Mateo 25
25
1Henyihaha Bufumu bwa mwiilu abukahwandjikile bakashi tumama ekumi, abātshile matāla’bo, abatukile mu kutundaisha mubambi. 2Batano b’abo abadi na kalolo, batano abadi balekane. 3Baba babadi abalekane abātshile matāla’bo, tambēle mwimu mwanka. 4Anka baba basha kalolo abayile na mwimu mu biasa biabo na matāla’bo kumune. 5Habayishishe mubambi, boso tababunguta, balale tulo. 6Ha nkilonkatshi kia bufuku kubēlwe musase’shi: Talai, mubambi a mukashi ngiu wafiki, ndai mu kumutundayila. 7Biabia baba bakashi tumame abebwele, abalumbulwile matala’bo. 8Balekane abatekyele baba basha kalolo’shi: E tuhei umo mwimu wenu, mwanda matāla etu akyebe kushima. 9Anka basha kalolo abālulwile’shi: Ayoyo, tala taukalombana kuutwe n’anwe; anka ndai kwi’ba ahana, nukeudile’nwe bana bene. 10Anka habāyile mu kuula, mubambi bafikile; na baba abadi balumbulwe abatwelele n’e mu bidibwa bi’ebambo; na kibi kibashitshilwe. 11Kumongo, bangi bakashi tumame abafikile’shi: A Mwanana, a Mwanana, etushitwile. 12Anka e bālulwile’shi: Binyibinyi nenulungula’shi: Ta nyi nwiuku’nwe, ooo. 13Binyibiabia hasukai, mwanda tanwiuku efuku, sunga nsa ahakafiki Mwan’a Muntu.
14Mwanda (bufumu bwa mwiilu) mbuhwandjikile bu muntu ha luendo ku nsenga yi kula; baitanyine bahika be, bebahele bintu bie. 15Bahele umune ntalenta yitano, kwi mungi yibidi, umo’nyi yimune; kwi muntu ese bu muhunda kalolo ke; kahindji n’aka bayile luendo lwe. 16Biabia yawa batambwile yitano, bayile mu kusungula n’ayo, befwimishe yingi yitano n’ayo. 17Yawa namu batambwile yibidi, bafwimishe yingi yibidi. 18Anka yawa batambwile yimune bayile, babundwile mu nsenga, beyifile mono ya nfumwe. 19Habayishishe kihindji kikata, nfumu a baba bahika bafikile, babadikile n’abo (bintu bie). 20Biabia yawa batambwile ntalanta yitano, bafikile, bafwishishe yingi ntalanta yitano’shi; A nfumwami, bompele ntalanta yitano; Tala, nafwishisha n’ayo yingi ntalanta yitano. 21Nfumwe bamulungwile’shi: Obe shobe bolumbula, mpika mulumbulukye a kishima; bodi na kishima mu bintu bihela, nankakutulu bu mulami hanundu ha bintu bi bungi; twel’obe mu muloo wa nfumwobe. 22Yawa namu batambwile ntalanta yibidi bafikile’shi; A Mwanana, bompele’mi ntalanta yibidi; tala nafwimisha n’ayo yingi yibidi. 23Nfumwe bamulungwile’shi: Obe shobe bolumbula, mpika mulumbulukye a kishima; bodi na kishima mu bintu bihela, nankakutulu bu mulami hanundu ha bintu bi bungi; twel’obe mu muloo wa nfumwobe. 24Henyihaha yawa batambwile ntalanta yimune bafikile’shi: A Mwanana, neukile’shi, obe e muntu ebukoho, oumbula hashī mumine, okōngola namu hoshī muhalakashe; 25N’ami nadi na moo, nayile, nafya ntalanta yobe mu nsenga; talanga, ngiyi yodi n’ayo yaya nginyi yobe. 26Nfumwe bamwālulwile’shi: Obe mpika e bubi mulekane, bweukile’shi, naumbula hanshī mumine, nakongolā namu hanshī muhalakashe; 27Bodia kutula biabia mono yande kwi bashintudi, biabia ami, hakutika hande, nadia kusañana yande na yaya yibasungulwile. 28Binyibiabia, mumanei ntalanta kwadi, nwiyihei yawa e na ntalanta ekumi. 29Mwanda kwi muntu ese e n’abio akahebwa (bingi), e namu akekala na bifwimi; anka kwi’wa shī n’akio, akamañunwa’kia kiadi n’akio. 30Nuele yawa mpika a bisumanga hasha he mufito fututū; akwa akukekala kudila na kwisuma meno.
31Ahakafiki Mwan’a Muntu mu ntumbo ye, na bamwikeilu boso balamunwe-be-kishila n’e, henyihaha akashala ha luhun’a nsulu lwa ntumbo ye: 32Mīlo yoso ayikakongolwa ku mpala kwe; E akebalamuna halahala, bu mulami alamuna mikoko ku mbushi. 33Akatulu mikoko ku mboko ye yibalume, anka mbushi ku mboko ye yibakashi: 34Henyihaha Nfumu akalungula be ku mboko ye yibalume’shi: Fikai anwe basha mwabi kwi Shami, nuhyane bufumu bubenulumbulwilwe ku mbangilo kwa hanohansenga. 35Mwanda nadi na nsala, nubampele biakudia; nadi na nyota, nubampele biakutoma; nadi mwenyi, nubankukile; 36nadi musekenyi, nubamfwadikile, nadi na busungu, nubafikile kuntompa; nadi mu nshibo ya lukano, n’anwe nubafikile kwandji’mi. 37Henyihaha balulame abakamwalula’shi; A nfumu, efuku kinyi diatubakumwene na nsala, twakudisha? sunga na nyota, twakutomesha? 38Kihindji kinyi kiatuba-kumwene bu mwenyi, twakukukila? sunga musekenyi, twakufwadisha? 39Na kihindji kinyi kiatubakumwene na busungu, sunga mu nshibo ya lukano, twafika kukutompa? 40Ntumu akebālula’shi: Binyibinyi nenulungula’shi: Anka mwanubakitshinyine kwi umune a bano mukile kihēla kwi’ba bakwetu, biabia nubankitshinyine’mi. 41Henyihaha akalungula be ku mboko yibakashi’shi: Katukai kwandji’mi, anwe bēlwe muloa, mpaa na mu kālo ka ikala-ika, kabalumbulwilwe diabola na bamwikeilu be; 42Mwanda nadi na nsaia, tanubampele biakudia; nadi na nyota, tanu bampele a kutoma, 43nadi mwenyi, tanwibankukile; nadi muswa tanwibanfwadisha; nadi na busungu, na mu nshibo ya lukano, tanwibafikile kuntala, ooo. 44Henyihaha abo namu abakamwalula’shi; A Mwanana, efuku kinyi diatuba, kumwene na nsala, sunga na nyota, su bu mwenyi, sunga muswa, su mbusungu, su mu nshibo ya lukano, n’atwe tatwibakukwashie? 45Henyihaha E akebālulwila’shi; Binyibinyi nenulungula’shi: Anka mwanushībakitshine kwi umune a bano mukile kihela, biabia tanwibankitshine’mi, ooo.
46Binyibiabia bano abakēnde mu malwa a ikala-ika; anka balulame (abakatwele) mu muwa wa ikala-ika.
Currently Selected:
Mateo 25: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo