Mateo 28
28
1Kunfudilo kw’efuku dia Sabado, hakubanga bufuku kutoka, mwifuku dia kwibedi dia lubingo, Madiya Mangadalene na mungi Madiya abafikile kutala ku kilele. 2Biabia talangai, kubadi kusanasana kwa nsenga, mwanda mwikeilu a Yehowa bayikile mwiilu, bafikile, balalesh’ebwe dibadi ku kibelo, bashalele hanka. 3Ha mpala he habadi bu luhenyo lwa mpeshi, bifwalwa bie bibadi bitoka soo bu (niege). 4Ha mwanda wa kutshina moo, balami abasushile, abālulukile bu bafwe. 5Biabia mwikeilu bālulwile bana bakashi’shi: Tanutshinanga moo, mwanda neuku’shi: Nyi Yesu anukimbi, badi mwihayibwe ha nkulusu. 6E te muno, mwanda tahwile kubuka, anka mubadi akula. Fikai nutale amwikalanga mulale Nfumwetu. 7Biabia ndai lubilo, nukalungula bana-be-ba-bukishi’shi: E tabukile ku lufu, talangai, ngiawa benubadidila ku Ngadilea; anukamusañana kwanka; talai, nahu kwinulungula. 8Biabia abakatukile lubilo ku kilele na moo, na kusangala kukata; abakamine lubilo mu kufisha uno mwanda kwi bana-be-ba-bukishi.
9Ank’abo, ha kwenda mu kulungula bana-be-ba-bukishi, Yesu bafumankene n’abo; bakwile’shi: Nenwimunai; Abafikile kwadi, abamukwete ku ngwā, tabamulangwila. 10Henyihaha Yesu bebalungwile’shi: Ta nwikalanga na moo, ndai, nukalungule bande bakwetu bēnde ku Ngadilea, abakansañana kwanka.
11Habadi abēnde, talangai, bangi ba balami abafikile mu kibalo, tabalubula kwi batshiite-bakwidi bakata bioso bibakitshinwe. 12Biabia hakwibungila hamune na bakulu, na hakudia lukūku, abahene mono yibungi kwi basalai, eshi: 13Nwamba’shi, bana-be-ba-bukishi abafikile bufuku, abamwibi hatwikalanga balale-tulo. 14Su uno mwanda aukafiki ku matwi a mutontshi mukata e hanundu ha bakwabo, atukamusendela’shi: tabekekale na mwanda. 15Biabia abatambwile mono, abakita’nka mwa bebalambukishwe; Yino ntumbo yibafumankene munkatshi mwa Bena Yuda mpaa na lelo uno.
16Binyibiabia bana-ba-bukishi ekumi naumune abayile mu Ngadilea, ku ngulu yibebalayidile Yesu. 17Abo habamumwene tabamulangwila: anka bangi babadi na mealasheno. 18Henyihaha Yesu bafikile, bakwile n’abo’ shi: Katshintshi koso kampebwe mwiilu na ha nsenga.
19Binyibiabia, ndai, nulambukishe milo yoso, na kwibabatshisha mwishina dia Yaiya, na dia Mwana, na dia Kikudi-E Selelee. 20Nwibalambukisha kulama bioso binenukamikile, biabia talangai, nyi n’enu mafukuoso mpaa na kunfudilo kwa hanohansenga. Amena.
Currently Selected:
Mateo 28: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo