Mako 1

1Mbangilo ya mukāndu-wibuwa wa Yesu Kidisitu Mwan’Efile-Mukulu. 2Mwa kibadi kifundjilwe mu mukanda wa batemuki’shi, Tala, natumu mukiendji wande kumpala kobe, nyi au wakalumbulwila kumpala eshinda. 3Eyi dia umune ēle musase mumahia akabāka’shi; Lumbula eshinda dia Yehowa, ludikai mashinda e. 4Yoano bafikile babatshishia mu kabāka, na kulungula myanda ya kubatshishia kwa kwīlanga kw’eshimba’shi; Milwisho yabo yishimishibwe. 5Kubamutukile kwadi ba mu mahia oso a Yudea, na ba mu Yelusalema hanka; babadi ababatshishwa n’e boso mu lui lwa Yodana, tabasokola milwisho yabo. 6Yoano badi mufwale buaa bwa (nyama) shamo, na kikoba kia musokia mu kifuka: kudia, adi anka nshīye na būki bwa mu mahia. 7Tēle musase’shi; Akufiki kunyima kwande umune munkidile bukata, mioshi ya bidiato bie ami nkintulombane na kubandamina’bio kwangulay’o. 8Binyibinyi ami nenubatshishia mu mema, anka e akenubatshishia mu Kikudi-E-Selelee.

9Biakubadi biabia mu ā mafuku Yesu bakatukile ku Nasaleta, kibalo kia Ngadilea, babatshishwe kwi Yoano mu Yodana. 10Kahindji nāka ha kwabuka’ mema, bamwene eilu tadi tubuka, na Kikudi-E-Selelee kibamutentamine hamune bu nkudimba. 11Biabia mubatukil’eyi mwiīlu’shi, obe e Mwan’ande akukuminwa andji mutokyele’shimba.

12Kahindji n’āka Kikudi-E-Selelee kibamubingile mu ikabāka. 13Mu mahia a kabāka bēkele mwanka mafuku makumi ananka atompibwa na Satana; badi mwikale na nyama yi bukyelo, na bamwikeilu babamunyishanga.

14Binyībi Yoano hakwelwa mu lukano, Yesu bayile ku Ngadilea alungulanga mukāndu-wibuwa wa bunfumu bw’Efile-Mukulu’shi. 15Kihindji kibakumbana na bunfumu bw’Efile-Mukulu namu bubefubwilwa hehi: nwīlangeyi ku mashimba, nukuminei mukāndu wibuwa.

16Henyihaha hakukila mema a Ngadilea, bamwene Shimona na mukwabo Andeleyo, abate bukondja ’mema, mwanda babadi bampibwe ba mwita wa mema. 17Yesu bebambile’shi, ndonde’mi, n’ami nkenwalule nwikale bampibwe ba bantu. 18Henyihaha kahindji n’āka babalekyele makondj’abo, tabamulondo. 19Bahu kwenda kihindji kihela bamwene Yakoba mwan’a Sebede, na mukwabo Yoano, baba n’amu babadi mu bwato tabatelula makondj’abo. 20Kahindji n’āka bebetanyina, n’abo abalekyele shabo Sebede na bafubi m’bwato, tabamulondo. 21N’abo abayile, abatwele mu Kahanauma, n’awa nguba e batwele mu kitumbwilo ha dla Sabado, talambuukisha. 22N’abo abakanyine lulambukisho lwe, mwanda e badi ebalambukisha hamune mwen’a matalwa, ta mpamune bafundji ba mikanda, ooo. 23Amwa mu kitumbwilo mubadi umune badi na kikudi ki butete, bēle musase’shi. 24A ee! etulekyela nyaa, akia twikele n’obe nkinyi, obe Yesu a Nasaleta? bofiki kwitulwish’anyi? Nakwiuku n’abiodi’be winyi Muhatulukye-selelee e Elile. 25Yesu bamutoshe’shi, Umina nyaa, mutukile mwanka. 26Binyibiabia kikudi ki butete hakuhwa kumusunyisha, na kudila n’eyi di bukoho, kibamutukile mwanka. 27Na boso abakanyine, na kwīhushena munkatshi mwabō bana bene’shi; A kino namu nkinyi? A luno lulambukisho luhia namu lwi na minyi? mwanda na matalwa asashila bikudi bi butete, abio abimukokyela. 28Kahindji na kano ntumbo ye yibahalakene ku nsenga ya Ngadilea mpaa na ku mpese yoso.

29Ku mongo, hakutuka mu kitumbwilo, babatwele mu nshibo ya Shimona, na Andeleyo; Yakoba na Yoano babadi n’abo. 30Anka nyin’e muko a Shimona badi mulale na busungu bwa mwasakane mu mbidi, biabia kahindji na kano ta bamulungula biadi. 31Bafikile kwadi, bamukwete ku mboko amubushe; kahindji na kano busungu bubahwile, tebafubila mufubo.

32Kiolwa, nguba hakuhona, abamufikishishe boso basha masungu kwadi, na bamunwe na mikishi. 33Na kibalo kioso kibamwibungile hamune ku kibelo. 34E bahwishishe bebungi babadi abakumbu kubofula kwa mbidi kwa bihaso, babingile namu mikishi yingi, ta mwiyilekyela yisamba, ooo, mwanda’yo ayimwiuku.

35Namashika, bufuku ta bandjile kutoka babukile, bakatukile, tēnde mu kabāka, tatekye mwanka. 36Shimona na babadi n’abo tabamulondo. 37Hakumusangana babamwambile’shi, bosoboso abakukyebe. 38N’e bambile’shi, twende mu bibalo bilondakane na kino, nkalungule’ko myanda, mwanda kinafikile ñanka kino. 39Henyihaha badi ebalungula mikāndu-yibuwa mu kitumbwilo kiabo, na moso mu Ngadilea, na kubinga mikishi mwanka.

40Kumongo kubafikile kwadi umune sha kiiwe, tamusendela na kumukunamina hanka, tamwamba’shi; S’ōkumina biabia, ouku kumpwisha. 41Na Yesu hakukwatwa na lusa, b’olwele mboko, bamukuma, tamwamba’shi: Nankyebe, ohwibwe. 42Hakumwamba biabia, busungu bubamuhwile kahindji na kano. 43Hakumulanga bi bukoho bamutakwile. 44Tamwamba’shi; Tala, tokalungulanga muntu; ndokelese obe namwinyi kwi tshiite-Mwakwidi, kamtilubwile bibambile Mosesa, mwanda kwikala bu kitundwilo kwabadi ha kuhwishibwa kobe. 45Anka e habakatukile, babangile kwela musase wa kuhalakasha koso uno mwanda; biabia ’Yesu tamumone’nyi mwa kutwela mu kibalo kumonyibwa na bantu, ooo, anka badi mwikale mu tubāka: bantu namu babadi abamufwila ku mpese yoso.

Currently Selected:

Mako 1: NTLK52

Highlight

Copy

Compare