Mako 13

1Henyihaha (Yesu) habatukile mu ntempelo, mungi mwan’e a bukishi bamulungwile’shi: A mulambukishi, banda kutala mwikele ano mabwe (e kuno,) aaa! na mwa aibakibwe. 2Yesu bamwalulwile’shi: Omono ano mashibo akata su? ta kukashala ebwe ditentekwe hanundu ha dingi dishī adikatelemunwa hashi, ooo. 3Habadi mushale’nyi ha ngulu ya Olefeta mbulambula na ntempelo, Petelo, na Yakoba, na Yoano, n’Andeleo, baba mwihwishe ku bukunkula’shi: 4Banda kwitulungula mwanda, yino myanda aikafikī efuku kinyi? A kitundwilo kinyi kia kihwa kiabikafiki? 5Henyihaha Yesu bālulwile na kwibalungula’shi: Dimukai, tala muntu akenulubisha. 6Mwanda bebungi abakafiki mwishina diande na kwamba’shi: Ami nyi E, abakalubisha bebungi. 7A hanukahusha myanda ya ngoshi na nkumo yangoshi, tanukasusanga ’mashimb’enu, mwanda yinomyanda ayikafiki, anka kunfudilo kushī mubandjia kwikala. 8Mwanda ungi mwīlo aukatuku ungi mwīlo, na bungi bufumu abukatuku bungi bufumu, nsenga namu ayikatenkatenka mu bihindji bikwabo, na bihuha bia nsala abikamweka na malwa, abio bioso nyi bia kumbangilo bia bishiotshi bimoo.

9Anka dimukai anwe bana bene, mwanda abakenufishe mu bīmu bia basushi, anukakuhilwa mu bitumbwilo, abakenufishe namu ku meso kwa batontshi, na ku meso kwa bafumu ha mwanda wande, na kwikala bu kitundwilo ku meso kwabo. 10Anka mukāndu-wi-buwa (w’Efile-Mukulu) abakalungula milo yoso kwibedi. 11Biabia habakenufisha (mu kimu) ta nukambanga kwalashena’shi, atukesamba kinyi? sunga kunangushena mwanda kwibedi: ank’akio kioso akikenuhebwa mu nguba wawa, ank’akio anukākula; mwanda ta nanwe abakākula, ooo, nyi Kikudi-E-Selelee.

12Tala, mukwabo na muntu akafishe mukwabo ku lufu, na shya mwana ku mwana anka hamunenka; bana namu abakatombokyele bashyabo na banyin’abo, na kwibehashe. 13Bantu boso namu abakenushikwa ha mwanda w’eshina diande, anka yawa akashimata hoo, mpaa na kunfudilo biabi’akahashibwa.

14Anka hanukamono kihatakene kia musalu wa bisumanga, kibabakwilwe kwi Danyele mutemuki, nkimane mu kihindji ki kishila mu ntempelo (E abala mwanda eu ashingule), binyibiabia baba be mu Yudea abasukile ku mangulu. 15Henyihaha (mimtu) e ku musaka wa nshibo ta kaiki’shi, nkatwele mu nshibo, nkatushe kintu ki mwanka, ooo. 16Yawa namu e mwifuba ta kāluka’shi, nkate mutwelo wande. 17Aa leka! malw’abo aba basha mayimi, na kwi basha kōmesha bana mu aa mafuku. 18Nuteke Efile-Mukulu’shi, kukama lubilo kwenu ta kukekalanga mu hamashika. 19Mwanda mu aa mafuku amukekala malwa akata akutwe sunga kuhwandjikila n’angi namu, kubanga ku mbangilo yibahangil’Efile-Mukulu, kufisha mpaa na lelo, sunga nkumpala kwinyi. 20Su Efile-Mukulu ta muheleshe aa mafuku, kushī muntu’mune akuhanda, anka ha mwanda wa bantu be babasangudibwe, E baheleshe’nyi mafuku aa. 21Biabia su muntu enwamba’shi; Talai’u nyi Kidisitu, sunga’shi: Talai ngiawa ekwaa! Ta numukuminanga, ooo. 22Mwanda kukabukanga bakidisitu ba madimi, na batemuki ba madimi, abakalesha bitundwilo na myanda ya kukanya, ha mwanda wa kubemba benyi bantu abasangulwe kw’Efile-Mukulu, su babadi akwiuku kukitshina biabia. 23Anka dimukai anwe; Talangai tampwile kwinulungula myanda yoso kwibedi.

24Anka mu aa mafuku, kiakia kia malwā’kata hakibakidi, nguba aikakekala mufito, na mweshi taukatoko. 25Na nyenyenyi ya mwiilu ayikahono hashi, na biabukome bia mwiilu abikatshinkatshinka. 26Kumongo abakamono Mwan’a muntu kwete kufika ’makumbi na bukome bukata na ntumbo. 27Henyihaha E akatumu bamwikeilu be, akakongo basangudibwe be ba ku mpese yoso yinanka ya luhahi, na ku kunfudilo kwa nsenga, mpaa na kunfudilo kw’eilu. 28Talai, ambule’nyi lukindji luno’lu lwa kikuku. Hanumono lutabi lwao lukī lubishī, talutusha namu mabishi, nyi hanushingulwila’shi, hampeshi tadi hehi. 29Anka biabia anwe namu, hanukamono yino myanda yoso hayikafiki, nyi hanukashingula’shi, tadi hehi, anka ku kibelo. 30Mbinyibinyi nenwamba’shi: Bantu ba kino kihungilo ta bakakidi, sunga mpahelahela, mpaa n’ahakakumbana yino myanda yoso. 31Eilu na nsenga abikashimina, anka myanda yande tayikashimina, sunga mpahelahela.

32Anka mwa diadi’efuku su nguba kinyi ta kwi muntu ebiuku, ooo, na bamwikeilu ba mwiilu benyi, sunga E winyi Mwana, ooo, anka Shye nyaa. 33Dimukai, nwikalei na kutengyela na luteko namu, mwandā’nwe ta nwiuku ahakafiki kiakia kihindji. 34Mwanda eu nyi bu muntu mwende ku angi mahia kula, balekye nshibo ye, bahele bahika ba matalwa, bebābile’nyi mifubo kila w’e, kila w’e, balayile nsentedi aha kibelo’shi: ontengyele. 35Binyibiabia nwikalei na kutengyela, mwanda tanwiuku hakafiki sha nshibo, su nkiolwa su munkatshi a bilo, su h’etombol’ebedi, su mpa lutokyela. 36Biafiki lubilo (biabia) tenusangananga balale mu tulo. 37Anka bino binenulungul’anwe, nebilungula mpaa kwi boso’shi; Nutengyelai.

Currently Selected:

Mako 13: NTLK52

Highlight

Copy

Compare