshiite-mwakwidi mukata, na kudia, badile mikate yileshwe ku mpala kw’Efile-Mukulu, yibadi yishidikwe kishila kudia kwanka, anka batshiite-bakwidi b’Efile-Mukulu, e namu tāha na babadi n’abo. 27Na (Yesu) bebambile’shi: Dia Sabado dibakitshinyine mwanda wa bantu, ta mbantu mwanda wa Sabado, ooo. 28Binyibiabia, Mwan’a muntu nyi nfumu namu a dia Sabado.

Currently Selected:

Mako 2: NTLK52

Highlight

Copy

Compare