Mateo 24
24
1Biabia Yesu batukile hasha, bālamunukile ku ntempelo; bana-be-ba-bukishi abafikile kwadi mu kumulesha ngibako ya ntempelo. 2Yesu bebehwishe’shi: Tanumono bino bintu bioso? binyibinyi nenulungula’shi: Takukashala hano ebwe dimune ditentekwe ha dikwabo adikakutwa kwalamunwa hashi.
3Habadi mushale ha ngulu ya Olefeta, bana-be-ba-bukishi abafikile kwadi ku bufiefie’shi: Etulungule ahakafiki bino bintu? na kinyi akikekala kitundwilo kia kufika kobe, na kia kunfudilo kwa bahanohansenga? 4Yesu beoālulwile’shi: Dimukai tanōngolwanga na muntu; 5mwanda be bungi abakafiki mwishina diande’shi: Ami nyi Kidisitu. Abakōngola be bungi. 6Anukahusha myanda ya ngoshi na nkumo ya ngoshi; Tanwikalanga na katshima munda, mwanda (bino) bintu bioso tabikakutwa kufika, anka kunfudilo tankubandjile kufika. 7Mwanda mīlo na mīlo ayiketukena ngoshi, na mafumu na mafumu. Akukekala minanga, na bihuha bia masungu, na nsenga ayikatenkatenka mu bihindji na bihindji. 8Bino bioso nyi kibangilo kia bishiotshi. 9Henyihaha abakenufisha ku malwa, na kwi nwihā; anukashikībwa na mīlo yoso ha mwanda w’eshina diande. 10Biabia be bungi abakakokolwa, abakehulukishena muntu na mukwabo, muntu na mukwabo, na kwishikwena. 11Batemuki ba madimi be bungi abakēbō, abakōngola be bungi. 12Na ha mwanda wa kushiula kwa bishila akukakamba, kifulo kia be bungi akikatāla. 13Anka yawa akanyingamana mpaa na kunfudilo e akahanda. 14Na uno mukāndu wibuwa wa bufumu bw’Efile-Mukulu aukalungulwa hanohasenga hoso bu bulungudi bwa bu kamonyi ku mīio yoso; henyihalia kunfudilo akukafiki. 15Biabia hanukamono kikubendwa kia musadi, kibākwilwe kwi Danyele mutemuki, kimane mu mbalo yilamunwe yi-kishi’a (yawa abala ashīngule); 16Henyihaha be mu Yudea basukile ku mangulu. 17Yawa e ha musaka wa nshibo tayikye mu kutusha kintu ki mu nshibo ye. 18Sunga yawa e mwifuba tālukanga mu kuata bifwalwa bie, ooo. 19Mpombo kwabadi basha maīmi, na kwi baba abōmesha bana mu ā mafuku! 20Anka nutekye (Efile-Mukulu’shi), kusuka kwenu takukekala ha kihindji ki’eshiho, sunga h’efuku dia Sabado; 21Mwanda henyihaha akakekala kufwambuka kukata kushyahwandjikishwa na kungi, kuatshila ku kibangilo kia hanohansenga, mpaa na binobino, ayoyo, sunga ku mpala kwikala-ika takukafiki. 22Biabia su ā maf’uku tabadi atshibībwe, takubadi akuhanda muntu, sung’umune: anka ha mwanda wa basangudibwe, ā mafuku akatshibibwa. 23Binyibiabia su muntu ese akenulungula ’shi: Talai, Kidisitu biadi’bi; sunga’shi: E biadi’biaa; tanumukuminanga. 24Mwanda baKidisitu ba madimi abakēbō, na batemuki ba madimi, abakalesha bitundwilo bikata na biakukanya; na kōngola sunga basangudibwe su mbiabia takukutwa kukitshibwa. 25Talai, tampwile kwinulungula kwibedi, 26Binyibiabia, su abakenulungula’shi: Talai, E ha mahia a kabāka, tanwendanga kwanka; Talai, ngiu e mu tudimbo tufwame, tanukuminanga. 27Mwanda bu luhenyo lwa mpeshi alufu ku kihindji akitunduka nguba, na kuhenya mpaa na kwa kuhona nguba, anka biabia namu nyi abikekala kufika kwa Mwan’a Muntu. 28Mwanda hoso hekale bitānda-bifwe, anka haha ahakakoñena mpungwe.
29Anka henyiha hakufudila ha malwa a ā mafuku, nguba akafitshi, mweshi namu taukatoko, nyenyenye ayikatukuka mwiilu, na bia bukome bia mwiilu abikatenkatenka, 30Henyihaha kitundwilo kia Mwan’a Muntu akikamweka mwiilu; biabia mīlo yoso ya hanohansenga ayikadidi; ayikamono Mwan’a Muntu afiki ’makumbi a mwiilu na bukome na ntumbo yikata. 31Biabia akatumu bamwikeilu be n’eyi dikata dia mpungi, abakakongola basangulwe ku mpese yinanka ya luhahi, ku nsongo yimune yēilu mpaa na ku yingi nsongo. 32Binobino ambulai mwele wa mutshi wa kikuku; ha lutabi lwao lukī lubofule, na hakushihuka mabishi, nwiuke’shi mpeshi tadi hehi. 33Biabia anwe namu hanukamono bino bioso, nwiukye’shi, e tadi hehi, mpaa na ha kibelo. 34Binyibinyi nenulungula’shi: Kano kankwatamanwi takakakidi mpaa n’ahakakumbana bino bintu bioso. 35Eilunansenga abikashimina, anka myanda yande tayikakidi; ooo.
36Anka ha mwanda w’adi ’efuku, na yaya nsaa, takwi muntu ebiuku, ooo, sunga bamwikeilu be mwiilu; anka Shami, kubahu. 37Anka mubadi mwikele mafuku a Noa, anka biabia namu nyi a mukekala kufika kwa Mwan’a Muntu.
38Mwanda anka mubadi mwikele aa mafuku abadi kwibedi kwa kiino kia mpeshi, babadi abadyi na kutoma; babadi ababamba, babadi ababambibwa, mpaa n’ahabafikile efuku dibatwelele Noa mbwato bukata. 39Tababadi beukye mpaa n’ahabafikile kiino kibebashimishe boso; Anka biabia namu nyi a bikekala ha kufika kwa Mwan’a Muntu. 40Ku kiakia kihindji babidi abakekala mwifuba, umune akātshibwa, mungi akalekibwa. 41(Banabakashi) babidi (abakekala) abahele kwibwe; umune akātshibwa, mungi akalekibwa.
42Binyibiabia tengelai, mwanda tanwiuku nguba ayikafiki Nfumwenu. 43Anka nwiukye kino’shi; su sha nshibo beukile kihindji akikafiki ngifi, badia kutala (biya), tabadia kukumina nshibo ye kutubulwa. 44Binyibiabia anwe namu nwikale bēmane; mwanda mu nsa yianushyanutentekyesha, Mwan’a Muntu akafiki: 45A biabia, a nanyi mpika a kishima na binangu batudilwe nanfumu e bu mulami a ba ku nshibo ye, kwibaha bidibwa ha kihindji kihwandjikile? 46Mwabi kwi yawa mpika akakitshi bino ahakamusañana nfumu e hakwakula. 47Binyibinyi nenulungula’shi: Akamutulu bu mulami a bintu bie bioso. 48Anka su yawa mpika ntubi ahwandjikisha mwishimba die’shi: Nfumwami bakutwa kufika bukidi; 49akabanga namu kukuhila bahika n’e, na kudia na kutoma n’abakolwa (malofu). 50Biabia nfumu a yawa mpika akafiki mu’di’efuku diashyamutengyela, na ha nsa yiashyeuku; 51Akamutshibi bihindji bibidi, abakamutula kihindji kie hamune na bansesa: akukekala kudila na kwisuma kwa meno.
Currently Selected:
Mateo 24: NTLK52
Highlight
Share
Copy
Want to have your highlights saved across all your devices? Sign up or sign in
© 1952 Alliance Biblique de la République Démocratique du Congo