Mako 12

1Henyihaha Yesu babangile kwi balungula myanda mu nkindji’shi: Kubadi muntu badjimin’efuba dia nfinyu mwifuba mwe, bemwelele luhoho lwa mitshi hanka, bahundwile na bwina bwa kukwengiela, bebakile nshibo yitentekieshene yibula, bedilekyele ’māsa a abadjimi, bayile namu ku lungi luhese lwi kulā. 2Binyibiabia habakumbene kihindji kia bikuba, e batumine mpik’e kwi balami, mu kuata bikuba bia nwifuba die kwi abadjimi. 3Anka baba babamukwete, babamukuhile, abamwalwishe minweminwe. 4Henyihaha batumine mungi muntu e kwabadi, baba mwashile mabwe, babamutanyine kabāla ka mutwe, babamukitshinyine bi bubi. 5Dimo’nyi batumine mungi, yaw’abamwihayile, batumine’nyi bangi be bungi, bangi namu babakuluhilanga, babehayilwe. 6Anka mwan’e kushala abatandjile, mwan’e mukuminyibwe na kifulo, bamutumine kwabadi kunfudilo, bambile’shi: Abakandemekyela mwan’ande. 7Anka badimi baba, babumbishenene’shi: Au nyi muhianyi, twende tukamwihei, biabia buhianyi abukekala bwetu. 8Biabia babamukwete, babamwihayile, babamusumbwile hasha h’efuba dia nfinyu.

9A binyibiabia yawa shē’fuba dia nfinyu akakitshi na minyi? Akafiki mu kulwisha baba badimi, akahe bangi efuba die dia nfinyu. 10A ta nwibatangye kino kifundjilwe kia mukanda w’Efile-Mukulu’shi; Ebwe dia’bahele kwi bebaki ba nshibo, diadia nyi adikālula tamutwe w’ehaka. 11Kinoki nyi kibakitshine Yehowa, na ku meso kwetu nyi mwanda wa kukanya? 12(Binyibiabia) babakyebele kumukwata, ankā’batshinyine moo kibumbu kibadi hanka; mwanda babeukile abo’shi, nyi kwītwe babele luno lukindji, henyihaha babamulekyele, babayile.

13Biabia babatumine kwadi bangi ba Bafadiseo, na ba bena Helode’shi, bakamutee kasele mu biakulwa bie. 14Abo habadi bafikile kwadi, abamulungwile’shi: A mulambukishi, atwiuku ’shi, biodi mbia binyibinyi, totentekyeshā binangu bia bantu, obe totalā mpala ya bantu, ooo, obe olambukisha bantu mwanda w’eshinda di’Efile-Mukulu mu biabinyibinyi; A nyi kishila’nyi mu kulambula Kaisa su? 15A tumulambule’nyi, ta tumuhanga? Anka E kwete kushingula bunsesa bwabo bebulungwile’shi: A nkinyi kianuntompele munda, bandai kumpa mpata nyītale. 16Abo abafwile n’ayo, n’E bebehwishe’shi: A kino kihwandjikisho nkia nanyi na mwanda ufundwe hanka’u? Abo abamwalulwile’shi: Mbia Kaisa. 17Henyihaha Yesu bebalungwile’shi: Nuhe Kaisa bintu bia Kaisa, nuhe Efile-Mukulu bintu bi’Efile-Mukulu. Biabia na kukanya abakanyine.

18Henyihaha Basadusea babafikile kwadi, baba bākulā’ shi: Kusanguka (kwa muntu ku lufu na muwa) ta kwi hanka, babamwihwishe’nyi’shi: 19A mulambukishi, Mosesa betufundjile’shi: Su mukwabo na muntu amono lufu, su alekye mpian’e nkunga shi na mwana, biabia mukwabo (amuyhane) āte mpian’e, amone mwadia kutandjile mukwabo lubio. 20Tala, kubadi balume musambobidi, efu dia’bo dimune’nka. Tutu-abo bebakile mukashi, e bafwīle shī mutande mwana. 21Henyihaha diakabidi bamuhyene, na kufwa bafwile namu, ta mulekye mwana; na mungi akasatu namu anka hamunenka. 22Anka biabia musambobidi w’abo woso babadi n’e, anka ta mbalekye mwana. Henyihaha kunfudilo mukashi namu bamwene lufu. 23A henyihaha namu ahakafiki kusanguka kwa bantu ku lufu, e akekale mukashi a nanyi? mwanda badi mpiane a boso musambobidi. 24Y’esu bebālulwile’shi: wawa nyi ha mwanda wanulubīla, mwanda nubakutwe kushingula bibafundjibwe, sunga mbukome bw’Efile-Mukulu? 25Mwanda ahakasanguka bantu ku lufu ta bakebakil’abo ooo, sunga nkwibakilwa; abakekal’anka hamunenka bu bamwikeilu be mwiīlu. 26Ha uno mwanda wa kusanguka bantu bafwe, ta nwi babale mu mukanda wa Mosesa mu kihindji ki’ebūla ha bamumwekyel’Efile-Mukulu, shi: Ami nyi Efile-Mukulu a Abalahama, nyi Efile-Mukulu a Isaka, n’Efile-Mukulu a Yakoba namu’nyi? 27E t’Efile-Mukulu a bafwe, ooo, anka E nyi Efile-Mukulu a abatala; anwe biabia nwibakambe kulamuka bikata bimoo.

28Henyihaha umune a Bafundji ba mikanda befubwile, na ha kuhusha biabadi abeihushena, na hakushingula Yesu bebetaba bibuwa, bamwihwishe’shi: A mulangilo kinyi ukile yoso bukata? 29Yesu bamwalulwile’shi: Ukata wa milangilo yoso nyi nguno’shi: Hush’obe Isalele, Yehowa Efile-Mukulu etu nyi Yehowa umunenka. 30Obe okafulu kifulo Yehowa Efile-Mukulu obe n’eshimba diobe dioso, na muwa w’obe w’oso, na binangu biobe bioso, na bukome bwobe bwoso; uno nyi mulangilo wa kumbangilo ukata. 31Mulangilo wa kabidi wi bino’shi: Okekala na kifulo na mukwenu bu biodi mwifule obe na mwinyi. Ta kwi ungi mulangilo ukile yino bukata, ooo. 32Mufundji a mukanda bamulungwile’shi: Ee, anka biabia mulambukishi, nyi binyibinyi bioakula’shi, kwi ank’Efile-Mukulu umun’enka; ta kwi mungi, nyi ank’E nyaa. 33Na kumufula kifulo n’eshimba dioso, na binangu bioso, na muwa woso, na bukome bwoso, na kufula mukwenu hamune biodi mwifule obe na mwinyi; biabia mbikile milambu yoso yekyelwe na Bitahwa. 34Habeukile Yesu’shi, E betab’eyi di kalolo, bamulungwile’shi: Obe twe kulā na bufumu bw’Efile-Mukulū’be. Habahwile wawa mwanda ta kubadi muntu’nyi badi na kisukusuku kia kumwihusha mwanda’nyi.

35Biabia Yesu habadi alambukisha mu ntempelo y’Efile Mukulu bebehwishe’shi: A nkinyi Bafundji ba mikanda kiabakwila’shi: Kidisitu nyi mwan’a Dafida? 36Mwanda Dafida na mwinyi bakwile mu Kikudi-E-Selelee’shi, Yehowa balungwile Nfumwami eshi: Shāla ku mboko yande yibalume mpaa na hankatulu be n’obe luhuna mūshi mwa ngwa y’obe. 37Binyibiabia Dafida na mwinyi bamutemunanga’shi; Nfumwami; a biabia E mwan’e na minyi? Henyihaha kibumbu kikata kia bantu bisumanga kibamuhushishe na kusangala.

38Biabia mu lulambukisho lwe E bebalungwile’shi: Dimukai Bafundji ba mikanda, baba abasehela kukindakana bafwale mitwelo yīla, na kusehela kwimunwa mu bisalwe. 39Na mankwasa akata a kumpala e mu bitumbwilo, na ha bidibwa bikata namu abakyeb’anka ha mankwasa akata. 40Baba namu abanyengā bintu bia mashibo a bakashī bafwilwe, bioso mpaa; na kuteka nteko kwEfile-Mukulu kihindji ki bula anka mwanda wa busesa bwabo. Abo, kuhīshwa kwabo akukakidi bukata.

41Henyihaha Yesu bashālele kwinyi ku kilambwilo, badi amono bantu kwete kwela mfalanga mwanka; bebungi babadi bampeta babelele mpata yi bungi. 42Henyihaha kubafikile mukashi mufwilwe, mulanda, belele mwanka makuta e bu mansenke abidi. 43Yesu baitamine bana be ba bukishi, bebalungwile’shi: Binyibinyi nenwamba’shi, Bintu bibēle uno mukashi mufwilwe mulanda, nyi mbikile abiele bakwabo boso abēle mu kilambwilo. 44Mwand’aba boso babalambulanga mwanka mulombene bibungi bwabo; ank’awa shī n’abio batudile mwanka tw’etoso tubadi n’ato, bintu bie bioso bia kudia bi na bene.

Currently Selected:

Mako 12: NTLK52

Highlight

Copy

Compare