Mateo 27
27
1Habubatokyele tanamashika, batshiite-bakwidi bakata boso na bakulu ba bantu, abebungile hamune ku lukuku lwa kukimba mwa kwihayila Yesu. 2Habamwanyine, abayile n’e, abamufwishishe kwi mutontshi mukata hanundu ha bakwabo, Pontyusa Pilato.
3Biabia Yudasa, winyi bamwihulukile kīhuko, habamwene badi muhīshwe, belangile mwishimba die, bālwishe dimo binyi bihindji bia nfalanga ya nfedha makumi asatu kwi batshiite-bakwidi bakata na bakulu, 4eshi, nasolo mwanda hakwihuka kīhuko ki mase a muntu shī na mwanda. Abo abamwālulwile’shi; A wawa mwanda ngwetu su? n’obe na mwinyi a kutala wawa. 5Binyibiabia basumbwile binyi bihindji bia nfalanga hashi mu ntempelo, bakatukile, bayile akehudika. 6Batshiite-bakwidi bakata abātshile bino bihindji bia nfalanga, bamba’shi; tatwibitulanga mu kilambwilo, nyi nkishila, mwanda yino mono ngia mase. 7Abeididile lukuku, abeihene kwifuba dia mbūfi, bu mwabadi kushika mwanka bantu bēnyi. 8Binyibiabia diadi’efuba dibatemwinwe bwifuba dia mase, mpaa na lelo uno. 9Henyihaha bibakumbashwa bibākwile mutemuki (Yelemiya) ’shi; Abātshile bihindji bia nfalanga ya nfedha makumi asatu, nyi winyi mūlo wa winyi abatungile, E, nyi abatungile kwi Bena Isalele ba na bene. 10Biabia abebihene kwifuba dia mbūfi mubansangwidile Yehowa. 11Yesu baimene ku mpala kwa mutontshi mukata e hanundu ha mukwabo. Henyihaha mutontshi mukata bamwihwishe’shi: Obe we nfumu a Bena Yuda su? Yesu bamwālulwile’shi: Obe tohwa kwibiakula. 12Biabia habatewilwe kwi batshiite-bakwidi bakata na bakulu, E tamwibalule mwanda. 13Biabia Pilato bamwihwishe’shi: A twemuhushe myanda yibungi yabakuhatūla na yoyi su? 14E ta mwalule sunga nkishima kimune; biabia mutontshi e hanundu ha bakwabo bakanyine bi moo. 15Ha bidibwa bia kusehela, mutontshi mukata e ha nundu ha bakwabo, badi na kihikwa kie kia kwibahoswela mwina lukano, ese abakyebe. 16Babadi kwanka mwina lukano a ntumbo, atemunwa bu Balabasa. 17Binyibiabia habebungile hamune, Pilato bebehwishe’shi: A nukyebe’nyi nuhoswele Balabasa su Yesu atemunwa bu Kidisitu? 18Mwanda beukile abamufwishisha ha mwanda wa kiutu.
19Habadi mushale ha kimu, mpian’e bamutumine eyi eshi: Twekalanga na mwanda sunga mpahelahela na yawa muntu mululame, mwanda lelo uno nafwambuka na bintu bibungi mu kilotwa ha mwanda w’e. 20Anka batshiitebakwidi bakata abanyishishe binyi bibumbu’shi: Nutekye Balabasa, aihe (anka) Yesu. 21Mutontshi mukatae hanundu ha bakwabo bebālulwile’shi: A habadi-bubidi bwabō’ha a nyi nuhoswele’nyi? Abakwile’shi: Balabasa. 22Pilato bebalungwile’shi: Binyibiabia a nakitshi na minyi na Yesu atemunwa bu Kidisitu? Boso abamwambile’shi: Abambībwe ha nkulusu. 23Biabia mutontshi mukata e hanundu ha bakwabo bambile’shi: A kibubi kibakitshine nkinyi? Ank’abo abanyishishe kwela ntisase’shi: Abambībwe ha mutshi uhingishene.
24Biabia Pilato habamwene bakutwa kwibakambile sunga mpahelahela, anka eunga dibabushwa, e bātshile mema, beosheshe ku maas’e ku mpala kwa bibumbu’shi: Amintshi mwamwa’mi a mase a uno mululame, ooo; talangai wanka anwe bana bene. 25Henyihaha bantu boso abamwalulwile’shi: Enyi mase e akekale kwinyi kwatudi, mpaa na kwinyi ku bana betu.
26Binyibiabia bebahoswelele Balabasa, na habahwīle kukuhila Yesu, bamutushishe mu kubambibwa ha nkulusu. 27Henyihaha basalai ba mutontshi mukata e hanundu ha bakwabo, abayile na Yesu kwibalasa dia winyi mutontshi, biabia bebakongeshe kwadi e kibumbu kioso kia basalai. 28Biabia abamūfule (bilamba) tabamufwadika na mutwelo umonga hyaa.
29Abalukile kilongo kia milobo, abamutentekyele’kio ku mutwe, na mulengye mwiasa dibalume, abakune manwi ku mpala kwe, tabamusengye’shi; Atukwimuna nfumu a Bena Yuda. 30Biabia abamufidile mata, abātshile mulengye, abamukuhila nao ku mutwe. 31Habahudisha kumusēnga, abamufudila mutwelo, abamufwadikile bifwalwa bie na bene, abayile n’e kumubamba ha nkulusu. 32Na hakutuka, abafumankene na mwina Sailene, eshina die bu Shimona: Yawa abamufinyikile kutwala nkulusu ye. 33Habafikile ku kihindji akitemunwa bu Ngolongota, nyi nkuhatula’shi, kihindji kia kabāla.
34Abamuhele nfinyo yisase, yibasangakenwe na bibulo kutoma; habatompele kutoma beitūne. 35Biabia abamwihā ha nkulusu, abeabishene bifwalwa bie, bakwete kuta (n’abio) bubale, mwakidia kukumbeshwa kibatemukile mutemuki’shi: Baneabishene bifwalwa biande munkatshi mwabo, na bifwalwa biande banebitee na bubale. 36Habadi abashāla abamutadile kwanka. 37Abatūle kunundu kwa mutwe we kitewilo kifundjibwe’shi: UNO NYI YESU A BENA YUDA. 38Biabia, banyenanyi babidi abadi kwanka, ababambilwe n’e, umune ku mboko ye yibalume, mungi ku mboko yibakashi.
39Abo abakidi eshinda tabamufukūle, bakwete kuhuka mitwe’shi: 40Obe bodi ofūna ntempelo’shi; Nankeishindji, nankeibaka’nyi mu mafuku asatu, ehashengye obe na mwinyi. Su we Mwan’Efile-Mukulu oikyengye ku nkulusu. 41Batshiite-bakwidi bakata namu, na bafundjiba-mikanda na bakulu, tabamusēngye’nka hamune, eshi: 42Badi ahasha bangi, (anka) e na mwinyi bakutwa kwīhasha. Su e nfumu a Isalele, ayikengye binobino ku nkulusu, biabia atwe atukamukumina. 43E bakuluhilanga mw’Efile-Mukulu; amuhasliengye binobino, su’mukumine; mwanda e bakwile’shi: Ami nyi Mwan’Efile-Mukulu. 44Banyenanyi namu ababambilwe n’e, tabamusēngye anka hamune. 45Talangai, kubanga ha nguba mitwe, mpaa na ku nsa yisatu, mufito ubadi ha nsenga hoso. 46Henyihaha nsa tayidi hehi na yisatu, Yesu bēle musase ukata’shi: Eli, Eli, lama sabakatani, kuhatula nkwamba’shi: Efile-Mukulu ande, Efile-Mukulu ande, a nkinyi kibonfutala? 47Bamo abadi bemane kwanka, habahushisheo, abakwile’shi: Ngiu taitanyina Eleasa. 48Biabia kahindji n’āka umune abo bayile lubilo, bakātshile ehondje, bediushishe na nfinyo yisase, beditentekyele ha mulengye, bamuhele kutoma. 49Bangi abambile’shi: Bandai kuleka, tutale su Eleasa akafiki mu kumuhasha.
50(Biabia) Yesu habēle musase n’eyi di bukoho diakabidi, batūle muwa w’e. 51Henyihaha talangai, kilamba kibadi kikingwe mu ntempelo kibasanukile bihese bibidi, kubanga kunundu mpaa na kūshi; nsenga yibasanyine, na mabwe abatanyikile; 52Bilele (bia bafwe) bibabulukile, bitanda bia bantu be bungi balulame bibadi bilale mu tulo, bibabushishwe. 53Abatukile mu bilele kumongo kwa lusangukilo lwa lufu lwe, tabende mu kibalo kibahatwilwe kishila, abamwekyele kwi be bungi. 54Biabia mulami a basalai lukama, na baba abadi n’abo, abadi abalama Yesu, habamwene kusanasana kwa nsenga ’a yaya myanda yibakitshinwe, abakwatshilwe na moo bibi, babambile’shi: Binyibinyi au ekalanga Mwan’Elile-Mukulu. 55Na bana bakashi be bungi abadi kwanka, bakwete kubandjilakula; nyi babalondele Yesu ku Ngadelea kumusamba. 56Munkatshi mwabo mubadi Madia Mangadalene, na Madiya, nyin’a Yakoba, na Yosese, na nyin’a bana ba Sebede. 57Hakufika kiolwa kia bufuku, muntu mpeta, mwina Adimatea, atemunwa bu Yosefe, e namu badi mwan’a bukishi a Yesu. 58Bayile kwi Pilato, batekyele kitanda kia Yesu. Henyihaha Pilato bakamikile’shi: Muhei kianka. 59Yosefe, habātshile kitanda, bekihombele mu kilamba kitoka kia linene. 60Bekitudile mu nyenyi yihya yibadi mubangule ku lubwebwe; balalesbē’bwe dikata ku kibelo kia nyenyi, bakatukile. 61Kubadi kwanka Mangadalene na mungi Madiya, abashalele mbulushi na ku kilele.
62Binyibiabia efuku dibadi adilondena n’adia Kilumbulwilo, batshiite-bakwidi bakata na Bafadiseo abebungile kwi Pilato, 63aboshi, A Mwanana, tubatentekyesha’shi; awa sha madimi, habadi kiatala bambile’shi: Mafuku asatu hākakidi, nankabuku dimo. 64Binyibiabia ebakamik’obe’shi, lamai kilele kalolo mpaa na kwifuku dia kasatu tala bana be-ba-bukishi bakafika bufuku kumwiba, bakalungula na bantu’shi: Babuku ku lufu. Biabia kōngola kwa kunyima akukakidi kwa kwibedi. 65Pilato bebalungwile’shi: Balami nwi n’abo, nwende, nukekinyishe hoo mwanudi beukile bia kunyisha. 66Biabia abayile, abanyishishe kilele hoo, abalamikile ñanga kwibwe, na kutula kwanka balami.
Currently Selected:
Mateo 27: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo