Mateo 26
26
1Binyibiabia bitabibakitshine habahwile Yesu (kwakula) yino myanda yoso, balungwile bana-be-ba-bukishi’shi: 2Anwiuku’shi, ahakidi mafuku abidi nyi kidibwa kia Paque na Mwan’a Muntu akehulukibwa mu kwihayibwa ha mutshi uhingakane. 3Henyihaha batshiite bakwidi-bakata na Bafundji-ba-Mikanda, na bakulu ba bantu, abekoñene hamune kwibalasa kwa tshiite-mwakwidi mukata, aitanyinwa bu Kaifasa. 4Tabahwandjikisha mu kukwatshila Y’esu ku bufyefye, mwa kumwihayila. 5Anka abakula’shi: Kushī h’efuku dia bidibwa bia kusehela bia Yehowa, tala eunga’diakatuku munkatshi mwa bantu.
6Habadi Yesu mu Betane mu nshibo ya Shimona, sha kifwi, 7Kubafikile kwadi mwana mukashi na mulangye wa mwimu wa mulashi wibuwa bukalabale buneme; beuhongolwele ha mutwe he habadi mushāle ha bidibwa. 8Anka bana-be-ba-bukishi habeumwene, babakwete nsungu, eshi; A kunu kushimisha nkwa kinyi? 9Mwanda uno mwimu ubadia kulombana kuhana ku mono yibungi, na kuhelwa balanda. 10Habeuukile Yesu, bebalungwile’shi; A nkinyi kianukalakasha mwana mukashi? mwanda e bankitshine mufubo wibuwa. 11Mwanda’nwe nwi na balanda n’enu mafuku oso, anka’mi nki n’enu mafuku oso. 12Mwanda hakumpongolwela uno mwimu ha mbidi hande, e beukitshine ha mwanda wa kushīkwa kwande. 13Binyibinyi nenwamba’shi: Kosokoso akukalungulwa uno mukāndu wibuwa hanohansenga hoso, akukalungulwa namu kino kibakitshi uno mwana mukashi, takidi bu kiakumutentekyēsha.
14Henyihaha umune a mu b’ekumi na babidi, ētanyinwe bu Yudasa Isakadiota, bayile kwi batshiite-bakwidi-bakata, 15bebalungwile’shi: A nkinyi kia nukyebe kumpa, n’ami musokwela kwanudi? Abo abalombashena ne ku mono ya nfalanga bu makumi asatu. 16E babangile ku diadi’efuku kukimba mwadia kumwihulukila.
17H’efuku dia kwibedi dia (bidibwa bia kusehela) mampa ashī na kitatusho, bana-be-ba-bukishi abafikile kwi Yesu, tabamwihwisha’shi: Okyebe tukakulumbulwile kodi okudila kudibwa kia Paque kwi kunyi? 18E bebalungwile’shi: Ndai mu kibalo kwi muntu kampanda, nukamulungula’shi: Mulambukishi amba’shi: Kihindji kiande takidi hehi, nankadila kobe kidibwa kia Paque nabana-bande-ba-bukishi. 19Banaba-bukishi babakitshine anka mu bebalungudile Yesu; abalumbulwile kidibwa kia Paque. 20Binyibiabia habafikile kiolwa kia bufuku, bashelele na b’ekumi na babidi. 21Habadi tabadi, bakwile’shi: Binyibinyi nenwamba’shi: Umun’ēnu akangihuluka kīhuko. 22Biabia abafitshile ’mashimba, ababangile kumwihusha umune umune’shi: A nami su, Mwanana? 23E bālulwile’shi: Yaw’asunu nami mboko ye mu kihulu, n’e winyi akangihuluka. 24Mwan’a Muntu ēnda’nka mwa kibamutundjilwe; anka mpombo kwi yawa muntu amwihulukila kīhuko, bibadi buwa kwi yawa muntu su tamutandwe. 25Henyihaha Yudasa winyi bamwihulukile kīhuko, bālulwile’shi: A Mulambukishi, a n’ami winyi su? E bamulungwile’shi: N’obe bākula.
26Biabia habādi abadi, Yesu bātshile dimpa beditekyele mwabi, editshokola, ediha bana-ba-bukishi’shi: Tambulai, nudie; dino nyi mbidi yande. 27Bātshile’nyi ekoho, editumbwila Efile Mukulu’ shi; Nutome’dio anwe boso. 28Mwanda ano nyi mase ande a kilombeno kihya, āsumbukila bebungi, mwanda wa kulekyelwa kwa milwisho. 29Ank’ami nenulungula’shi: Tankatomo dimonyi ku bino bikuba bia nfinyo, mpaa na ku diadi’efuku diankeyitomo n’enu, tangihya mu bufumu bwa Yaiya. 30Biabia habahwile kuyimba lono, abakatukile, benda ku ngulu a Olefeta. 31Henyihaha Yesu bebalungwile’shi: Anwe boso anukakokoshwa ha mwanda wande buno bufuku; mwanda ngufundjibwe’shi: Nankakuhila mulami ayo, na mikoko ya mu lombe ayikahalakashwa kungi. 32Anka hampu kusanguka (ku lufu) dimo, nankenubadidila ku Ngadilea. 33Petelo bamwālulwile’shi: Sunga boso abakakokoshwa ha mwanda w’obe, ami tankakokoshwa sunga mpahela, ooo. 34Yesu bamulungwile’shi: Binyibinyi nakulungula’shi: Buno bufuku, kwibedi kwa kusamina kw’etombole, okantunu misusa yisatu. 35Petelo bamwalulwile’shi: Sunga nadia kufwa n’obe, tanadia kukutuna ayoyo. Bana-ba-bukishi boso abakwil’anka hamune.
36Henyihaha Yesu bafikile n’abo aha hantu ahalumbibwa bu Ngetesemane, biabia e bambile bana-ba-bukishi’shi: Hanyiende ’kwa mu kuteka, anwe namu nushale hano. 37E bayile na Petelo, na benyi bana babidi balume ba Sebede, babangile kufwambuka na kwikala n’eshimba dibushito di moo. 38Henyihaha bebalungwile’shi: Eshimba diande dibakamba kwinyongola mpaa na ku lufu; Ikalai hano, nutengyele n’ami. 39Binyibiabia bayile ku mpala kihindji kihi, babandamine mpala ye hashi, tatekye’shi: A Yaiy’ande, su nkilombane, kihulu kino kinkile’mi, anka bishī bu mwankyebela, ooo, anka mokyebela’be. 40Biabia bafikile kwi bana-be-ba-bukishi, bebasānene balale mu tulo, bambile Petelo’shi: A nkinyi, nubakutwa kutengyela hamune n’ami, sunga nsa yimune? 41Hasukai, nutekei, tala nwakatwela mu kutompibwa; eshimba binyibinyi di na musanku, anka mbidi ngibofule. 42Bayile kihindji diakabidi, batekyele’shi: A Yaiya’nde, su kihulu kino takiuku kunkila’mi, anka su nyi nkitome kianka, nyi mwamukyebel’eshimba diobe bikitshibwe mwanka. 43Biabia bafikile kwi bana-ba-bukishi bebasañene balale mu tulo dimo, mwanda meso abo abadi bushito bibi. 44Biabia bebalekyele, bayile dimo, batekyele diakasatu, bakwile bishima bioso hamune. 45Henyihaha bafikile kwi bana-be-ba-bukishi, bebalungwile’shi: Lalai binobino shenu nwikishei, talai, nsa yibafiki’shi, Mwan’a Muntu behulukilwe kīhuko ku maasa a basodi ba myanda 46Ebwei, twendei, talai winyi akungihuluka tadi hehi.
47Biabia habadi kiakula, Yudasa, umune a mu b’ekumina-babidi, bafikile na kibumbu kikata kitwale mpete ya ngoshi na tubongye; kibatuku kwi batshiite-bakwidi bakata na kwi bakulu ba bantu. 48Binyibiabia winyi bamwihulukile bebahele kitundwilo’shi: Yawa’nyi fifiena n’e ku milomo, nyi E; numukwate biya. 49Kahindji n’āka bafikile kwi Yesu, tamwamba’shi; Nankuseme! Labi! befifiene n’e. 50Yesu bamwambile’shi: A kūku, bofwilakinyi? Henyihahaabo abolwele maboko kwi Yesu, abamukwatshile abayile n’e. 51Talai, umune’ābo babadi na Yesu bōlwele mboko ye, batushishe luhete lwe lwa ngoshi, batahile mpika a tshiite-mwakwidi-mukata, bamutshibile etwi die. 52Binyibiabia Yesu bamulungwile’shi; Alusha luhete lwobe mu kihusula kiakio, mwandā’bo boso abasomona luhete lwa ngoshi, abakalwila na luhete lwa ngoshi. 53Otentekyesha’shi, ami tañuku binobino kwitanyina Shami, E namu akantumina bamwikeilu kukila binunu makumi musambobidi na bibidi su? 54A biabia, Bifundwe bi’Efile abikakumbashwa na minyi’shi, anka biabia nyi mbihwandjikile kwikala nyi? 55Ha yawa nguba Yesu balungwile bibumbu bia bantu’shi: A nubatuku na mpete ya ngoshi na tubongye mu kunkwata, bu biabakwata ngifi su? Kwifuku n’efuku nashalele n’enu nkwete kulambukisha mu ntempelo, n’anwe tanwibankwate. 56Anka bino bioso bibakitshibwe’shi: Bifundwe bi’Efile bia batemuki bikumbashwe. Henyihaha bana-be-ba-bukishi boso babamulekyele, tabasuku.
57Abo babakwete Yesu abamukunkwishe kwi Kaifasa, tshiite-mwakwidi mukata’ nyi kubebungīle bafundji-bamikanda na bakulu. 58Anka Petelo bamulondele kulākula, mpaa na ku luhoho lwa tshiite mwakwidi mukata, batwelele, bashalele hamune na bafubi’ shi: Ntala kwabifudila. 59Biabia batshiite-bakwidi bakata na bakulu, na kikoñeno kioso kia kimu, babakimbile tumonyi twa madimi kuhonesha Yesu mu kumwihā. 60Anka tambamone ooo: Sunga tumonyi twa madimi twibungi tubafikile, tambamone, ooo. Kunyima, kubafikile tumonyi tubadi twa madimi’shi: 61Uno (muntu) bambile’shi: Neuku mwa kushindjila ntempelo y’Efile-Mukulu na kwībaka dimo mu mafuku asatu. 62Biabia tshiite-mwakwidi mukata bebwele, tamwambashi: Obe tōlula mwanda su? A uno (mwanda) wi na minyi aukuhatula tumonyi? 63Anka Yesu bauminyine nyaa. Binyibiabia tshiite-mwakwidi mukata bālulwile, bamulungwile’shi: nakutshihila mutshiho kw’Efile-Mukulu a muwa ami’shi, wetulungule su n’obe Kidisitu Mwan’Efile-Mukulu. 64Yesu bamwalulwile’shi: Obe bohu kwakula: anka nenulungula’shi: Ahakayisha kihindji anukamono Mwan’a Muntu mushale ku mboko yibalume ya bukome, afiki namu ha makumbi a mwiilu. 65Henyihaha tshiite-mwakwidi mukata besanwine bifwalwa bie’shi: E bahu kukā Efile-Mukulu, a nkinyi kiatukimbila tungi tumonyi? talai, binobino nubahusha kukā kwe. 66Anwe namu anutentekyesha na minyi? Babālulwile’shi: E muhwandjikile lufu. 67Henyihaha abamufidile mata mu mpala mwe, abamukuhile bikonyi; bangi tabamukuhila nsasu’shi: 68Obe Kidisitu etuhatulwile bakukuhila nanyi?
69Petelo badi mushale hasha mu luholio; henyihaha kitumwanga bafikile kwadi’shi: Obe namu bodi na Yesu a ku Ngadilea. 70Anka e batune ku mpala kwa boso’shi: Tanyiuku na kinyi kiokula’ki, ooo. 71Habadi atuku mpaa na ku kishikamino, mungi (kitumwanga) bamumwene, tākula na babadi n’abo kwanka’shi: Na uno namu badi na Yesu a ku Nasaleta. 72Batune dimonyi na kutshiha’shi: Tañuku yawa muntu. 73Habayishishe kihindji abo babadi bemane hehi, habefubwile hehi, abakwile kwi Petelo’shi: Binyibinyi obe we anka’bo, mwanda kwakula kobe kubakutundusha. 74Henyihaha e babangile kwela muloa na kutshiha’shi: Yawa muntu tamwiuku, ooo. Kahindji n’āka etombole dibasamine. 75Biabia Petelo batentekyeshe mwanda ubakwile Yesu, ubamulungwile’shi: Kwibedi etombole tadiasamine, obe okantunu kasatu. Henyihaha e batukile hasha, badīle bikata.
Currently Selected:
Mateo 26: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo