Ba-Loma 4
4
1Tongila is’ate’oya ena likambo lina Abalayama, nkya eniso? Aataki’ale nai lacin’ena yonge? 2Yo-mbo Abalayama ayengwaki boyengo l’ikambwa, aataki etelo oyofef’endamene la ncin’eho, ohonde efa eneka Yakomba. 3Bokanda bona Yakomba botenda bokotu’oya? Ate, Abalayama aimedyaki, Yakomba, ko imeedyo ibo iandamaki eneyal’ende yoka mbongi. 4Nko boto akamb’ekambwa, mpuci efatangama mpuci en’isei: eyali nk’osilo. 5Ohonde eneyal’ende onofakamb’ekambwa, koko aimedy’ende onoyengola boto onofana mbongi ena Yakomba, imeedyo inande yandama yoka mbongi; 6yoka bosanib’onatenda Dawidi lacin’en’ekiko en’oto onongi Yakomba oandela mbongi kum’afan’ikambwa, 7ate,
Iy’anatungwa en’ikambwa biniyo bin’owe,
ko baoyi’owe’aniyo bamokundama, baosakelama bosako.
8Boto onofaandama bowe la Yakomba aosakelama bosako.
9Bosako bone bosakama eneyal’iy’anakesama yonge kei, yombo eneyal’iy’anatakesama yonge nkoho? Lacin’iso tila, is’ate, Imeedyo ina Abalayama iandamaki eneyal’ende yoka mbongi. 10Iho iandamaki yok’osamb’oya? Eneki’nd’okesama ka yonge, yombo kum’atakesama yonge? Ef’eneki’nd’okesamaka yonge, nk’en’oso, kum’atakesama yonge. 11Ko atambaki ndembi eka nkesa ona yonge, nko ndembi ena mbongi eho en’imeedyo iniki’nd’oimedyaka kuntatakesama yonge, lacin’eho ayalame bafango bon’ato bahatu banimedya, kanga batakesama yonge, lacina mbongi eandame eneyal’iyo nkoho; 12ko lacina ayalame bafango’ona nkesa ena yonge eneyal’iy’anakesama yonge, efa lacin’oka bamokesama yonge kei, koko lacina bayakile ena baina ban’imeedyo iho iniki bafango’oniso oka Abalayama oimedyaka kum’atakesama yonge. 13Tisemba eneki Abalayama l’an’anande otambaka, lacina ayalame bosangoli bon’enyanga behetu, etayala lacin’en’asangya, eyaaki lacin’ena mbongi en’imeedyo. 14Lacina, yombo baise’asangya bayali basangoli, imeedyo ioyalama bototoloto, ko esemba eehyama. 15Lacina nkele eatama nko l’asangya: enefayali basangya, mpulunganya efayali meho. 16Lacin’eho, mbongi eyali lacin’en’imeedyo lacin’eho eyalame bosamb’onoyali ise, lacina esemba ekikyame la locili eneyali bana bahatu: ef’eneyali baise’asangya kei, koko eneyali baho ban’imeedyo ina Abalayama, onoyali bafango’on’isatu 17(bosamb’onoyali yoi linalitengi, Mokiil’e bafango bon’ato ban’enyanga bike) en’oso’onande onoki’nd’oimedyaka, nko Yakomba, onetola bato banawaki, ko onelela bikambwa binifayali yoka biyali. 18Eneten’ende ncina ena ndengedya tu, aongyaki yimedya la ndengedya, lacina ayalame bafango bon’ato ban’enyanga bike, yok’osamb’onoki yoi otendamaka, Ban’ane bangoyala nkoho. 19Ende atalemba en’imeedyo, ko atakanela yonge linandamene linaliyaaki yoka limowa (ende atundaki esik’eho yoka mbula bokama), ko atakanela botundu bona lototo lona Sala: 20atakandakanda la biinda bon’imeedyo lacin’en’esemba ena Yakomba, ohonde akikyamaki locili en’imeedyo, akumyaki Yakomba, 21ko aeyaki nko njeya mene, ate ende ailisa yoi linaliki’nd’osembyak’esemba. 22Ko la ncin’eho imeedyo inande iandama etieyal’ende yoka mbongi. 23Koko yoi liho litatengama lacin’enande kei, lika imeedyo iho iandama eneyal’ende; 24limotengama lacin’eniso nkoho, lacin’oka imeedyo iho itigandama eneyal’iso banimedy’ende onetolaki Yesu Nkolo eniso enek’ato banawaki. 25Ende alekyamaki en’ewedi lacin’ena bewe beniso, ko aetolamaki lacin’ena boyengo bonatoyengol’ende.
Currently Selected:
Ba-Loma 4: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
